UNDIR er nýtt leikrit eftir Adolf Smára Unnarsson.
Neðanjarðarlestarstöð. Rétt fyrir hádegi. Fimm einstaklingar bíða eftir næstu lest þegar þau taka eftir því að einhver liggur hreyfingarlaus á teinunum. Hrasaði hann þangað niður? Missti hann eitthvað? Er hann fullur? Dáinn? Það eru bara fjórar mínútur í lestina. Hvað gengur manninum til? Eitt af einu mála persónurnar á brautarpallinum upp mynd af aðstæðunum, hvernig þau muna morguninn. Erfitt er þó að fá skýra heildarmynd þar sem öll hafa þau sína útgáfu af sögunni, sem oftar en ekki er í algjörri þversögn við orð hinna. Það eru bara þrjár mínútur í lestina. Ætlar enginn að gera neitt?! Ætlar enginn að hjálpa manninum? Það eru bara tvær mínútur í lestina…
UNDIR er nærgöngult og ágengt leikrit eftir Adolf Smára sem hefur vakið mikla athygli fyrir sýningar á borð við Nokkur augnablik um nótt, Ekkert er sorglegra en manneskjan og Kannibalen. Hér leikstýrir hann hópi efnilegra leikara í baneitraðri, óvæntri og háskalegri kómedíu þar sem hugmyndum okkar um náungakærleik, ábyrgð og samfélag er snúið á hvolf.
„Athyglisverð sýning sem kemur okkur við hér og nú!” Tmm.is, S.A.
„Vel formað verk, stundum áleitið, oftar fyndið!” Morgunblaðið, Þ.T.
„Flott, skemmtilegt og sterkt verk!” Lestrarklefinn, D.S.J.
Verkið var frumsýnt í Háskólabíói síðastliðið sumar undir formerkjum afturámóti, en færir sig nú yfir í Tjarnarbíó vegna mikilla vinsælda.
AÐSTANDENDUR: Texti og leikstjórn: Adolf Smári Unnarsson Ljós og tæknilegar útfærslur: Magnús Thorlacius Búningar: Júlía Gunnarsdóttir Tónlist: Ronja Jóhannsdóttir Aðstoð við uppfærslu: Ástrós Hind Rúnarsdóttir
Sýning um þjóðaríþrótt okkar Íslendinga: Að elta veðrið!
Bráðfyndið nýtt verk, samið af mörgum fremstu gamanleikurum þjóðarinnar úr leikhópi Þjóðleikhússins, unnið upp úr missönnum sögum af útilegum á Íslandi þar sem allt fer í steik. Hér er unnið með list leikarans og samband hans við áhorfendur af hugmyndaauðgi, fjöri og hæfilegu kæruleysi, um leið og þjóðarsálin er krufin. Óborganlegar aðstæður sem við þekkjum öll – alltof vel.
Útilegan þar sem allt fer í steik Skrautlegur vinahópur heldur í sína árlegu útilegu þar sem allt þarf að vera á sínum stað – rétta stæðið fyrir hjólhýsin, moðsteikta holulambið, sándboxið og allt hitt. En nú er samt ekkert eins og það var, því það vantar eina í hópinn. Hver og einn er með sínar hugmyndir um það hvernig eigi að bregðast við nýrri stöðu og hin árlega samkoma vinahópsins tekur óvænta og stórvarasama stefnu. Veit Hjálmar um öskuna? Nær Guðrún að loka stóra málinu? Mun viðhafnarnámið nýtast Andra á toppnum? Þarf að fela vínið fyrir Rögnu? Og er David Clark allur þar sem hann er séður?
Óstöðvandi hláturskast í samstarfi við Gaflaraleikhúsið
Tóm hamingja er glæný gleðisprengja á tveimur sviðum. Þetta ferska og sprenghlægilega leikhúsform heldur öllum á tánum, leikurum jafnt sem áhorfendum. Vinahópurinn ákveður að taka smá inngrips partý upp í bústað um áramótin. Þau hafa þungar áhyggjur af Hjálmari sem virðist alveg vera að missa af hamingjulestinni. Hann er óvirkur á samfélagsmiðlum og hættur að drekka sem er klárlega merki um alvarlegt þunglyndi. Því ákveður vinahópurinn að hjálpa. Þessi áramót eiga að vera tóm hamingja svo Hjálmar sjái ljósið á ný. En misskilningur, meðvirkni, ofskynjunarvöfflur, framhjáhald, kind og fleira flækja bústaðarferðina all verulega.
Hvernig sýnir maður sýningu á tveimur sviðum á sama tíma?
Gaflaraleikhúsið er þekkt fyrir stórskemmtilegar sýningar unnar lóðbeint upp úr íslenskum veruleika og áhorfendur verða ekki sviknir af þessu bráðfyndna verki sem allir frá fermingu og fram á grafarbakkann geta hlegið að.
Sýningin er styrkt af Sviðslistasjóði og Hafnarfjarðabæ
Dásamlega fyndið og heiðarlegt verk um fjölskylduflækjur og kynslóðabil.
Kvöldmaturinn er kominn á borð hjá hjónunum Nönnu og Villa. Hún kemur með límónaðið, hann er tilbúinn með glasamotturnar og svo setjast þau að snæðingi eins og flest kvöld undanfarin fimmtíu ár. En í stað þess að ræða um veðrið eða sjónvarpsdagskrána segist Nanna vilja skilnað og Villi samþykkir það vafningalaust. Áður en hendi er veifað eru synir þeirra hjóna, auk tengdadóttur, mætt á staðinn til að telja foreldrum sínum hughvarf. Gamalt fólk skilur ekki, gamalt fólk ætti að vita betur, gamalt fólk ætti ekki að vera með vesen! Eru þau hvort eð er ekki orðin of gömul til að vera að spá í ást og hamingju?
Hilmir Snær Guðnason stýrir þessu bráðskemmtilega verki um fjölskylduflækjur en með hlutverk fara Eggert Þorleifsson, Sigrún Edda Björnsdóttir, Jörundur Ragnarsson, Vilhelm Neto, Esther Talía Casey, Katla Margrét Þorgeirsdóttir og Fannar Arnarsson.
Líkaminn er skál á óhlutbundinn hátt í ólínulegri frásögn þar sem líkamleg upplifun er tjáð með leir og takti.
Allt sem við finnum, hugsum og segjum upplifum við í líkamanum. Líkaminn man allt. Hann er skálin sem heldur utanum allt það sem við erum og skynjum.
Rauði þráður sýningarinnar Líkaminn er skál er endurtekningin og kerfin sem eru allt í kringum okkur og inni í okkur. Hjartslátturinn, öndunin, frumurnar, takturinn í deginum, takturinn í náttúrunni, að við vöknum, burstum tennurnar og fáum okkur kaffi. Sýninginbyggir á tilfinningunni sem kemur í kjölfar þess að takturinn í þessum kerfum fer úr jafnvægi. Þetta getur verið þegar við missum ástvin, heilsuna eða eldgos brýst upp í bakgarðinum. Eitthvað gerist sem kippir jörðinni undan fótum okkar og breytir öllu sem á eftir kemur. Allt sem okkur hefur fundist gefið er ekki eins og það var. Sumarið kemur ekki lengur á eftir vorinu. Frumur líkamans missa taktinn og fara á yfirsnúning. Að vera á lífi er skyndilega ekki sjálfgefið. Allt í einu er áþreifanlegt hvernig eitt andartak getur breytt öllu. En mitt í þessari óvissu og óreiðu fæðist eitthvað alveg nýtt.
Leikhópurinn 10 fingur hefur um árabil sérhæft sig í listsköpun á mörkum leikhúss og myndlistar. Hópurinn hefur unnið með mismunandi efni í fyrri sýningum sínum, eins og pappír, plast eða mold og rannsakað ólíka eiginleika þeirra og eðli og hvernig megi gefa þeim líf með hreyfingu og líkamstjáningu. Í sýningunni Líkaminn er skál tekst hópurinn á við leir en blandar nú aðferðum sínum saman við aðferðafræði sviðslistmannsins Matteo Fargion, sem er annar aðal höfundur sýningarinnar. Aðferðafræði hans byggir á ákveðnum formúlum úr tónsmíðum sem eru yfirfærðar á hreyfingu og líkamstjáningu og á því mjög vel við vinnuaðferðir leikhópsins 10 fingur. Líkaminn er skál er fyrir fullorðna ólíkt fyrri verkum hópsins.
Sýslumaður Dauðans er nýr, íslenskur, súrrealískur drama-gamanleikur. Ævar Birkisson missir föður sinn, Birki Ævarsson og á Útfararstofu Orfeusar fær Ævar tilboð sem hann getur ekki hafnað. Upphefst Kafkaískur leiðangur Ævars í leit að föður sínum þar sem hann tekst á við ævintýralegar kynjaverur en líka rannsóknarlögreglu, spjallþáttastjórnendur og síðast en ekki síst, Sýslumann Dauðans. Verkið er skapað inn í íslenskan veruleika og er fyndið, hjartnæmt og sprúðlandi af sköpunargleði.
Höfundurinn, Birnir Jón Sigurðsson var starfandi leikskáld Borgarleikhússins leikárin 2023-2024 og er Sýslumaður Dauðans afrakstur þeirrar vinnu. Leikstjórinn Stefán Jónsson grípur verkið höndum tveimur og með frábærum hópi leikara og listrænna stjórnenda leiðir okkur inn í magnaðan heim sem er í senn harmrænn og bráðfyndinn.
Stúlka ákveður að taka þátt í skólahlaupinu. Hún hleypur af stað. Hún er ein af sætu og vinsælu stelpunum og ætlar að verða leikkona þegar hún verður stór. Hún byrjar að dragast aftur úr. Bilið stækkar á milli hennar og hópsins. Stúlkan blæs sápukúlur og speglar sig í þeim. Sápukúlurnar svífa upp í himininn og brot úr lífshlaupi hennar birtast.
Sögupersónan leiðir okkur í gegnum líf sitt sem manneskja með líkamlega skerðingu sem ágerist með aldrinum. Í fallegu, hvetjandi og áhrifamiklu verki, þar sem tónlist, myndlist og dansi er fléttað saman við frásögnina, fylgjumst við með baráttu fyrir framtíð, sjálfstæði og réttindum, og leit að ást og tengslum. Taktu flugið, beibí er einstök saga sem á erindi við okkur öll, saga um framtíðardrauma, ást, fjölskylduna, baráttu og sigra. Leikritið er byggt á persónulegri reynslu og lífshlaupi höfundarins, Kolbrúnar Daggar, sem tekur þátt í sýningunni. Hún hefur lokið námi af sviðshöfundabraut LHÍ og meistaranámi í ritlist við HÍ, og er þetta fyrsta leikverk hennar sem sett er á svið í atvinnuleikhúsi.
Elly snýr aftur í takmarkaðan tíma í Borgarleikhúsið.
Elly er komin aftur! Í takmarkaðan tíma stígur Katrín Halldóra aftur á Stóra sviðið sem Elly Vilhjálms í rómaðri sýningu Gísla Arnar Garðarssonar eftir handriti Gísla og Ólafs Egils Egilssonar. Sýningin sló á sínum tíma öll met og naut fádæma vinsælda. Nú snýr Elly aftur vegna fjölda áskorana!
Hún bjó yfir óræðri dulúð og töfraði áhorfendur með söng sínum og leiftrandi persónuleika; túlkunin hógvær og ígrunduð, röddin silkimjúk og hlý. Líf Ellyjar varð stundum efni í sögusagnir og slúður sem hún hirti lítið um að svara því hún var dul og forðaðist sviðsljós fjölmiðlanna. Í þessari mögnuðu sýningu fetar Katrín Halldóra í fótspor einnar dáðustu söngkonu þjóðarinnar og syngur sig inn í hjörtu áhorfenda sem aldrei fyrr.
Fjölbreyttar og kynngimagnaðar sögur, glænýr söngleikur og kraftmikil ný íslensk verk áberandi.
Leikhússkóli Þjóðleikhússins hefur göngu sína, öflugt fræðslustarf og spennandi sýningar fyrir börn og ungt fólk. Byltingarkenndu opnu kortin hittu í mark.
Verðlaunaverkin sem slógu í gegn á síðasta leikári halda áfram göngu sinni fyrir fullu húsi.
Nýtt leikár Þjóðleikhússins er nú hafið, fjölbreytni í verkefnavali er gríðarlega mikil og leikhúsgestir eiga sannarlega mikla leikhúsveislu í vændum. Leikárið einkennist ekki síst af fjölda nýrra íslenskra verka auk þess sem óvenju margar sýningar frá síðasta leikári eru enn á fleygiferð. Stormur er glænýr söngleikur eftir Unni Ösp og Unu Torfa, sýning sem lætur hjartað ólmast með magnaðri tónlist og undurfögrum augnablikum. Leikstjóri er Unnur Ösp Stefánsdóttir. Eltum veðrið er gleðileikur með söngvum úr smiðju listafólks Þjóðleikhússins sem mun sannarlega kitla hláturtaugarnar. Jólasýning Þjóðleikhússins er Yerma í leikstjórn Gísla Arnar Garðarssonar. Verkið er byggt á samnefndu meistaraverki Lorca en atburðarásin er flutt til nútímans á meistaralegan hátt.
Heim er nýtt leikrit eftir Hrafnhildi Hagalín, eitt okkar virtasta leikskáld, í leikstjórn Magnúsar Geirs Þórðarsonar. Taktu flugið, beibí! er eftir Kolbrúnu Dögg Kristjánsdóttur og fjallar um baráttu hennar fyrir framtíð, sjálfstæði og réttindum sem manneskja með líkamlega skerðingu. Ilmur Stefánsdóttir leikstýrir. Blómin á þakinu er nýtt íslenskt barnaleikrit byggt á dásamlegri bók Ingibjargar Sigurðardóttur og Brians Pilkington í leikstjórn Agnesar Wild.
Sýningarnar sem slógu í gegn á síðasta ári, Frost, Orð gegn orði og Grímusýning ársins, Saknaðarilmur, verða áfram á fjölunum. Aðventusýningin vinsæla Jólaboðið birtist nú á Stóra sviðinu og sprúðlandi leikhópur leikhússins tekur að sér ný hlutverk í sýningunni. Eftirlætis aðventusýning barnanna, Lára og Ljónsi, verður á Litla sviðinu. Pólsk gestasýning, Sjóndeildarhringurinn/Widnokrąg verður sýnd í september, með íslenskum og enskum texta og stórskemmtilega samstarfssýningin Sund í leikstjórn Birnis Jóns Sigurðssonar kemur á svið með vorbirtunni. Í Hádegisleikhúsinu verður nú boðið upp á Heimsókn eftir Hildi Selmu Sigbertsdóttur.
Leikhúskjallarinn iðar af lífi
Í Kjallaranum kraumar í suðupottinum og þegar lokið er tekið af spretta fram nautnaseggir, grínistar, stórsöngvarar, spunameistarar, dragdrottningar og öll þau sem vilja hlæja hátt. Á rauðu ljósi, einleikur Kristínar Þóru, heldur áfram að stressa áhorfendur en fyrst og fremst gleðja, en uppselt var á yfir 50 sýningar á síðasta leikári. Improv Ísland stendur vaktina á miðvikudögum með óborganlegum spunasýningum sínum. Grínkjallarinn er spennandi nýjung þar sem úrvalslið íslenskra uppistandara mun brillera á fimmtudagskvöldum. Kjallarakabarettinn lýsir upp svartasta skammdegið á föstudögum. Sviðslistahópurinn Óður býður upp á bráðfjörugar gamanóperur í návígi. Skíthrædd er tragíkómískur söngleikur eftir Unni Elísabetu Gunnarsdóttur sem deilir hér persónulegum sögum úr lífi sínu. REC Arts mun bjóða upp á vinnusmiðjur og standa fyrir House of Revolution fjölmenningarkvöldum fjórum sinnum í vetur.
Nýr leikhússkóli, fjölbreytt barnastarf – og byltingarkenndu Opnu kortin
Þjóðleikhúsið heldur áfram að auka við öflugt fræðslustarf sitt. Nýr Leikhússkóli hefur verið settur á laggirnar en þar munu nemendur á aldrinum 18 – 22 ára öðlast reynslu í öllu sem viðkemur leikhúsinu. Hinn óviðjafnanlegi Orri óstöðvandi og vinkona hans Magga Messi munu gleðja börn um land allt í nýrri sýningu sem Vala Fannell leikstjóri byggir á bókum Bjarna Fritzsonar. Einnig verður leikskólabörnum boðið á sýningar á Ég get.
Byltingarkennda nýjungin sem kynnt var í fyrra með Opnum kortum þar sem ungt fólk getur séð eins mikið og þau vilja fyrir 1.450 kr á mánuði, sló í gegn og heldur áfram. Eigandi kortsins getur séð allar sýningar leikhússins eins oft og viðkomandi vill.
Kraftmikið höfundastarf – ný leikritahátíð, Guli dregillinn
Ný íslensk verk og frumsköpun hefur einkennt Þjóðleikhúsið á undanförnum árum og mikil áhersla er lögð á að efla íslenska leikritun. Við aukum framboð og stuðning við höfunda með því að setja af stað nýja leikritahátíð, Gula dregilinn. Þar verða þrjú glæný og spennandi leikrit frumflutt með leiklestri af stjörnuteymi leikara á glæsilegri vorhátíð sem nefnist Guli dregillinn og fagnar íslensku leikhúsi og skáldunum sem skrifa fyrir sviðið. Auk þess opnar leikhúsið vinnustofu höfunda, þar sem höfundar fá aðstöðu og aðstoð við leikritaskrif.
“Við erum full tilhlökkunar fyrir nýju leikári sem kemur í kjölfar eins aðsóknarmesta vors í Þjóðleikhúsinu um árabil. Á leikárinu verða settar á svið fjölbreyttar sögur sem eiga eftir að hreyfa við okkur á ýmsan hátt. Unga fólkið kemur eins og stormsveipur inn á Stóra sviðið með nýjan söngleik sem fær hárin til að rísa. Fjörugar barnasýningar bjóða næstu kynslóð velkomna og ögrandi sögur um samtíma okkar, fjölskylduna og mennskuna munu snerta okkur og hrífa. Hlátrasköll berast neðan úr Kjallaranum þar sem kraumar í suðupottinum. Með vorinu efnum við til hátíðar sem tileinkuð er list leikskáldsins – því nýjar sögur eru framtíðin. Svo má ekki gleyma rómuðu sýningunum sem halda áfram frá fyrra ári, Grímusýningin Saknaðarilmur, stórsöngleikurinn Frost, áleitni einleikurinn Orð gegn orði og gleðiuppistandið Á rauðu ljósi,” segir Magnús Geir Þórðarson þjóðleikhússtjóri.
Þöglar byltingar er ögrandi einþáttungur um óhamingjusamt fólk sem rifjar upp líf sitt á brúðkaupsdaginn. Við köfum inn í og undir þögnina sem einkennir samband þeirra á meðan fimm ára barnið þeirra kíkir um spennt fyrir komandi hátíð. Leikritið er flutt á íslensku með enskum texta.
Sérstakar þakkir: Annalísa Hermannsdóttir, Guðmundur Felixson, Guðbjörg Bergmann Skarphéðinsdóttir, Natalía Gunnlaugsdóttir, Sverrir Gauti Svavarsson, Ungleikur, Móeiður Helgadóttir og margir fleiri
