Manndýr er nýtt barna- og þátttökuverk eftir Aude Busson sem frumsýnt verður 13. mars nk. í Tjarnarbíó. Verkið skoðar hlutverk manneskjunnar í heiminum með augum barna, en verkið og hljóðmynd þess er að miklu leyti byggt á viðtölum Aude við börn.

– Þegar maður hugsar út í það, þá er maður bara til af því að maður er til…

– Eða til, til að gefa dýrunum?

– Til… til að fjölga ormunum?

– Eða erum við til fyrir heiminn?

– En aftur á móti, þá endist jörðin ekki að eilífu, þannig að ef maður hugsar úti það, þá getur maður ekki bara haldið áfram að fæðast, fæðast og fæðast…

Af hverju er maðurinn til? Af hverju er barn til? Hvað gera þau og til hvers? Þessum spurningum velta börnin í Manndýr fyrir sér. Svör þeirra og vangaveltur eru einlæg, djúp, alvarleg og oft á tíðum sprenghlægileg.

Manndýr er á mörkum þess að vera leikverk og innsetning. Í rýminu er manndýr, sem Aude leikur, í tilvistarkreppu að reyna að púsla sögu sinni saman á ný og skilja tilgang sinn í heiminum. Á milli leikrænna atriða eru börn jafnt sem fullorðnir hvattir til að taka þátt og leika saman. Gestum er boðið inn í heim þar sem hægt er að upplifa með eyrum, augum og höndum, sjálf eða í samvinnu. Við gefum okkur tíma til að spyrja spurninga sem fá svör eru við og dvelja í heimi þar sem börn segja alla söguna.

Aude Busson er sviðslistarkona sem hefur áhuga á að skapa sýningar og viðburði sem byggja á þátttöku áhorfenda og þá sérstaklega með samvinnu barna og fullorðinna. Síðasta verk hennar “Ég elska Reykjavík” var fjölskyldugöngsýning og var tilnefnd til Grímuverðlauna.

Sigríður Sunna Reynisdóttir er sviðshöfundur og hönnuður. Hún hefur unnið leikmyndir, búninga og leikbrúður fyrir fjölda sýninga í Þjóðleikhúsinu, Borgarleikhúsinu, í Tjarnarbíó og víðar síðustu ár, auk þess að framleiða eigin sviðsverk. 

Björn Kristjánsson eða Borko er tónlistarmaður og grunnskólakennari. Hann hefur unnið bæði í leikhúsi og í tónlistarheiminum í tæp 20 ár og leitt fjölda tónlistarverkefna með börnum.

Leikfélag Hörgdæla æfir af fullum krafti leiksýninguna Í fylgd með fullorðnum í húsnæði félagsins að Melum þessa dagana. Í fylgd með fullorðnum er lífleg sýning sem segir frá gleði og sorgum persóna sem finna má í textum Bjartmars Guðlaugssonar og skipar tónlist hans ríkan sess í sýningunni. Leikritið er skrifað af Pétri Guðjónssyni sem jafnframt leikstýrir verkinu.

Frumsýning verður fimmtudaginn 10. mars en uppselt er á fyrstu þrjár sýningarnar.

Verkið byggir á lögum og textum Bjartmars Guðlaugssonar eins og áður sagði og er um alheimsfrumflutning að ræða. Lög Bjartmars eru mörgum kunn og Hörgdælir lofa miklu fjöri og skemmtun. 17 leikarar ásamt hljómsveit munu stíga á svið, sumir alvanir en aðrir að stíga sín fyrstu skref. Þar fyrir utan er fjöldi manns sem kemur að uppsetningunni.

Sýningar eru fyrirhugaðar í mars og apríl. Leikfélag Hörgdæla og fyrirrennar þess hafa sett upp upp leiksýningar að Melum um áratugaskeið við góðan orðstír.

• Leikritið var valið úr 150 leikverkum sem bárust þegar Þjóðleikhúsið kallaði eftir leikritum og hugmyndum að leikritum fyrir börn. 
• Ragnhildur Gísladóttir semur tónlistina  en meðal fyrri barnaverka sem hún hefur samið tónlist fyrir eru Píla Pína og Glámur og Skrámur í Sælgætislandi. 
• Sara Martí leikstýrir verkinu en þar er brugðið á leik með minnið um umskiptingana úr þjóðsögunum.

Laugardaginn 12. mars frumsýnir Þjóðleikhúsið Umskipting, nýtt barnaleikrit eftir einn ástsælasta barnabókahöfund landsins, Sigrúnu Eldjárn. Í verkinu bregður hún á frumlegan og sniðugan hátt á leik með minnið um umskiptinga úr þjóðsögunum okkar. Sara Martí leikstýrir og tónlistina semur Ragnhildur Gílsadóttir. Umskiptingur kemur einnig út sem bók á vegum Forlagsins um þessar mundir.

Það er alltaf gleðifregn þegar nýtt íslenskt barnaleikrit ratar á fjalir leikhúsanna og ekki er það verra að verkið sé eftir einn af vinsælustu höfundum barnaefnis á umliðnum áratugum, Sigrúnu Eldjárn. Í verkinu Umskiptingur bregður hún á frumlegan og sniðugan hátt á leik með minnið um umskiptinga úr þjóðsögunum okkar. Allt frá því að fyrsta bók Sigrúnar, Allt í plati, kom út árið 1980 hefur hún fléttað texta og myndir saman í bókum sínum á allan mögulegan máta og oft mjög frumlega. Þetta er í annað sinn sem verk Sigrúnar ratar á fjalir Þjóðleikhússins en sýningin Kuggur og leikhúsvélin var sett upp árið 2014 og naut mikillar hylli. 

Ævintýralegt leikrit um tröll og menn, ofurhetjur, smákríli ogdreka 
Í Umskiptingi segir frá systkinunum Sævari og Bellu. Einu sinni sem oftar þarf Sævar að gæta litlu systur sinnar, sem satt að segja getur verið alveg ferleg frekjudolla! En Bella er alveg einstaklega krúttleg og þegar tröllskessa með óslökkvandi fegurðarþrá sér hana ákveður hún að skipta á henni og hinum stórgerða, uppátækjasama og hjartahlýja syni sínum, tröllastráknum Steina. Nú eru góð ráð dýr, en í ljós kemur að hjálpar má vænta úr ólíklegustu áttum! 

Sara Martí Guðmundsdóttir er leikstjóri verksins en hún hefur komið víða við frá því að hún útskrifaðist sem leikari úr Listaháskólanum árið 2007. Sara hefur leikið bæði í Þjóðleikhúsinu og Borgarleikhúsinu og látið til sín taka í sjálfstæðu senunni. Sara lagði stund á leikstjórn í The Royal Central School of Speech and Drama í London og útskrifaðist þaðan árið 2010. Sara mun taka við stöðu leikhússtjóra Tjarnarbíós.

Það er svo engin önnur en Ragnhildur Gísladóttir sem samdi tónlistina við verkið eins og henni einni er lagið. 

Þjóðleikhúsið auglýsti á síðasta ári eftir handritum eða vel útfærðum hugmyndum að barnaleikritum til að efla starfsemi leikhússins í þágu barna og hvetja til ritunar nýrra, íslenskra barnaleikrita. Þetta var jafnframt í fyrsta skipti sem auglýst var eftir barnaleikritum með þessum hætti og viðbrögðin létu sannarlega ekki á sér standa. Alls bárust 150 umsóknir.

Leikarar:
Auðunn Sölvi Hugason, Arnaldur Halldórsson, Katla Líf Drífu-Loisdóttir, Arndís Hrönn Egilsdóttir, Hjalti Rúnar Jónsson, Tinna Margrét Hrafnkelsdóttir og Andri Páll Guðmundsson.

Höfundur
Sigrún Eldjárn
Leikstjórn
Sara Martí Guðmundsdóttir
Leikmynd, búningar og brúður
Snorri Freyr Hilmarsson
Tónlist og tónlistarstjórn
Ragnhildur Gísladóttir
Söngtextar
Sigrún Eldjárn, Sara Martí Guðmundsdóttir, Ragnhildur Gísladóttir
Hljóðhönnun
Kristján Sigmundur Einarsson
Lýsing
Jóhann Friðrik Ágústsson
Sviðshreyfingar
Rebecca Hidalgo

Í nóvember 2021 var tekin sú ákvörðun hjá Freyvangsleikhúsinu að setja á svið barnaleikrit eftir áramót. Félagið fékk Óla Jens leikstjóra til liðs við sig í því skyni og hinn sívinsæli Kardemommubær varð fyrir valinu. Það gekk þó ekki snurðulaust að fá leyfi fyrir sýningunni, þar sem verkið er nú í sýningu hjá Þjóðleikhúsinu. Það blessaðist þó allt að lokum og prufur fyrir leikara voru haldnar í byrjun desember. Þar mætti stór hópur fullorðinna og barna og komust færri að en vildu eins og gengur. Valið var í hlutverk og æfingar hófust í byrjun janúar, viku á eftir áætlun sökum Covid. Er svo sú veira búin að vera leikhópnum ansi snúin á æfingarferlinu og margir þurft að dúsa í sóttkví eða einangrun þegar þeir áttu að vera á æfingu.
Með batnandi tíð, breyttum Covid-tímum og einstöku viðhorfi, samheldni og þrautseigju leikara sem og allra sem að sýningunni koma er Kardemommubærinn nú loks tilbúinn til sýningar í Freyvangi.

Kardemommubærinn fer nú í annað skipti á svið hjá Freyvangsleikhúsinu en fyrir 16 árum síðan var verkið sett upp í leikstjórn Sunnu Borg. Erum við því með bæði nýtt sem og reyndara fólk í öllum stöðum. Hátt í 60 manns sem koma að sýningunni á einn eða annan hátt, þar af 30 leikarar og hljómsveit á sviði. Einnig er skemmtileg aldursflóra þar sem yngsti meðlimur á sviði er 11 ára og sá elsti 77 ára.
Frumsýning verður föstudaginn 4.mars kl.20:00 og sýnt verður alla laugardaga og sunnudaga í mars kl.13:00.

• Einstakur happafengur að fá hinn margverðlaunaða suður-afríska leikstjóra Yaël Farber til að stýra uppsetningunni 
• 29 leikarar taka þátt í sýningunni sem er ein umfangsmesta uppsetning Þjóðleikhússins í áraraðir.  
• Vinkonurnar Unnur Ösp Stefánsdóttir og Vigdís Hrefna Pálsdóttir fara með aðalhlutverk og leika saman á sviði í fyrsta sinn. 

Tvö hlé og þriggja rétta ítölsk matarveisla í boði fyrir leikhúsgesti í fyrsta sinn í Þjóðleikhúsinu. Mögnuð leikhúsupplifun. 
Þjóðleikhúsið frumsýnir Framúrskarandi vinkonu á Stóra sviði Þjóðleikhússins laugardaginn 5. mars. Sýningin er byggð á Napólífjórleik Elenu Ferrante en bækurnar hafa notið gríðarlegra vinsælda og verið gefnar  út um allan heim. Leikstjóri er Yaël Farber frá Suður-Afríku en hún er ein af eftirsóttari leikstjórum heimsins í dag. Unnur Ösp Stefánsdóttir og Vigdís Hrefna Pálsdóttir fara með hlutverk þeirra Lenù og Lilu, vinkvennanna tveggja sem vaxa úr grasi í harkalegu  umhverfi í Napólí á 6. áratugnum. 

Framúrskarandi vinkona er ein umfangsmesta uppsetning Þjóðleikhússins í áraraðir. Alls taka 29 leikarar þátt í þessari mögnuðu stórsýningu, sem tekur um fjórar klukkustundir með tveimur hléum. Bækurnar sem leikverkið  er byggt á hafa hrifið lesendur um allan heim og lifna nú við í uppsetningu hins margverðlaunaða suður-afríska leikstjóra Yaël Farber, en koma hennar hingað til lands er einstakur happafengur fyrir íslenskt leikhúslíf. Vinkonurnar Unnur Ösp Stefánsdóttir og Vigdís Hrefna Pálsdóttir fara með hlutverk hinna skarpgreindu vinkvenna Lenù og Lilu sem alast upp í fátækrahverfi Napólíborgar um og upp úr miðri síðustu öld. Þær þurfa að beita öllum brögðum til að komast af, brjótast til mennta og berjast fyrir betra lífi í harkalegu umhverfi þar sem ofbeldi stjórnar tilverunni og réttur kvenna er lítils virtur. 

Leikstjórinn sem treystir tilviljunum
Þegar Yaël Farber fékk símtal frá Magnúsi Geir þjóðleikhússtjóra og heyrði hvert erindið væri ætlaði hún vart að trúa eigin eyrum. „Þetta var dásamleg tímasetning. Ég hafði tekið Napólífjórleik Elenu Ferrante með mér til Kúbu og gleypt allar bækurnar í mig á örstuttum tíma. Var algerlega heilluð. Bókstaflega sama dag og ég lauk við fjórðu bókina hringdi Magnús, en þá höfðu nýlega orðið breytingar á mínum áætlunum. Ég treysti svona tilviljunum og þekktist boðið þegar í stað.“ 

Matur og leikhús – þriggja rétta máltíð í boði fyrir sýningu og í hléum í Þjóðleikhúsinu í fyrsta sinn 
Þjóðleikhúsið hefur nú stórbætt þjónustu við leikhúsgesti og býður nú í fyrsta sinn upp á þriggja rétta kvöldverð sem gestir geta notið fyrir sýningu og í tveimur hléum. Gestum stendur til boða að koma snemma og gæða sér á ljúffengri súpu fyrir sýningu, Napólíplatta í fyrra hléi og eftirrétti í seinna hléi. Aðrar veitingar eru einnig í boði, en panta verður með tveggja sólarhringa fyrirvara. Sýningin hefst kl. 19.00 en húsið opnar kl. 18.00 fyrir matargesti. 

POLSKIW
zeszłym roku grupa teatralna PóliS z hukiem wkroczyła na scenę Tjarnarbíó ze swoim przedstawieniem: “Co za poroniony pomysł”. Tworzą ją artyści polskiego i islandzkiego pochodzenia, którzy w swojej twórczości starają się w lekki i wesoły sposób przedstawić relacje pomiędzy dwoma narodami.
W tym roku powracają na scenę z nowym przedstawieniem: “Tu jest za drogo”.
Ich nowa komedia śledzi losy dwójki zakochanych z Polski, którzy przyjeżdżają na Islandię aby zarobić na ich wymarzony ślub. Okoliczności, ludzie i zdarzenia, które spotykają na swojej drodze wystawiają ich związek na próbę. ”Tu jest za drogo” to okazja, by pośmiać się z nieporozumień i niekiedy dziwacznych prób kontaku między Polakami i Islandczykami.
Spektakl w języku polskim. Napisy dostępne w języku islandzkim i angielskim.—

ÍSLENSKA
Leikhópurinn PóliS kom fram á sjónarsviðið með hinni stórskemmtilegu sýningu Co za poroniony pomysl eða Úff, hvað þetta er slæm hugmynd sem var sýnd í Tjarnarbíói á síðasta ári. Leikhópinn skipa listafólk af pólskum og íslenskum uppruna sem búa til leikandi léttar sýningar þar sem samskipti þessara tveggja vinaþjóða eru í brennidepli. Nú snýr hópurinn aftur í samstarfi við Borgarleikhúsið með grínsýningunni Tu jest za drogo, eða Úff hvað allt er dýrt hérna.Hér er sögð ferðasaga tveggja ungra Pólverja sem koma til landsins til þess að vinna og safna peningum fyrir brúðkaup sitt heima í Póllandi. Á ferðalaginu hitta þau fyrir furðulegt fólk og lenda í ýmsum ævintýrum sem reyna á samband þeirra. Hér er kærkomið tækifæri til að hlæja að samskiptum og samskiptaörðugleikum en ekki síst að okkur sjálfum. Sýningin fer öll fram á pólsku en fyrir íslensku- og enskumælandi áhorfendur verður textun í boði.Sýningin nýtur stuðnings Sviðslistasjóðs Íslands og Menningarsjóðs Reykjavíkurborgar.—

ENGLISH
PóliS Theatre Group made an entrance to the Icelandic theatre scene last year with their playful show “Co za poroniony pomysł” (What a Bad Idea) in Tjarnarbíó, The theatre group consists of Icelandic and Polish artists that make light shows where the communication of these two nations is in focus. Now the group is back in collaboration with Borgarleikhúsið with their new comedy “Tu jest za drogo” (Everything is so Expensive Here).The play tells a story of a young Polish couple coming to Iceland to make money for their wedding back in Poland. On the road they meet strange people that will challenge their relationship. In „Tu jest za drogo“ there’s a chance to laugh at communication and our difficulty to connect with each other. The play is mostly in Polish but subtitles are available in Icelandic and English.Aktorzy/leikarar: Jakub Ziemann, Aleksandra Skołożyńska, Ólafur Ásgeirsson, Sylwia Zajkowska, Andrés Pétur Þorvaldsson
Reżyser/Leikstjórn: Salvör Gullbrá Þórarinsdóttir
Dramaturg/Dramatúrg: Hjalti Vigfússon Scenografia & Kostiumy/Leikmynd og búningar: Wiola Ujazdowska
Dźwięk/Tónlist: Unnsteinn Manuel Stefánsson
Oświetlenie sceniczne/Ljósahönnun: Fjölnir
Subtitles Conductor: Szymon Keler

Björk Jakobsdóttir leikstjóri hefur frá því í fyrra ásamt úrvalsliði listamanna unnið hörðum höndum að því að búa til fjölskyldusöngleikinn Langelstur að eilífu byggðan á bókum Bergrúnar Írisar Sævarsdóttur.

Langelstur að eilífu er splunkunýr söngleikur fyrir alla fjölskylduna, byggður á vinsælum verðlaunabókum Bergrúnar Írisar um Eyju og Rögnvald sem verða bestu vinir þrátt fyrir 90 ára aldursmun.

Verkið fjallar á einlægan hátt um vináttuna, lífið og dauðann. Sýningin er full af gleði, söng, hlýju og hjartnæmum boðskap. Hinn ástsæli Siggi Sigurjóns fer með hlutverk Rögnvalds gamla og með hlutverk hinnar sex ára gömlu Eyju fara tvær ungar stórleikkonur, þær Iðunn Eldey Stefánsdóttir og Nína Sólrún Tamimi. Þá syngja, leika og dansa einnig tíu börn í sýningunni auk leikaranna Ásgríms Geirs Logasonar og Júlíönu Söru Gunnarsdóttur.

Um umgjörðina á þessu stórskemmtilega verki sér einvala lið listrænna stjórnenda:
Leikgerð og leikstjórn: Björk Jakobsdóttir
Tónlist: Máni Svavarsson
Danshöfundur: Chantelle Carey
Söngstjóri: Guðlaug Dröfn Ólafsstóttir
Leikmynd og lýsing: Friðþjófur Þorsteinsson
Búningar: Eva Björg Harðardóttir
Grafík: Bergrún Íris Sævarsdóttir

Maður á ónefndum stað byrjar að hlaupa eftir barnsmissi. Hann hleypur og hleypur og getur ekki hætt. Hann getur ekki höndlað sorgina með öðrum hætti, á hlaupunum finnst honum hann vera léttur, frjáls og sterkur. Þannig getur hann tjáð sig um missinn, ranglætið og varnarleysið sem hrjáir hann.

Line Mørkeby er eitt fremsta leikskáld Danmerkur og í þessu áleitna leikriti leitar höfundurinn svara við því hvernig við getum lifað áfram eftir barnsmissi. Textinn er rytmískur, knappur og tilfinningaríkur og ferðalagið óvenjulegt, átakanlegt og heillandi í senn. Gísli Örn Garðarsson er einn á sviðinu og hleypur í gegnum sálarangist aðalpersónunnar í leikstjórn Hörpu Arnardóttur.

Nú er komið að síðustu sýningum á þessar Veislu sem hefur verið í Borgarleikhúsinu. Aðeins örfáar sýningar verða í boði þar sem aðrar leiksýningar þurfa að komast að á stóra sviði Borgarleikhússins.

Þjóðin er orðin veisluþyrst og Veisla er kærkomin vökvun eftir langa þurrð. Á meðan heimsfaraldri stendur komst þjóðin ekki í neina stóra veislu. Hugsa sér öll afmælin sem enginn gat mætt í, árshátíðirnar, útskriftarveislurnar, brúðkaupin, kóramótin og matarboðin. Að ekki sé minnst á alla óbökuðu heitu brauðréttina og kransakökurnar sem aldrei voru snæddar eða freyðivínið sem aldrei var dreypt á úr plastglösum á völtum fæti. Þá eru ótalin löngu trúnóin við hálfókunnugar konur, slúður um valdamikið fólk, hátt spiluð lög og grillaðar pylsur á miðnætti. Þjóðin á inni risa summu í Gleðibankanum og við bjóðum áhorfendum í allt sem þeir hafa misst af í einni stórkostlegri Veislu í Borgarleikhúsinu. 

Hér sameina krafta sína þau Bergur Þór Ingólfsson, þaulreyndur leikhúsmaður og Saga Garðarsdóttir, fyndlistakona, en síðast unnu þau saman við hina geysivinsælu sýningu Kenneth Mána sem frumsýnd var á Litla sviði Borgarleikhússins árið 2014. Partýpinninn Berndsen gerir tónlistina og Veisla verður því bragðgóð en görótt blanda af grínsketsum sem leikhópurinn skrifar saman og tónlist sem svarar áleitnum spurningum á borð við hvort tartalettur séu góðar í alvörunni og hversu hratt skuli ganga um gleðinnar dyr.

Leikhópurinn Leikfjelagið sem Arnfinnur Daníelsson og Halldóra Harðardóttir standa að, hefur hleypt af stokkunum hlaðvarpinu Lífsins leik. Í fyrsta þætti ræddu þau við formann og framkvæmdastjóra BÍL, þau Guðfinnu Gunnarsdóttur og Hörð Sigurðarson um þessi rúmlega 70 ára samtök áhugaleikfélaga á landinu.

Í öðrum þætti okkar var skyggnst inní starf Leikfélags Keflavíkur sem er 60 ára um þessar mundir og er atorkusamt félag, þar sem sýningin þeirra, Fyrsti kossinn, sem er á fjölum leikhússins þennan veturinn er hundraðasta sýningin sem félagið setur upp..

Ætlun tvíeykisins er að halda áfram umfjöllun  leikfélögin í landinu og ástæða til að hvetja leiklistaráhugafólk að fylgjast með.