Leikfélag Hörgdæla setur nú upp gamanleikritið Stelpuhelgi eftir Karen
Schaeffer í þýðingu Harðar Sigurðarsonar. Þetta er í fyrsta skipti sem
þessi gamanleikur er settur á svið á Íslandi en verkinu hefur gengið vel
víða erlendis. Stelpuhelgi er stórskemmtilegur farsi þar sem vinkonurnar
Meg, Carol og Dot ásamt Ellie dóttur Megs hittast í bústað eina helgi
til að brjóta upp hversdagsleikann.

Vinkonurnar Dot og Meg, báðar nýlega fráskildar, stofna bókaklúbb til
þess að kynnast fólki. Þegar þær auglýsa eftir fleiri meðlimum er Carol sú
eina sem sækir um og fær inngöngu. Bókaklúbburinn ákveður eina
vetrarhelgina að fara í bústað. Markmið helgarinnar er að skemmta sér,
skiptast á sögum, drekka áfengi, borða góðan mat og fara yfir næstu bók
í bókaklúbbnum, lausar við alla karlmenn.
Plönin fara út um gluggann þegar gengur á áfengið og vinkonurnar eru
allar búnar að bjóða hver sínum karlmanninum til sín í bústaðinn, hvert
á hugmyndir gestgjafans. Hasarinn verður yfirgengilegur þegar óveður,
áfengi, lögreglan, stigi, eiturlyf og graðir makar flækjast inn í
söguna.

Leikstjóri sýningarinnar er Gunnar Björn Guðmundsson. Hann er
margreyndur leikstjóri sem hefur leikstýrt á fjórða tug leiksýninga víða
um land. Eins hefur hann verið iðinn við kvikmyndagerð en hann
leikstýrði Áramótaskaupinu árin 2009-2012. Ásamt því leikstýrði hann
kvikmyndunum Astrópíu, Gauragangi og Ömmu Hófí. Gunnar Björn hefur
aðallega fengist við grín og barnaefni á sínum langa leikstjóraferli.

Leikfélag Hördæla var stofnað árið 1997. Saga leiklistar í Hörgárdal er
þó mun lengri. Bindindisfélagið Vakandi og leikdeild Ungmennafélags
Skriðuhrepps höfðu staðið fyrir leiksýningum allt frá 1928.
Leikfélag Hörgdæla og fyrirrennarar þess setja reglulega upp
leiksýningar á félagsheimilinu Melum í Hörgárdal sem er lítið en hlýlegt
hús sem var byggt árið 1934 og tekur rúmlega 100 manns í sæti og hafa
þær sýningar getið sér gott orð til að mynda Með fullri reisn sem var
sett upp árið 2011 og síðan í fyrra Í fylgd með fullorðnum þannig að það
verður enginn svikinn af heimsókn á Mela.

Melar eru rúma 20 km frá Akureyri. Húsið opnar
hálftíma fyrir sýningu og er sýningin sjálf um það bil tvær klukkustundir.

Þorleifur Aron, kallaður Doddi, fráskilinn karlmaður á fimmtugsaldri og Óli Gunnar, yngri bróðir hans hittast til að horfa á alla leiki Manchester United saman í sófanum. Leikir enska liðsins er fastinn sem gefur lífi þeirra lit en einnig sá tími sem þeir geta eytt saman og fengið frið frá amstri dagsins. Yfir leiknum fá tilfinningar þeirra lausan tauminn og í gegnum leikinn fá þeir útrás auk þess sem óhófleg drykkja þeirra er réttlætanleg.

Þennan tiltekna laugardag sem verkið gerist bregður út af vananum er Benedikt Hafberg, hinn nýji kærasti barnsmóður Dodda ásamt söngvaranum Valdimar bætast óvænt við hópinn að horfa á leikinn. Spennan innan sem utan vallar eykst sem því nemur og úr verður óútreiknanleg atburðarás sem spannar 90 mínútur. Því líkt utan vallar sem innan þá getur allt gerst í heimi knattspyrnunnar.
Óbærilegur léttleiki knattspyrnunnar er sýning fyrir alla sem elska og hata fótbolta.

Leikstjóri: Viktoría Blöndal
Leikarar: Albert Halldórsson, Ólafur Ásgeirsson, Starkaður Pétursson, Sveinn Ólafur Gunnarsson, Valdimar Guðmundsson.
Tónlist: Valdimar Guðmundsson
Handrit: Sveinn Ólafur Gunnarsson & Ólafur Ásgeirsson
Hugmynd: Albert Halldórsson, Ólafur Ásgeirsson, Viktoría Blöndal.
Aðstoð við handrit: Sviðslistahópurinn Alltaf í boltanum
Sviðsmynd & búningar: Sólbjört Vera Ómarsdóttir
Lýsing Ásta Jónína Arnardóttir og Juliette Louste
Myndbönd: Ásta Jónína Arnardóttir
Dramatúrg: Lóa Björk Björnsdóttir
Sviðshreyfingar: Erna Guðrún Fritzdóttir
Starfsnemi: Ragnhildur Birta.
Leikarar á upptöku: Birgitta Birgisdóttir, Kjartan Darri Kristjánsson.

Leikfélag Húsavíkur æfir verkið Ávaxtakörfuna um þessar mundir. Verkið er eftir Kristlaugu Maríu Sigurðardóttur og tónlistin er samin af Þorvaldi Bjarna Þorvaldssyni. Margir þekkja Ávaxtakörfuna þar sem aðeins ávextir mega búa en þó leyfist einu litlu jarðarberi að dvelja þar, með því skilyrði að sjá um að allt sé hreint og fínt í körfunni. En þegar gulrót birtist allt í einu í körfunni fer allt á annan endann.

Alls taka níu leikarar þátt í sýningunni og fjögurra manna hljómsveit. Þarna eru á ferðinni bæði þaulreyndir leikarar og tónlistarmenn og aðrir sem eru að stíga sín fyrstu spor á sviðinu í gamla Samkomuhúsinu. Leikstjórinn, Valgeir Skagfjörð er að vinna með Leikfélagi Húsavíkur í fyrsta sinn. Frumsýning verður laugardaginn 4. mars.

Draumaþjófurinn er glænýr íslenskur fjölskyldusöngleikur eftir Björk Jakobsdóttur (handrit) og Þorvald Bjarna Þorvaldsson (tónlist), sem hrífur bæði börn og fullorðna. Verkið er byggt á vinsælli bók eftir Gunnar Helgason. Leikstjóri er Stefán Jónsson. Risabrúður gera Charlie Tymms og Ilmur Stefánsdóttir leikmyndahöfundur.

Æsispennandi þroskasaga, með litskrúðugum og skemmtilegum persónum, þar sem tekist er á við margt sem skiptir okkur svo miklu máli í dag. Sagan birtist hér í sannkallaðri stórsýningu með grípandi lögum, miklu sjónarspili og óviðjafnanlegum dansatriðum.

Stórsýning þar sem öllu er tjaldað til

Í Draumaþjófnum hverfum við inn í litríkan, spennandi og stórhættulegan söguheim sem á engan sinn líka! Hetjan okkar hún Eyrnastór Aðalbarn Gullfalleg Rottudís – eða bara Eyrdís – þarf að taka á öllu sínu og uppgötva hugrekkið innra með sér þegar líf hennar umbreytist á svipstundu.

Í Hafnarlandi er allt eins og það á að vera og rotturnar þekkja sinn sess í lífinu: Safnarar safna mat, Njósnarar njósna, Bardagarottur halda óvinum frá og Étarar éta og hafa það gott. Efst í virðingarstiganum gnæfir Skögultönn foringi sem öllu ræður. En daginn sem Eyrdís dóttir Skögultannar gerir uppreisn tekur sagan óvænta stefnu. Rottuprinsessan litla neyðist til að flýja inn í Borgina þar sem hættur eru á hverju strái og framandi rottur leika lausum hala. Sjálfur Draumaþjófurinn er sendur til að bjarga henni – eða til að deyja!

Gunnar Helgason þarf ekki að kynna, en hann hefur á undanförnum árum sent frá sér hverja metsölubókina á fætur annarri fyrir börn og unnið til bæði Íslensku bókmenntaverðlaunanna og Bókaverðlauna barnanna.

Leikfélag Keflavíkur setur upp glænýju revíuna Suðurnesja Svakasýn!

Revían er skrifuð af nokkrum meðlimum leikfélagsins og leikstjórn er í höndum Eyvindar Karlssonar. Í revíunni er litið yfir það sem gerst hefur á Suðurnesjum í þjóðfélaginu síðustu misseri ásamt almennum grínsketsum um daglegt amstur. 

Það er tilvalið að skella sér í leikhús og gleyma vandræðum lífsins með einu góðu hláturskasti

Leikdeild Eflingar frumsýndi á dögunum söngleikinn góðkunna Gauragang, eftir Ólaf Hauk Símonarson í leikstjórn Jennýjar Láru Arnórsdóttur og tónlistarstjórn Péturs Ingólfssonar. Tónlistin í verkinu er eftir meðlimi í Nýdönsk.
Leikritið er sýnt í félagsheimilinu Breiðumýri í Reykjadal og er það sett upp á nýstárlegan hátt þar sem leikið er í miðjum salnum en áhorfendur sitja allt í kring. Að venju sitja leikhúsgestir við lítil kaffiborð og gefst kostur á að kaupa kaffi og vöfflur af Kvenfélagi Reykdæla fyrir sýningu og í hléi.

Miðinn kostar 3500 kr á fullu verði en afsláttur er veittur þeim yngri en 16 ára, eldriborgurum og öryrkjum. Þá gefst félagsmönnum í Framsýn, Þingiðn og Starfsmannafélagi Húsavíkur kostur á að fá afsláttarmiða hjá sínum stéttarfélögum áður en komið er á leiksýningu og fá þannig 1000 kr. afslátt.

Húsið opnar 30 mínútum fyrir sýningu en fyrir miðapantanir. Fyrir nánari upplýsingar er hægt að hringja í síma 618-0847, senda tölvupóst á netfangið umfefling@gmail.com eða senda skilaboð í gegnum Facebook.

Næstu sýningar
Sun. 19. feb kl. 20:30 UPPSELT
Þri. 21. feb. kl. 20:30
Sun. 26. feb kl. 20:30
Fös. 3. mars kl. 20:30
Lau. 4. mars kl. 20:30
Sun. 5. mars kl. 16:00
Sun. 12. mars kl. 20.30

Leikritið Prinsinn, eftir Maríu Reyndal og Kára Viðarsson, var frumsýnt í Frystiklefanum á Rifi á síðasta ári. Nú er verkið tekið til sýninga í Þjóðleikhúsinu í febrúar og mars en það byggir á reynslu Kára sem horfðist í augu við það sautján ára gamall að eiga von á barni. En hversu áreiðanlegt vitni er maður í sinni eigin sögu? Er hægt að muna hlutina rétt?

Í kjölfar frumsýningar á Rifi hélt leikhópurinn í vel heppnaða leikferð sem teygði anga sína víða um land. Nú er hins vegar komið að því að leikhúsunnendur á höfuðborgarsvæðinu fái tækifæri á að sjá sýninguna. Prinsinn er hjartnæmt og fyndið nýtt íslenskt leikrit, byggt á sönnum atburðum, sem talar beint til okkar.

Þegar maður á fertugsaldri bíður í ofvæni eftir því að barn hans komi í heiminn fara atburðir sem áttu sér stað tveimur áratugum fyrr fara að sækja á hann. María Reyndal leikstýrir sýningunni, en auk Kára leika þau Sverrir Þór Sverrisson (Sveppi), Sólveig Guðmundsdóttir og Birna Pétursdóttir í sýningunni.

Prinsinn er alveg örugglega langbesta sjoppan undir Jökli, og það er þar sem hlutirnir gerast, að nóttu sem degi – sérstaklega ef maður vinnur í sjoppunni og er með lyklana!

17 ára menntaskólastrákur er staddur á Laugaveginum ásamt vini sínum þegar síminn hringir. Sæta stelpan sem vinnur á Prinsinum er í símanum. „Ég er ólétt. Þú ert að verða pabbi.“ Hvernig getur maður orðið pabbi sautján ára, og mamman bara sextán? Er framtíðin í rúst?

Eitt vinsælasta leikskálds og handritshöfundur Breta Mike Bartlett á heiðurinn af verkinu Samdrættir sem frumsýnt verður í Tjarnarbíói föstudaginn 10. febrúar næstkomandi.

Í aðalhlutverkum eru leikkonurnar Þórunn Lárusdóttir og Íris Tanja Flygenring.

Í verkinu Samdrættir eftir Mike Bartlett mætast tvær konur, framkvæmdastjóri fyrirtækis og starfskraftur hennar, Emma. Þegar Emma telur sig vera ástfangna af Darren sakar yfirmaður hennar hana um brot á starfsmannareglum sem fela í sér að ekkert rómantískt eða kynferðislegt megi eiga sér stað á milli samstarfsfólks. Þegar Emma verður ólétt er komin upp krísa og leysa þarf vandamálið.

Samdrættir er hárbeitt ádeila á Mike Bartlett þar sem áhorfendum er boðið að vera fluga á vegg á starfsmannafundum Emmu og framkvæmdastjóra sem fer óvenjulegar leiðir og út fyrir öll mörk í stjórnunarháttum sínum sem verður til þess að mannvonska, grimmd og afmennskun fer fram í skjóli fyrirtækjastefnu, verkferla og vinnureglna.
Alls verða fimm sýningarkvöld á Samdráttum þann 10. Febrúar, 19. Febrúar, 23. Febrúar, 5. Mars og 12. Mars.

Sýningin er styrkt af menningarráðuneytinu með styrk úr sviðslistasjóði.

ATHUGIР– Verkið er upplifunarverk í tveimur hlutum.

Fyrri hluti er í formi hljóðverks sem hefst kl. 18:30 – nánari upplýsingar eru sendar í tölvupósti til gesta eftir miðakaup.
Seinni hluti verksins hefst kl. 20:00 í Borgarleikhúsinu.

Góða ferð inn í gömul sár er nýtt verk eftir Evu Rún Snorradóttur sem var annað af leikskáldum Borgarleikhússins á síðasta leikári. Hér er á ferðinni stórmerkilegt upplifunarleikhús þar sem Eva Rún kafar í HIV faraldurinn sem geisaði hér á níunda og tíunda áratug síðustu aldar með viðtölum og heimildasöfnun. Áhorfandanum er boðið í ljóðrænt en magnað ferðalag gegnum heimsfaraldur sem, ólíkt þeim sem nýverið geisaði, var sveipaður skömm og þaggaður niður. Fyrri hluti sýningarinnar er hljóðverk sem gestir hlusta á í einrúmi en í síðari hluta er boðið á Nýja svið Borgarleikhússins þar sem lífinu er fagnað um leið og leitað er leiða til að heila sárin.

HIV faraldurinn á Íslandi hefur í raun ekki verið gerður upp í listheiminum og fórnarlamba hans ekki minnst með sambærilegum hætti og annarra sem látið hafa lífið af völdum sjúkdóma eða náttúruhamfara. Þetta er þó að breytast í nýjum heimi þar sem jaðarsettir hópar eru loksins að öðlast rödd. Samfélagslegt mikilvægi þess að geta litið söguna sem og samtímann með nýjum gleraugum nýrra tíma verður seint ofmetið.

Leikfélag VMA frumsýnir Bót og betrun eftir Michael Cooney fös. 3. febrúar. Verkið er sprenghlægilegur hurðafarsi um svindl, svik og pretti í félagslega kerfinu. Aðalpersóna verksins er Erik Swan sem eftir að hafa verið sagt upp í vinnunni, grípur til þess ráðs að svíkja peninga út úr félagslega kerfinu á mjög svo vafasömum forsendum. Hann ætlar að láta af svikunum en það reynist þrautin þyngri enda flæktur í ótrúlegan lygavef.
Leikfélag VMA hefur undanfarin ár sýnt mörg vinsæl leikrit og að þessu sinni er verkefnið kolbrjálaður hurðafarsi í leikstjórn hinnar margreyndu Sögu Geirdal Jónsdóttur.
Leikfélagið ráðleggur gestum að spenna magavöðvana þegar þeir mæta í Vasaleikhúsið í VMA.

Leikarar í sýningunni eru:
Örn Smári Jónsson
Franz Halldór Eydal
Katla Snædís Sigurðardóttir
Hanna Lára Ólafsdóttir
Sigríður Erla Ómarsdóttir
Hemmi Ósk Baldursbur
Sigrún Karen Yeo
Ingólfur Óli Ingason
Guðmar Gísli Þrastarson
Svavar Máni Geislason

Höfundur: Michael Cooney
Þýðing: Hörður Sigurðarson

Sýningar:
Frumsýning 3. febrúar klukkan 20:00
4. febrúar klukkan 20:00
10. febrúar klukkan 20:00
11. febrúar klukkan 20:00

Staðsetning: Verkmenntaskólinn á Akureyri
Húsið opnar alltaf 19:30