Blómin á þakinu er byggt á bók Ingibjargar Sigurðardóttur og Brians Pilkington. Leikstjórn Agnes Wild.
Undurfalleg og heillandi ný leiksýning fyrir yngstu börnin, byggð á bók sem hefur notið mikilla vinsælda allt frá því að hún kom fyrst út árið 1985. Barnabókin Blómin á þakinu hefur unnið sér sess sem sígild perla innan íslenskra barnabókmennta.
Þegar Gunnjóna þarf á gamals aldri að flytja úr sveitinni sinni í borg stendur hún frammi fyrir ýmsum áskorunum sem fylgja því að aðlagast nýjum heimkynnum. Í fjölbýlishúsinu sem hún flytur í býr forvitið barn sem fylgist með óvenjulegum aðferðum gömlu konunnar við að búa sér nýtt heimili, enda er engu líkara en Gunnjóna ætli að flytja sveitina með sér til borgarinnar.
„Bara ömmur mega fara upp á þak“
Listrænir aðstandendur sýningarinnar, þær Agnes, Eva Björg og Sigrún, hafa getið sér gott orð fyrir hrífandi barnasýningar á vegum leikhópsins Miðnættis og hlotið ýmis verðlaun og viðurkenningar fyrir framlag sitt til barnamenningar. Þjóðleikhúsið hefur nú fengið þessar þrjár listakonur til að skapa nýja barnasýningu þar sem hugmyndaflugið og leikgleðinni er gefinn laus taumur.
Ariasman hefur hlotið góðar viðtökur frá frumsýningu.
Kómedíuleikhúsið í Haukadal Dýrafirði, dalnum þar sem engin býr, tekur að vanda þátt í páskahátiðinni fyrir vestan. Á fjölunum verða tvær leiksýningar úr smiðju leikhússins. Fjölskylduleikritið ástsæla og alvestfirska Dimmalimm eftir Bílddælinginn Mugg hefur notið gífurlegra vinsælda frá því það var frumsýnt í Þjóðleikhúsinu árið 2019. Dimmalimm verður sýnt á Skírdag fimmtudaginn 17. apríl kl.14.00 og einnig á laugardag 19. apríl kl.14.00.
Kynningarmyndband um Dimmalimm.
Sýning sumarsins liðna í Kómedíuleikhúsinu Haukadal var Ariasman. Um er að ræða sögulegt og blóðugt leikverk er fjallar um hin hrottalegu Baskamorð fyrir vestan. Ariasman hefur hlotið afbragðs góðar viðtökur og var nú síðast sýnt tvívegis fyrir uppseldu Tjarnarbíó í Reykjavík.
Miðasala á sýningar leikhúspáska Kómedíuleikhússins stendur yfir í síma 891 7025. Einnig er hægt að kaupa miða á miðasöluvefnum midix.is
Leikfélag Hornafjarðar sýnir nú rokksöngleikinn Hárið.
Leikfélag Hornafjarðar, í samstarfi við Framhaldsskólann í Austur-Skaftafellssýslu, sýnir söngleikinn Hárið,. Leikstjóri sýningarinnar er Svandís Dóra Einarsdóttir, hreyfihönnuður er Sigga Soffía Níelsdóttir, tónlistarstjóri er Hörður Alexander Eggertsson, kórstjóri er Hrafnkell Karlsson, ljósahönnuður er Þorsteinn Sigurbergsson og búningahönnuður er Ágústa Margrét Arnardóttir. Að sýningunni koma 16 leikarar, sjö manna kór, fjögurra manna hljómsveit, aðstoðarleikstjóri, sýningarstjóri og þrír tæknimenn, auk fjölmargra velunnara leikfélagsins sem hafa lagt hönd á plóginn við leikmyndagerð, smíðavinnu, hár og förðun. Sýningarnar fara fram í Mánagarði, félagsheimili rétt utan bæjarmarka, sem hefur verið aðalsýningarsalur Leikfélags Hornafjarðar í fjölda ára.
Eins og segir í fréttatilkynningu frá leikfélaginu: „Rokksöngleikurinn Hárið eftir Gerome Ragni, James Rado og Galt MacDermot er þekktur fyrir framsækna nálgun sína á samfélagslegum málefnum. Verkið, sem endurspeglar hippamenningu og kynlífsbyltingu sjöunda áratugarins, setur á svið sögu hóps ungmenna í New York sem tekst á við stórar spurningar um stríð, frið og persónulegt frelsi. Verkið tekur á umdeildum málefnum eins og fíkniefnanotkun, kynhneigð og virðingarleysi fyrir þjóðartáknum, sem gerir það enn í dag að öflugum spegli samfélagslegra átaka. Söngleikurinn markaði tímamót í sögu tónlistarleikhúss með því að skilgreina nýja tegund rokksöngleiks. Þrátt fyrir að vera rúmlega hálfrar aldar gamalt, heldur verkið áfram að vekja spurningar um stríð, frið og persónulegt frelsi sem eru jafn mikilvægar í dag og þegar það var fyrst sett á svið.“
„Við hvetjum að sjálfsögðu alla til að leggja land undir fót og kíkja hingað til Hafnar í Hornafirði. Hér getur þú notið stórbrotinnar náttúru undir Vatnajökli, gist á hóteli, farið út að borða og skellt þér í leikhús.“
Miðaverð er 5.5000 kr og hægt er að panta miða í gegnum Facebook Messenger hjá leikfélaginu og í síma 898 6701 og 892 9354.
Leikfélagið Blönduóss hefur unnið markvisst að endurreisn félagins undanfarin ár og má segja að félagið sé að komast á frábært skrið núna. Leikfélagið setur nú á svið barnasýninguna Ferðina á Heimsenda eftir Olgu Guðrúnu Árnadóttur. Stór og flottur leikhópur á öllum aldri tekur þátt í sýningunni og er það hinn reyndi leikstjóri, Sigurður Líndal sem stýrir hópnum.
Ferðin á heimsenda er barnaleikrit sem fjallar um ferðalagið á Heimsenda með verndargripinn geislaglóð sem þarf að fylla af sólarorku svo ekki fari illa fyrir álfaheiminum. Leikritið er fullt af ævintýralegum persónum, álfum, galdrakall, ömmu og hetjum. Verkið er sérstaklega skapað fyrir börn og til að börn geti notið þess að vera í leikhúsi og hentar allri fjölskyldunni.
Leikfélagið lofar skemmtilegri sýningu og vonast til að sjá sem flesta!
Sýnt verður í Félagsheimilinu á Blönduósi sem hér segir: Fimmtudagur 3.apríl kl: 19:00 – frumsýning Föstudagur 4.apríl kl: 20:00 – 2. sýning Sunnudagur 6.apríl kl: 14:00 – 3. sýning Þriðjudagur 8.apríl kl: 17:00 – 4.sýning
Fram og aftur var frumsýnt hjá Leikfélagi Dalvíkur.
Leikfélag Dalvíkur frumsýndi leikritið Fram og aftur eftir Sean Grennan í íslenskri þýðingu og leikstjórn Dominique Sigrúnardóttur, föstudaginn 21 mars.
Í staðfærðri þýðingu verksins fjallar það um ungan mann sem vinnur á bar á Dalvík árið 1986. Eitt kvöldið fær hann óvænta heimsókn frá eldri manni sem býður honum peninga upphæð sem hann á erfitt með að neita, fyrir það eitt að fá að sitja eftir lokun og fá sér drykk. Tilboðið hljómar vel en eftir því sem líður á kvöldið fara grunsamlegir hlutir að koma í ljós og óvæntur gestur flækir hlutina enn fremur. Fram og aftur fjallar um stóru ákvarðanirnar sem við tökum í lífinu, afleiðingar þeirra og væntingar okkar til fólksins sem tekur þær með okkur.
Verkið hefur ekki áður verið sett upp og sýnt hér á landi, og það var mikil tilhlökkun hjá leikfélögum á Dalvík að sýna áhorfendum þetta skemmtilega verk.
Eins og Rómeó og Júlía okkar tíma hefur ástarsaga kúrekanna Ennis og Jacks snert við hjörtum áhorfenda um allan heim.
Verkið byggir á samnefndri Pulitzerverðlauna smásögu Annie Proulx og síðar gerði kvikmyndaleikstjórinn Ang Lee rómaða kvikmynd eftir sögunni.
Hér segir af kúrekunum Ennis og Jack sem hittast fyrir tilviljun þegar þeir vinna við að smala búfé á fjöllum í Bandaríkjunum um miðbik síðustu aldra. Þrátt fyrir gríðarlega fordóma samfélagsins dragast þeir hvor að öðrum og reyna saman að höndla ást og frelsi sem er í fullkominni mótsögn við ofbeldið og erfiðleikana í umhverfi þeirra.
Leikstjórinn Valur Freyr Einarsson fær til liðs við sig tvo af fremstu leikurum Borgarleikhússins í hlutverk Ennis og Jacks auk þess sem lifandi tónlist sýningarinnar er í höndum Guðmundar Péturssonar og Þorsteins Einarssonar.
Leikfélag Fjölbrautaskólans í Garðabæ sýnir Gulleyjuna.
Þegar Jim Hawkins leggur í svaðilför til að kanna heimsins höf er hann spenntur fyrir komandi ævintýrum, en ekki er allt sem sýnist. Skyldu sjóræningjar gera vart við sig? Er laumufarþegi um borð? Hversu skrýtinn er furðufuglinn sem hann hittir?
Gulleyjan er stórskemmtilegur og bráðfyndinn söngleikur sem nær til allra aldurshópa! Með sínum æsispennandi söguþræði, glæsilegu dansatriðum og fallegu lögum heldur Gulleyjan áhorfendunum á tánum. Söngleikurinn, sem er byggður á sígildu ævintýrasögunni Treasure Island eftir Robert Louis Stevenson, er eftir þá Sigga Sigurjónsson og Karl Ágúst Úlfsson og tónlistina samdi Þorvaldur Bjarni Þorvaldsson. Leikstjórn er í höndum meistarans Gunnars Björns Guðmundssonar, danshöfundur er Aníta Rós Þorsteinsdóttir og söngstjóri er Gunnlaugur Bjarnason.
Hvað er Góðgerðarsýning? Allur ágóði af miðasölu á góðgerðarsýninguna mun renna til The Ocean Cleanup, sem eru Hollensk samtök sem hafa það að markmiði að tæma höfin af plasti. Þar sem Gulleyjan fjallar um sjóræningja á hafi úti sem væru eflaust óánægðir með þá þróun sem hefur orðið í plastmengun finnst okkur við hæfi að nýta góðgerðarsýninguna í að gera þeim til geðs.
Leikfélag Keflavíkur frumsýnir Glanna glæp í Latabæ.
Leikfélag Keflavíkur frumsýnir Glanna glæp í Latabæ sunundaginn 9. mars í Fumleikhúsinu í Reykjanesbæ. Leikgerðin er eftir þá Magnús Scheving og Ssigurð Sigurjónsson með tónlist Mána Svavarssonar og söngtextum eftir Karl Ágúst Úlfsson. Leikstjóri er Brynja Ýr Júlíusdóttir.
Íþróttaálfurinn hefur kennt öllum bæjarbúum hvað það er mikilvægt að borða íþróttanammi og hreyfa sig reglulega, því þannig nær maður árangri. Íþróttaálfurinn þarf skyndilega að yfirgefa bæinn og þá birtist Rikki ríki í bænum. Hann hlýtur að vera alveg rosalega ríkur…eða hvað? Nei! Rikki ríki er nefnilega Glanni glæpur í dulargervi. Glanni glæpur reynir hvað sem hann getur til að fá bæjarbúa til að hætta að rækta garðana sína, hætta að borða íþróttanammi og hætta að hreyfa sig. Nú þurfa Solla stirða, Halla hrekkjusvín, Siggi sæti, Goggi mega, Nenni níski, Maggi mjói og allir aðrir í Latabæ að sameina krafta sína til að láta Glanna glæp ekki plata sig…í enn eitt skiptið!
Leikstjóri: Brynja Ýr Júlíusdóttir Leikgerð: Magnús Scheving og Sigurður Sigurjónsson Tónlist: Máni Svavarsson Textahöfundur: Karl Ágúst Úlfsson
Leikfélag Ölfuss mun brátt hefja starfsemi að Selvogsbraut 4.
Leikfélag Ölfuss rís nú úr dvala og boðar til opins fundar til ad kynna starfsemi sína. Félagið hefur á síðustu misserum verið ad setja upp glænýja aðstöðu og nú er komið ad því að hefja störf í Leikhúsinu ađ Selvogsbraut 4. Öllum sem hafa áhuga á því að starfa med félaginu er hér með boðið á kynningarfund fimmtudaginn 13. mars kl. 20.00. Framundan eru spennandi verkefni. Nú á vormánuðum verður haldin stuttverkahátíð þar sem fólki gefst tækifæri til ad skrifa, leika og leikstýra ásamt öllu sem fylgir því að setja upp leiksýningu. Hlökkum til ad sjá sem flesta á opnum fundi þann 13. mars að Selvogsbraut 4 (á bak við Heima Bistro).
Sex í sveit verður frumsýnt 28. febrúar hjá Leikdeild UMFG.
Leikdeild UMFG leggur þessa dagana lokahönd á undirbúning fyrir sýningar á hinu geysivinsæla leikverki Sex í sveit. Leikstjórn er í höndum Bjarkar Jakobsdóttur. Frumsýnt verður í Árnesi föstudagskvöldið 28. febrúar kl. 20:00. Verkið sem er eftir Marc Camoletti í íslenskri þýðingu og staðfæringu Gísla Rúnars Jónssonar, er bráðskemmtilegur farsi sem gerist í íslenskum sumarbústað þar sem óvæntar uppákomur, flækjur og misskilningur valda ótal vandræðalegum – og hlægilegum – aðstæðum. Leikararnir sex geta vart beðið með að stíga á svið og tryggja áhorfendum kvöld fullt af hlátri og góðri stemmningu. Björk Jakobsdóttir er reyndur leikstjóri og leikkona sem hefur komið víða við í leikhúsinu. Hún hefur leikstýrt fjölmörgum sýningum fyrir bæði börn og fullorðna og lagt sérstaka áherslu á að skapa líflega og kraftmikla sýningu sem höfðar til breiðs hóps áhorfenda. Með Björk við stýrið er tryggt að hláturinn verður aldrei langt undan.
Sýningar verða sem hér segir: Föstudaginn 28. Feb kl. 20 Sunnudaginn 2. Mars kl. 20 Þriðjudaginn 4. Mars kl. 20 Laugardaginn 8. Mars kl. 20 Þriðjudaginn 11. Mars kl. 20
Sýningin er styrkt af Uppbyggingarsjóði Suðurlands. Leikdeildin hvetur alla til að láta sjá sig í Árnesi til að kitla hláturtaugarnar í góðum félagsskap og sprúðlandi stemmningu.
