Leikdeild Ungmennafélags Biskupstungna sýnir barna- og fjölskylduleikritið Rúi og Stúi í Aratungu.
Leikdeild Ungmennafélags Biskupstungna sýnir barna- og fjölskylduleikritið Rúi og Stúi eftir Skúla Rúnar Hilmarsson og Örn Alexandersson með nýrri tónlist eftir Stefán Þorleifsson og í leikstjórn Ólafs Jens Sigurðssonar.
Allt er í sóma í sveitarfélaginu þar sem Rúi og Stúi búa. Þeir félagarnir sjá til þess að íbúarnir þurfa ekki að erfiða eða hafa áhyggjur af daglegu amstri og eru uppfinningasamir og sniðugir. Sveitarstjórinn stýrir af röggsemi með sinn trygga aðstoðarmann Bergstein sér við hlið. Allt er einfalt og gott þar til daginn sem allt byrjar að fara úrskeiðis.
Teprurnar verða á sviði Borgarleikhússins í vetur.
Andri og Eva hafa ekki stundað kynlíf í fjórtán mánuði og fjóra daga. Samt er ekkert að. Ekki þvælast andvökur og brjóstagjafir fyrir barnlausu parinu; engin kulnun í vinnunni; engin risvandamál eða hormónatruflanir; ekki skortir ástina og löngunin er svo sannarlega til staðar. En ekkert gengur. Það er komið að úrslitastundu. Þau eru komin í leikhúsið til að gera það! Skoska leikskáldið og leikstjórinn Anthony Neilson er helst þekktur fyrir óvægin og erfið verk á borð við Ritskoðarann og Penetrator sem hafa bæði verið sýnd hér á landi. Hann hefur þó skrifað margs konar ólík verk, bæði fyrir leikhús og kvikmyndir og með Teprunum sýnir hann á sér nýjar hliðar. Þar eru samskipti kynjanna í brennidepli en verkið einkennist fyrst og fremst af leiftrandi húmor þótt broddurinn sé aldrei langt undan. Hér fara leikararnir góðkunnu Vala Kristín Eiríksdóttir og Jörundur Ragnarsson á kostum í hlutverkum Evu og Andra undir styrkri stjórn Hilmis Snæs Guðnasonar.
Höfundur: Anthony Neilson Þýðing: Ingunn Snædal Leikstjórn: Hilmir Snær Guðnason Leikmynd og búningar: Sean Mackaoui Lýsing: Fjölnir Gíslason Hljóðmynd: Ísidór Jökull Bjarnason Leikgervi: Guðbjörg Ívarsdóttir Leikarar: Jörundur Ragnarsson og Vala Kristín Eiríksdóttir
Sagan af Gnýpu er sýnt leikhúsinu á Möðruvöllum í Hörgárdal.
Umskiptingar bjóða ykkur velkomin í undraheim Töfrabókanna.Þegar bókin er opnuð birtist heillandi heimur og sagan lifnar við.Töfrabækurnar er brúðuleikhús fyrir yngstu kynslóðina.Sýnt er í leikhúsinu á Möðruvöllum í Hörgárdal á hverjum sunnudegi kl 14:00
Fyrsta sagan er Sagan af Gýpu.
Gýpa er með eindæmum matgráðug og mesta furða að hún hafi ekki verið búin að éta heimilisfólk út á gaddinn. Þegar matinn þrýtur étur hún askinn sinn, karl og kerlingu í kotinu og kúna Kreppilhyrnu. Síðan heldur hún af stað til að leita að meiri mat. Hver skyldi vera svo ólánsamur að verða á vegi hennar?
Eftir sýningar verður hægt að kaupa kaffi og kruðerí, föndra svolítið og jafnvel sjá hvernig hægt er að gera sína eigin útgáfu af Gýpu.
Leikstjóri: Jenný Lára Arnórsdóttir Leikarar: Jónína Björt Gunnarsdóttir og Margrét Sverrisdóttir Framleiðsla: Fanney Valsdóttir Brúðuhönnun: Margrét Sverrisdóttir Höfundar tónlistar: Vilhjálmur B. Bragason og Sesselía Ólafsdóttir
Benedikt búálf þekkja vel flestir, um er að ræða einn allra þekktasta barnasöngleik þjóðarinnar og skemmtilegt ævintýri eftir Ólaf Gunnar Guðlaugsson með grípandi lögum og tónlist sem Þorvaldur Bjarni Þorvaldsson gerði og söngtextar eftir Andreu Gylfadóttir og Karl Ágúst Björnsson.
Sýningin var fyrst sett upp á Íslandi árið 2002 í leikstjórn Gunnars Gunnsteinssonar. Síðan hefur hún margoft verið sett upp út um allt land, þar á meðal hjá Leikfélagi Akureyrar. Nú er komið að því að Leikfélag Sauðárkróks takist á við þetta stóra verkefni og hafa þau verið síðasta mánuðinn að æfa og undirbúa sýningar.
Verkið fjallar á ævintýralegan hátt um baráttu góðs og ills. Dídí mannabarn fer með Benedikt búálfi til Álfheima þar sem uppnám ríkir vegna þess að dökkálfarnir, undir stjórn Sölvars súra, eru búnir að ræna Tóta tannálfi sem hefur í för með sér afdrífaríkar afleiðingar.
Leikstjóri sýningarinnar er Gunnar Björn Guðmundsson. Hann er margreyndur leikstjóri sem hefur leikstýrt á fjórða tug leiksýninga víða um land. Eins hefur hann verið iðinn við kvikmyndagerð en hann leikstýrði Áramótaskaupinu árin 2009-2012. Ásamt því leikstýrði hann kvikmyndunum Astrópíu, Gauragangi og Ömmu Hófí. Gunnar Björn hefur aðallega fengist við grín og barnaefni á sínum langa leikstjóraferli.
Leikfélag Sauðárkróks er eitt elsta áhugamannaleikfélag landsins og hefur í mörg ár sýnt leiksýningar við góðan orðstír. Það verður engin svikinn á að kíkja í álfaheim hjá Benedikt búálfi og vinum hans á Króknum.
Hinn sígildi söngleikur Litla hryllingsbúðin er sýndur í Hveragerði.
Leikfélag Hveragerðis frumsýndi, föstudaginn 6. október, söngleikinn vinsæla um Litlu hryllingsbúðina undir leikstjórn Jóels Sæmundssonar. Hér er um að ræða sígildan söngleik, fullan af húmor, góðri tónlist, heillandi persónum og krassandi söguþræði. Baldur Snær þrælar alla daga í blómabúð Markúsar á Skítþró og dreymir um ástir Auðar, en hún er í tygjum við leðurklæddan tannlækni með kvalalosta. Dag einn uppgötvar Baldur dularfulla plöntu sem á eftir að breyta lífi hans.
Þjóðleikhúsið frumsýndi nýtt íslenskt verk eftir Jón Gnarr í Hádegisleikhúsinu í gær. Verkið er bráðfyndið þar sem Gói og Pálmi Gests fara á kostum. Tveir menn hafa verk að vinna. Þeir hafa unnið svo lengi saman að þeir gerþekkja hvor annan. Eða hvað? Einstaklega skemmtilegur gamanleikur sem kemur á óvart.
Fjögur ný íslensk verk voru valin voru úr innsendu efni í handritasamkeppni sem Þjóðleikhúsið hélt í samstarfi við RÚV. Verkið eftir Jón Gnarr er þriðja verkið sem tekið er til sýninga í Hádegisleikhúsinu. Auk Jóns, voru verk eftir Bjarna Jónsson, Hildi Selmu Sigurbjörnsdóttur og Sólveigu Eir Stewart valin til sýninga.
Hádegisleikhús Þjóðleikhússins tók til starfa í endurnýjuðum Leikhúskjallara. Þar sjá gestir sýningu á nýju íslensku leikriti um leið og þeir snæða léttan hádegisverð. Húsið opnar kl. 11.45 og matur er borinn fram á bilinu 12:00 -12.15. Leiksýningin hefst kl. 12.20 og tekur tæpan hálftíma.
Þegar Virginia vaknaði eftir heilablóðfall líktist það atriði úr trúðaleikriti. Verk- og málstol gerði hana að fanga í eigin líkama og hinar hversdagslegustu gjörðir urðu þrautabraut. Áfallið breytti öllu í lífi Virginiu og upplifunin af heilablóðfallinu hefur reynst erfitt að útskýra.
Fyrir áfallið starfaði Virginia í áraraðir sem atvinnutrúður á sjúkrahúsum í Glasgow og Edinborg. Núna situr hún hinumegin við borðið og veit hreinlega ekki hvort hún eigi að gráta eða hlægja að fáránleikanum.Í verkinu miðlar Virginia, sem trúðurinn Cookie, upplifun sinni og segir sína sögu.
Stroke er nýtt heimildaverk eftir Virginiu Gillard og sviðslistahópinn Trigger Warning. Mótleikari og sviðshönd er eiginmaður Virginiu Sæmundur Andrésson. Um búninga sér Brynja Björnsdóttir, um tónlist Ingibjörg Ýr Skarphéðinsdóttir og lýsingu Jóhann Friðriksson. Leikstjórn og dramatúrgía er í höndum Andreu Elínar Vilhjálmsdóttur og Köru Hergils. Tæknistjóri er Kristín Waage. Aðstoðarmaður í hljóði er Valgerður Embla Grétarsdóttir og starfsnemi er Olga Maggý Winther.
ATHUGIÐ AÐ ÖLL SVIÐSVERK ERU SÝND Í STUTTAN TÍMA Í TJARNARBÍÓ
When Virginia woke up from a stroke, her world looked like a scene from a clown show. Aphasia made her a prisoner in her own body and the most everyday actions became a challenge. The stroke changed everything in Virginia’s life, and the experience has proved difficult to explain. Before the stroke, Virginia worked for years as a professional clown in hospitals in Glasgow and Edinburgh. Now she is sitting on the other side of the table and doesn’t know whether to cry or laugh at the absurdity. In Stroke, Virginia uses her clown persona, Cookie, to share her experience and tell her story. Stroke is a new theatre performance based on a true story by Virginia Gillard and the performing arts group, Trigger Warning. Co-performed and stage-managed by Virginia’s husband, Sæmundur Andrésson. Direction and dramaturgy by Andrea Elínar Vilhjálmsdóttir and Kara Hergils Valdimarsdóttir. Original music by Ingibjörg Ýr Skarphéðinsdóttir. Costume and stage design by Brynja Björnsdóttir. Lighting design by Jóhann Friðriksson.
Technician: Kristín Hrönn Waage. Assistant of sound tecnician: Valgerður Embla Grétarsdóttir. Intern and assistant to the production: Olga Maggý Winther.
Drottningin sem kunni allt nema … er sýnd í Bæjarbíói.
Drottningin sem kunni allt nema … er klukktíma löng, fjörug, fyndin, kósí og kjánaleg, krútt sýning með dásamlegum lögum og leikhústöfrum fyrir börn.
Bambalína drottning fær boð um að opna leikskóla og þar sem drottningar fá mjög sjaldan að leika sér vill hún endilega þekkjast boðið. Hún og Kalli aðstoðarmaður ásamt hundinum Snúllu þurfa svolítið að drífa sig því opnunin á að vera klukkan tólf. Ná þau í tæka tíð þó að Bambalína þurfi að borða, klæða sig og … að gera við hestakerru? Alveg sjálf! Og hvað er höfundurinn að þvælast með í leikritinu? Og hvað er það sem drottningin kann ekki???
Leikritið er byggt á samnefndri bók eftir Gunnar Helgason og Rán Flygenring sem kom út árið 2019 og var valin barnabók ársins af Morgunblaðinu.
Gaflaraleikhúsið hefur á síðustu árum sett upp fjölda barnaverka sem hafa slegið í gegn eins og Mömmu klikk, Langelstur að eilífu og Jól á náttfötunum. Drottningin sem kunni allt nema … er sýnd í Bæjarbíói.
Leikarar: Halla Karen Guðjónsdóttir, Ásgrímur Gunnarsson, Gunnar Helgason. Höfundar leikgerðar: Leikhópurinn og Björk Jakobsdóttir Leikstjóri: Björk Jakobsdóttir Búningar og leikmynd: Embla Vigfúsdóttir Teikningar og grafík: Rán Flygenring Tónlist: Máni Svavarsson Lýsing: Agnar Hermannsson
Sýningin er styrkt af sviðslistasjóði og Hafnarfjarðarbæ
Jólin eru á næsta leiti og Ægir Ó. Ægis forstjóri og mágur hans Jafnvægismálaráðherrann sjá fram á stórgróða vegna einkaleyfis þeirra á innflutningi á jólatrjám og ávöxtum. En það er í mörg horn að líta hjá forstjórahjónunum Ægi og Pálínu. Frumsýning á ballettinum Djákninn á Myrká stendur fyrir dyrum í Iðnó, kostaður af forstjóranum, þar sem Guðrún dóttir þeirra fer með aðalhlutverkið. Pálína þráir ekkert heitar en að mæta á frumsýninguna á bílnúmerinu R-9, enda eru það bara plebbar sem eiga hærra bílnúmer. Dægurlagahöfundurinn Leifur og atómskáldið Unndór Andmar takast á um ástir Guðrúnar. Sigga sviðsmaður vonar að sýningin hrynji ekki öll í gröf djáknans. Mælirinn gengur hjá leigubílstjóranum Gunnari Hámundarsyni, og hinn slóttugi Einar í Einiberjarunni reynist erfiður ljár í þúfu. Þegar skip Ægis og ráðherrans með öllum herlegheitum jólanna er sett í sóttkví vegna skæðs faraldurs – Deleríum búbónis – þurfa mágarnir að taka á öllum sínum spillingarráðum.
Deleríum búbónis er ein af perlum íslensks leikhúss, dásamlegur gamansöngleikur með pólitísku biti, fullur af sígildum lögum bræðranna Jóns Múla og Jónasar Árnasona.
Simone er rafeindavélfræðingur, nýkomin heim úr viðskiptaferð til Ítalíu með yfirmanni sínum. Hún er með gjöf handa eiginmanni sínum, Erik, sem hefur að vanda sinnt búi og börnum á meðan hún hefur verið í burtu og reynt þess á milli að einbeita sér að þýðingum sínum fyrir bókaforlagið sem hann vinnur hjá. Erik hikar við að opna pakkann. Er kannski eitthvað annað sem fylgir þessari gjöf? En hvað ef það væri Erik sem væri að koma heim úr viðskiptaferð og Simone hefði verið heima að sinna fjölskyldulífinu? Væri þá eitthvað á annan veg?
Ekki málið er einstaklega vel skrifað og eldfimt verk þar sem er fjallað af einstöku næmi og húmor um samskipti kynjanna, hina hálu framabraut, barnauppeldi og tærandi afbrýðisemi.
Leikritið er heimsfrumsýnt á Íslandi og nú er það hið virta leikskáld sjálft, Marius von Mayenburg, sem leikstýrir.
6. sýning – umræður eftir sýningu. 7. sýning – textun á ensku og íslensku.
Marius von Mayenburg leikstýrir eigin verki í Þjóðleikhúsinu.
Mayenburg-hátíð í október og nóvember
Þjóðleikhúsið efnir til Mayenburghátíðar í október og nóvember og sýnir öll verkin. Fyrir þau sem vilja upplifa allar sýningarnar á sama degi er boðið upp á Mayenburgveislu laugardaginn 28. október. Fram að þeim degi verður boðið upp á þétta sýningadagskrá á Ekki málið en í kjölfarið stakar sýningar á eftirfarandi dögum á fyrri verkunum tveimur, auk sýninga á Ekki málið:
