Verkið segir frá hjónunum Haraldi og Ingibjörgu. Haraldur hefur unnið hjá skattinum á lúsarlaunum svo lengi sem elstu menn muna en einn daginn finnur hann fulla tösku af peningum. Þetta er vanur maður sem sér að féð er illa fengið en hann ákveður að þetta sé hans tækifæri til betra lífs og fer beint í að panta flug aðra leiðina út í heim. En málið er vitaskuld ekki svo einfalt og heilmiklar flækjur, lygar og taugaveiklun fylgja í kjölfarið.

Athugið – strobe-ljós eru notuð í sýningunni.

Einn eigenda glæsilegs fjölbýlishúss í Reykjavík hefur ákveðið að breyta lúxusíbúð sinni í gistiheimili fyrir tuttugu arabíska hælisleitendur. Aðrir íbúar í húsinu eru mjög hlynntir fjölbreytileika en sætta sig ekki við að reglur húsfélagsins séu fótumtroðnar. Nú reynir á yfirvegun og samstöðu. Og hvar liggja mörk góðmennskunnar?

Marta og Heiðar bjóða nágrönnum sínum heim til að ræða málin yfir góðum ostum og víni. Undir kurteislegu yfirborðinu tekur brátt að glitta í lögmál frumskógarins og notaleg kvöldstund snýst upp í harðvítug átök þar sem villidýrseðlið brýst fram. Við viljum vera góð – en hversu langt erum við tilbúin að ganga?

Baltasar Kormákur og Ólafur Jóhann unnu saman að hinni stórbrotnu kvikmynd Snertingu og sameina nú krafta sína að nýju á Stóra sviði Þjóðleikhússins. Verk þeirra hafa heillað lesendur og áhorfendur um allan heim og sópað að sér verðlaunum.

Frábærlega vel skrifað og spennuþrungið leikrit, sem heldur þér í heljargreipum.

Væri lífið ekki auðveldara ef allt væri eins og í gamla daga? Það finnst Gunnu, sem hefur tekið þá ákvörðun ásamt Jonna eiginmanni sínum að lifa lífsstíl áranna 1950 – 1960. Hún eyðir deginum í að gera hreint á heimilinu svo allt sé í röð og reglu áður en húsbóndinn kemur heim þar sem ferskur kokteill, troðin pípa og hitaðir inniskór bíða hans í vel innréttaðri íbúðinni og hvað á maður að segja við mömmu sína sem barðist fyrir jafnrétti og er ekki par sátt við fyrirkomulagið?  Þau hjónin klæðast fiftís fötum og ísskápurinn er líka frá þeim tíma, sem væri kannski allt í lagi ef hann væri ekki alltaf að bila, því þótt flest hafi verið endingarbetra í gamla daga þá duga hlutir eins og bílar og ísskápar ekki að eilífu. Það getur verið dýrt að lifa á röngum áratug vegna alls viðhaldsins – og hvar á að kaupa föt sem passa lífsstílnum nema á internetinu? Hjónin verða því að svindla til að allt gangi upp.

Laura Wade er breskt leikskáld sem hefur skrifað á annan tug leikverka og er Darling, I´m Home þeirra þekktast og fékk hún fyrir það hin virtu Olivier leiklistarverðlaun árið 2019. Hún hefur einnig skrifað nokkur útvarpsleikrit fyrir BBC og er einn handritshöfunda sjónvarpsþáttaseríunnar Rivals hjá Disney+. Þetta er í fyrsta sinn sem verk eftir hana ef sett upp í íslensku leikhúsi. Ilmur Kristjánsdóttir þreytir hér frumraun sína sem leikstjóri og Akureyringurinn Vilhjálmur B. Bragason staðfærir og þýðir verkið.

Leikfélag Sauðárkróks undirbýr nú af krafti sýningu á leikritinu Óvitar eftir Guðrúnu Helgadóttur.

Verkið er einstaklega skemmtilegt og frumlegt – þar sem börn leika fullorðna og öfugt. Áhorfendur fá innsýn í hvernig börn skynja heim hinna fullorðnu og sjá oft hluti sem við sjálf tökum ekki eftir. Í gegnum söguna þróast fallegur og óvæntur vinskapur sem sprettur upp úr erfiðum aðstæðum.

„Þetta er lífleg og fjörug sýning með dýpri merkingu – sannkölluð fjölskyldusýning,“ segir leikstjórinn Eysteinn Ívar. Feykir ræddi við Eystein, sem hefur haft nóg fyrir stafni, enda styttist í frumsýningu sem er 10. október. Miðasalan er hafin og mikill áhugi – fyrstu tvær sýningarnar eru þegar uppseldar, svo það er um að gera að tryggja sér miða sem fyrst.

Miðasala í síma 849-9434

Söngleikurinn Moulin Rouge! gerist í París 1899 þar sem söngvaskáldið Christian kemur til borgarinnar í leit að innblæstri. Honum er tekið opnum örmum af bóhemum Montmartre sem vinna að söngleik sem þá dreymir um að verði settur upp í næturklúbbnum Moulin Rouge – Rauðu Myllunni. Christian slæst í lið með þeim en verður ástfanginn af stjörnu Myllunnar – hinni óviðjafnanlegu Satine, sem heillast af skáldinu unga. En gildi bóhemanna um frelsi, fegurð, sannleik og ást mega sín lítils í heimi þar sem peningar ráða og allt er falt. Klúbburinn er í fjárhagsvandræðum og eigandinn Harold Zidler sér engan annan kost en að leita til hins forríka og harðsnúna greifa af Monroth, jafnvel þó það kosti að Satine sjálf verði hluti af kaupunum.

Leikstjóri íslensku uppfærslunnar er Brynhildur Guðjónsdóttir. Tónlistarstjóri er Jón Ólafsson og þýðing er í höndum Braga Valdimars Skúlasonar. Uppsetning Borgarleikhússins á Moulin Rouge! söngleiknum verður stórbrotin upplifun fyrir augu, eyru og hjarta. Öllu verður til tjaldað hvað varðar leik- og hljóðmynd og besta sviðslistafólk landsins fengið til að flytja okkur inn í grípandi heim Rauðu Myllunnar í París 1899 í sýningu sem á sér enga líka í íslensku leikhúsi!

Hljómsveitin Eva var einu sinni up and coming framúrstefnu hljómsveit og sviðslistahópur en þarf nú að horfast í augu við raunveruleikann; andleg veikindi, dauðann, adhd greiningar, snemmbúið breytingaskeið og þá staðreynd að þær hafa ekki samið nýtt lag í fimm ár. Nú bretta þær upp ermarnar og segja fólkinu frá því sem á daga þeirra hefur drifið í þessum grátbroslega en kosmíska tónleik ennþá með þá von í hjartanu að veita áhorfendum varanlegt kaþarsis og jafnvel splunku nýju lagi. Verkið Kosmískt skítamix sem frumsýnt verður í Tjarnarbíó 17. október er ferðasaga vinkvenna og vinnufélaga í gegnum örmögnun og þá ómögulegu vinnu að skapa listaverk sem bjargar heiminum. 

Þær Sigríður og Vala eru bráðskemmtilegir viðmælendur sem hafa frá mörgu að segja. 

Aðstandendur:
Höfundar og flytjendur: Sigríður Eir Zophoníasardóttir og Vala Höskuldsdóttir, Dramaturg: Egill Andrason, Leikmynd og búningar: Rebekka Ingimundardóttir, Ljósahönnun: Hafliði Emil Barðason, Hljóðblöndun og tækni: Brett Smith, Ljósmyndun og videogerð: Björgvin Sigurðarson, Grafísk hönnun: Rakel Tómasdóttir, Framleiðsla: Hljómsveitin Eva í samstarfi við MurMur productions/Davíð Freyr Þórunnarson

Sýningin er styrkt af Sviðslistasjóði og Listamannalaunum

Einar Áskell er ósköp venjulegur strákur sem býr með pabba sínum í úthverfi, einhvers staðar í heiminum. Hann er ekki stór. Hann er ekki sterkur. En hann er hugrakkari en þú heldur! Bækurnar 26 um Einar Áskel, eða Alfons Åberg eins og hann heitir á sænsku, eru skrifaðar og myndskreyttar af Gunillu Bergström og hafa verið gefnar út á 45 tungumálum og selst í tæplega 20 milljónum eintaka.

Nú loksins gefst íslenskum leikhúsgestum á öllum aldri, einstakt tækifæri að njóta feðganna á leiksviði í glænýrri íslenskri leikgerð byggð á tveimur af þekktustu bókunum úr bókaflokknum sívinsæla.

Það er kominn morgunn og Einar Áskell þarf að drífa sig í skólann. En fyrst ætlar hann bara að klæða dúkkuna sína, laga bílinn, kíkja í stóru dýrabókina og… Er hann ef til vill að flýta sér of mikið og gera of mikið í einu? Inni í eldhúsi fer pabbi með spakmæli um að best sé að gera einn hlut í einu. En þegar á hólminn er komið, hver er það þá sem gerir of mikið í einu?      

Sýningin er um það bil 40 mínútur að lengd og án hlés. Hentar vel fyrir börn frá þriggja ára aldri.

Leiksýningin Engan asa, Einar Áskell, er byggð á bókunum Engan asa, Einar Áskell og Flýttu þér, Einar Áskell eftir Gunillu Bergström.

Frá þeim sem færðu okkur stórverkið Góðan daginn faggi, kynnir Stertabenda Skammarþríhyrninginn –  óþægilegasta en jafnframt fyndnasta verk ársins. 

„Hinsegin fólk er bara brand, ekki manneskja. Eins og Coca Cola. Við myndum aldrei segja að Coca Cola ætti að hafa tjáningarfrelsi.“

Woke er dautt og pólitískur réttrúnaður heyrir sögunni til. Skammarþríhryrningurinn, sem frumsýnt verður í Borgarleikhúsinu 4. október, er nýtt verk eftir leikhópinn Stertabendu. Verkið gerist við opnun sögusafns í fjarlægri framtíð þar sem við fylgjumst með hópi sérfræðinga reyna að púsla saman mynd af mannréttindaparadísinni sem eitt sinn var á Íslandi. Verkefni þeirra er afar flókið því bækurnar hafa allar verið brenndar, heimildirnar eru horfnar og mannlegur fjölbreytileiki utan strangrar tvíhyggju hefur verið bannaður og ritskoðaður úr sögunni. Þau reyna þó eftir bestu getu að svara aðkallandi spurningum: Hvað í ósköpunum var Pride? Hvers konar te drukku svokallaðar dragdrottningar? Hvar fór innræting barna fram? Hver var þessi Hán?

Skammarþríhyrningurinn sýnir heiminn sem er handan bakslagsins, heim án hinseginleikans, þar sem hann er framandi hugmynd sem tilheyrir fortíðinni. Við skrif á verkinu lagðist leikhópurinn m.a. í djúpa rannsóknarvinnu á umræðum og orðræðu um mannréttindi trans fólks og hinsegins samfélagsins. Sumar senur verksins eru hreinlega orðréttar upp úr athugasemdum á samfélagsmiðlum og viðtölum síðustu mánaða. Leikhópurinn Stertabenda hefur sérhæft sig í að sviðsetja hinsegin fagurfræði þar sem húmor og leikur ráða för í vægðarlausri krufningu á samtímanum. Forsprakkar hópsins, þau Gréta Kristín Ómarsdóttir og Bjarni Snæbjörnsson, hafa sérhæft sig í listrænum verkefnum sem auka sýnileika hinsegin fólks, spyrja krefjandi spurninga og stuðla að umræðu og fræðslu um málefni hinsegin fólks. Síðasta sýning hópsins, Góðan daginn faggi, var sýnd í tvö ár og vakti mikla athygli fyrir afhjúpandi innsýn inn í hinseginleikann.

Aðstandendur: 

Höfundur: Leikhópurinn Stertabenda Leikstjóri: Gréta Kristín Ómarsdóttir Leikmynd og búningar: Eva Signý Berger Dramatúrg: Egill Andrason Tónlist: Axel Ingi Árnason í samstarfi við Egil Andrason Ljósahönnun: Ólafur Ágúst Stefánsson Dans- og sviðshreyfingar: Cameron Corbett Leikgervi: Ray Milano Leikarar: Árni Pétur Guðjónsson, Bjarni Snæbjörnsson, Embla Guðrúnar-Ágústsdóttir, Fannar Arnarsson, Kristrún Kolbrúnardóttir og Sindri Sparkle. Framleiðendur: Davíð Freyr Þórunnarson og Ragnheiður Maísól Sturludóttir

Sóley kemur heim af djamminu um sumarnótt og finnur ókunnugan mann liggjandi meðvitundarlausan við útidyrnar. Hún og faðir hennar ákveða að skjóta skjólshúsi yfir manninn en ekki getur þau órað fyrir afleiðingunum.

Annar maður skýtur upp kollinum, vill þakka feðginunum fyrir hjálpsemina og býður föður Sóleyjar að óska sér einhvers. Hann lofar því að óskin muni rætast, hver sem hún er. Faðirinn eygir loksins von um að geta komið sér upp úr skuldasúpunni. En ekki er allt gull sem glóir.

Nýtt íslenskt leikrit sem var sýnt hjá Royal Shakespeare Company.

Kolbrún Björt Sigfúsdóttir hefur haslað sér völl sem leikskáld og leikstjóri á Bretlandi og víðar allt frá útskrift úr meistaranámi í leikstjórn árið 2013. Leikritið Þetta er gjöf vísar í goðsöguna um Mídas, en hún birtist okkur hér í reykvískum veruleika. Verkið var sýnt hjá hinu rómaða leikhúsi Royal Shakespeare Company 2023 í leikritaröðinni „37 Plays“ og rataði á lista Women’s Prize for Playwriting. Verkið var einnig sýnt hjá Pitlochry Festival Theatre í Skotlandi í sumar.

Laugardagurinn 27. september komandi mun skarta vestfirskri list en þó með enskum uppruna. Listin enska er öll úr ranni mesta leikskálds allra tíma sjálfs William Shakespeare en vestfirska hliðin er í raun þreföld. Því alls hafa þrír Vestfirðingar snarað verkum skáldins yfir á okkar ilhýra. Af því tilefni verður því haldin í fyrsta sinni Vestfirski Shakespearedagurinn. Það eru Kómedíuleikhúsið og Hrafnseyri menningarsetur sem standa að hátíðardegi þessum sem verður einsog í upphafi var getið haldin laugardaginn 27. september. Um daginn verður boðið uppá fyrirlestra og málþing um skáldið og vestfirsku þýðarna á Hrafnseyri frá kl.13. – 17. Um kveldið verður svo boðið uppá leiklestur úr verkum skáldsins í Kómedíuleikhúsinu í Haukadal Dýrafirði. Aðgangur er ókeypis og öll eru velkomin.

Dagskrá málþings:

Setning – Margrét Hrönn Hallmundsdóttir, starðarhaldari á Hrafnseyri, og er hún jafnframt málþingsstjóri.
Hamlet var ekki til á Íslensku á Bíldudal svo ég varð bara að snara því, já til að geta lesið það. – Elfar Logi fjallar um alþýðufræði- og listamanninn Ingivald Nikulásson.
Hvers vegna Shakespeare – Jón Viðar Jónsson, leikhúsfræðingur, fjallar um skáldið.

Hlé þar sem boðið verður uppá hjónabandssælu og kaffi.

Tónlistaratriði Elin Sveinsdóttir og Sara Hrund Signýjardóttir flytja 3 lög er sótt eru í sagnaarf skáldsins William Shakespeare.
Óþelló Matthíasar – Ingibjörg Þórisdóttir.
Með kveðju, Shakespeare – Skúli Gautason.

Stutt kaffihlé

Shakespeare Pallborð – Margrét stýrir pallborði um skáldið William Shakespeare til spjalls og svara verða þau Jón Viðar Jónsson, Ingibjörg Þórisdóttir, Skúli Gautason og Elfar Logi Hannesson.

Málþingslok. Dagskráin heldur svo áfram í Kómedíuleikhúsinu í Haukadal Dýrafirði um kveldið eða kl.20.00. Þar sem boðið verður uppá leiklestur úr verkum William Shakespeare í þýðingu Vestfirðinganna Ingivalds Nikulássonar og Matthíasar Jochumssonar. Flytjendur eru vestfirsku leikararnir Elfar Logi Hannesson og Elín Sveinsdóttir.