Leikfélag Hólmavíkur frumsýnir Bót og betrun á páskadag
Leikfélag Hólmavíkur setur upp farsann Bót og betrun eftir Michael Cooney, í leikstjórn Sigurðar Líndals. Frumsýnt verður á páskadag kl. 20:00 og eru allar sýningar í Sævangi.
Verkið gerist í London og fjallar um Eric Swan, sem hefur verið duglegur að svíkja út bætur síðustu tvö árin. Hann ætlar sér þó að minnka svindlið, en þá vindur það upp á sig með sífellt skrautlegri afleiðingum. Inn í málið flækjast meðal annars leigjandinn hans, sambandsráðgjafi og útfararstjóri, ásamt ýmsum öðrum.
Þeir tíu leikarar sem leika eru allt frá því að vera nýliðar á fjölunum, yfir í gamlar kempur innan leikfélagsins. Æfingar hófust í lok janúar og hafa gengið merkilega vel þrátt fyrir ótal plágur og flensur sem leggjast á landann þessi misserin!
Eitt af helstu einkennum Leikfélags Hólmavíkur hafa verið leikferðir út um hvippinn og hvappinn. Því miður er ekki víst hvort hægt verði að komast í slíka í ár, og því við hvetjum alla til að mæta í Sævang og upplifa alvöru skemmtun á Ströndum!
Hægt er að kaupa súpu á Sauðfjársetrinu fyrir sýningar Miða- og súpupantanir í síma: 693 3474 (Ester) ókeypis aðgangur fyrir þá sem ekki tala eða skilja mikla íslensku.
Aðalfundar Bandalags íslenskra leikfélaga verður haldinn laugardaginn 30. apríl 2022
Boðað
er til aðalfundar Bandalags íslenskra leikfélaga laugardaginn 30. apríl 2022.
Fundurinn verður haldinn á Park Inn hótelinu, Hafnargötu 57 í Reykjanesbæ. Á
dagskrá eru venjuleg aðalfundarstörf. Fundurinn hefst kl. 9.30.
Félög sem hyggjast senda fulltrúa þurfa að fylla út kjörbréfsform á vefnum. Nauðsynlegt er að vera innskráð á aðgangi viðkomandi leikfélags.
Þetta er fyrsti fundurinn síðan árið 2019 sem ekki verður markaður
af samkomutakmörkunum. Það er sannarlega kominn tími til að treysta
félagsböndin og stilla saman strengi nú þegar við virðumst loks komin úr
kófgöngunum út í ljósið. Í tilefni þess hefst þingið á óformlegri málstofu
föstudagskvöldið 29. apríl undir yfirskriftinni Áhugaleiklistin eftir Covid. Í
ráði er að ræða almennt stöðu áhugaleiklistarinnar, almenn og sértæk vandamál
sem að félögunum steðja og velt upp möguleikum og lausnum.
Sveitarstjórnarkosningar verða haldnar 14. maí og nú er tíminn til að ræða og
ýta við fulltrúum í sveitarstjórnum vegna hagsmuna félaganna.
Í boði eru eftirfarandi pakkar fyrir BÍL-þingið:
Pakki 1: 39.750 kr.
Gisting á Park Inn í 2 nætur (m.v. gistingu í 2ja manna herbergi) + morgunverður
Fundarveitingar, kaffi og hádegisverður meðan á fundi stendur á laugardag
Hátíðarkvöldverður laugardag
Pakki 2: 28.500 kr.
Gisting á Park Inn í 1 nótt (m.v. gistingu í 2ja manna herbergi) + morgunverður
Fundarveitingar, kaffi og hádegisverður meðan á fundi stendur á laugardag
Hátíðarkvöldverður laugardag
Pakki 3: 14.000 kr.
Fundarveitingar, kaffi og hádegisverður meðan á fundi stendur
Hátíðarkvöldverður laugardag
Pakki 4: 8.500 kr.
Fundarveitingar, kaffi og hádegisverður meðan á fundi stendur
Vonir standa til að hægt verði að bjóða fundargestum á Rokksafnið
meðan á þinginu stendur.
Sendið póst á info@leiklist.is til að bóka pakka fyrir hádegi 20. apríl.
Fyrrverandi er frumsýnt 9. apríl í Borgarleikhúsinu
„Þetta hjónaband stefndi bara í áttina að lestarslysi. Svo ég ákvað að stökkva út.“
Vinir hittast til að kryfja málin í „symposium“; samræðum með víni, þar sem allt er undir; samböndin, samlífið, draumarnir, áföllin, sjálfshjálparnámskeiðin, samskiptin við tengdó og stjúpbörnin og síðast en ekki síst fyrrverandi! Hversu oft hugsarðu um fyrrverandi? Er eðlilegt að stjúpsystkini klóri augun úr hvoru öðru? Hvað eru eiginlega margir í þessu hjónabandi? Er hundurinn ekki óeðlilega ástleitinn? Hver var að tala um opið samband?
Þúsundþjalasmiðurinn Valur Freyr Einarsson leikstýrir hér eigin verki með aðra meðlimi CommonNonsense sér við hlið en hópurinn, með Ilmi Stefánsdóttur myndlistarkonu og leikmyndahöfundi og tónlistarmanninum Davíð Þór Jónsson innanborðs, á að baki dásamlegar sýningar á borð við Söngleikinn Leg og Tengdó.
Útkoman er myljandi fyndið og hjartnæmt verk sem speglar flókið fjölskyldulíf og sambönd nútímans þannig að við finnum samhljóm við okkar eigin grátbroslegu tilveru.
Nýtt leikrit eftir Tyrfing Tyrfingsson, Sjö ævintýri um skömm
Kópavogsbúinn Tyrfingur Tyrfingsson hefur slegið í gegn hér heima og vakið mikla athygli erlendis fyrir leikrit sín. Þetta er fyrsta verkið sem Þjóðleikhúsið sýnir eftir Tyrfing og jafnframt hans fyrsta leikrit á stóru sviði.
Kanamellur, lögreglustjórinn á höfuðborgarsvæðinu, drykkfelldur geðlæknir og fleiri kostulegir karakterar koma við sögu í þessu ósvífna en farsakennda ævintýri, sem byggt er á sönnum atburðum.
Föstudaginn 1. apríl frumsýnir Þjóðleikhúsið á Stóra sviðinu Sjö ævintýri um skömm eftir Tyrfing Tyrfingsson. Þetta er fyrsta leikrit sem Tyrfingur skrifar fyrir Þjóðleikhúsið en hann hefur slegið í gegn hér heima og vakið mikla athygli erlendis. Þetta nýja leikrit Tyrfings er sjöunda verk hans sem er sviðsett í íslensku leikhúsi. Frábær leikarahópur undir stjórn Stefáns Jónssonar leikstjóra segir söguna af makalausu ferðalagi skammarinnar á milli kynslóða þar sem kanamellur, lögreglan og hundurinn Lúkas koma meðal annars við sögu.
Agla ryðst inn á stofu geðlæknis og krefst þess að hann skrifi upp á lyf sem nái að svæfa hana í þrjá sólarhringa. Geðlæknirinn vill ekki verða við þessari ósk Öglu en segir henni hinsvegar frá kenningu sinni um að sjö ævintýri um skömm liggi að baki allri geðveiki. Agla neyðist til að rekja sig í gegnum þessi ævintýri sem stjórna lífi hennar ef hún vill eiga einhvern möguleika á bata.
Myndir eru teknar á æfingu
Sjö ævintýri um skömm eru farsakennd ævintýri, byggð á sönnum atburðum, þar sem við fylgjum eftir ferðalagi skammarinnar í íslenskri fjölskyldu frá kanamellum í Flórída að Lúkasarmálinu á Akureyri og skoðum allt þar á milli. Kópavogsbúinn og ólíkindatólið Tyrfingur Tyrfingsson hefur slegið í gegn hér heima og vakið mikla athygli erlendis. Þetta nýja leikrit Tyrfings er sjöunda verk hans sem er sviðsett í íslensku leikhúsi, en hið fyrsta sem sýnt er í Þjóðleikhúsinu.
„Það sem heillar mig einna mest við leikhúsið er líkamlegur háski. Leikritið lýtur nefnilega alveg sömu lögmálum og sirkus. Það þarf fílinn sem þrammar inn á hringsviðið – hið stórfenglega dýr sem búið er að temja. Svo þarf arabísku stóðhestana af því að þarna verður líka að vera fegurð, þokki. Síðan trúðinn til að halda uppi fjörinu. En loks þurfum við, og það er mikilvægast af öllu, sjálfan línudansarann. Það er í rauninni hægt að sleppa öllu hinu en það er aldrei hægt að sleppa línudansaranum. Það verður einhver að færa fórn. Án háska er leiksýningin dauðadæmd. Hrapar hann eða ekki? Það skapar þessa frumstæðu spennu – þess vegna kom gesturinn í leikhúsið.“
Leikarahópurinn er glæsilegur: Ilmur Kristjánsdóttir, Hilmir Snær Guðnason, Ólafía Hrönn Jónsdóttir, Eggert Þorleifsson, Kristbjörg Kjeld, Kristín Þóra Haraldsdóttir, Edda Arnljótsdóttir, Steinunn Ólína Þorsteinsdóttir, Elva Ósk Ólafsdóttir og Vincent Kári van der Valk. Stefán Jónsson leikstýrir.
Leikritið Ást og upplýsingar hefur þegar verið sett á svið í fjölda uppsetninga, í 22 löndum.
Skemmtilegt og afhjúpandi samtímaverk sem varpar nýju ljósi á kunnuglegar aðstæður, samskipti fólks og fáránleika mannlegrar tilveru.
Í fyrsta sinn setur Þjóðleikhúsið upp leikrit eftir Caryl Churchill, eitt virtasta leikskáld Bretlands. Churchill (f. 1938) er í hópi framsæknustu leikskálda samtímans, og er hún ekki síst þekkt fyrir afar áhugaverðar tilraunir með form og innihald. Churchill hefur unnið til fjölda verðlauna fyrir verk sín, sem gjarnan fjalla um áleitin viðfangsefni úr samtímanum, femínísk málefni, kynjapólitík, vald og misbeitingu þess. Verk hennar hafa verið sett upp í helstu leikhúsum Bretlands og víða um heim.
Í verkinu Ást og upplýsingar, sem hlaut mikið lof þegar það var frumflutt í Royal Court leikhúsinu í London árið 2012, kryfur Caryl Churchill samtíma okkar af óvægni. Hún skoðar með skemmtilegum og frumlegum hætti hina djúpstæðu löngun okkar til að upplifa nánd og vera elskuð, í heimi sem oft og tíðum virðist einmitt koma í veg fyrir einingu. Brugðið er upp skörpum skyndimyndum af mannlífinu, í hjartnæmu, tragísku og fyndnu verki.
Leikritið Ást og upplýsingar hefur þegar verið sett á svið í fjölda uppsetninga, í 22 löndum.
Una Þorleifsdóttir hefur tvívegis hlotið Grímuverðlaunin sem leikstjóri ársins. Auður Ava Ólafsdóttir þýðir og hinn virti austurríski leikmyndahönnuður Daniel Angermayr vinnur í fyrsta sinn hérlendis.
Leikdeild Ungmennafélags Biskupstungna frumsýndi gamanleikinn Ef væri ég gullfiskur, eftir Árna Ibsen í Aratungu þann 25. mars. Að sögn leikdeildar manna hefur æfingaferlið gengið vel en „…bölvuð veiran hefur auðvitað sett svip sinn á það“. Leikarar eru 10 talsins og alls koma um 20 manns að uppfærslunni með einum eða öðrum hætti.Leikstjóri er Ólafur Jens Sigurðsson.
Um verkið: Að nóttu virðist gullfiskabúðareigandinn Pétur vera að undirbúa það að láta sig hverfa með peningafúlgu sem mögulega er illa fengin. Hann reynir að flýta sér en er stöðugt truflaður af sonum sínum sem birtast heima hjá pabba án þess að þeirra sé vænst eða óskað. Lausaleiksdrós, tengdadætur og tengdasonur bætast við og það er ekki beint að hjálpa upp á plan Péturs Aðalsteinssonar í Gullfiskum. Yfirreddarinn Tommi þvælist svo um fyrir öllum svo að liggur við stórslysum. Leikverkið er sígildur farsi sem kitlar hláturtaugarnar. Hurðum er skellt, misskilningur á sér stað, handalögmál, grátbrosleg atvik í bland við sprenghlægileg eins og eiga að prýða góðan farsa.
Sýningar eru annars sem hér segir: 25. mars. Frumsýning kl. 20 2. sýning 27. Mars Kl 17 3. sýning 30. mars Kl. 20 4. sýning 1. apríl kl. 20 5. sýning 2. apríl kl. 20 6. sýning 3. apríl kl. 17 Áætlaðar eru 12 sýningar í allt.
Það verður nóg um að vera í Þjóðleikhúsinu á næstunni
Fjórar frumsýningar!
Það verður heldur betur mikið um dýrðir í Þjóðleikhúsinu á næstu vikum. Fram að páskum rekur hver frumsýningin aðra, auk þess sem vinsælar sýningar verða áfram á fjölunum, Framúrskarandi vinkona, Kardemommubærinn, Ásta og Vertu úlfur. Kjallarinn iðar líka af lífi! Við hlökkum til að sjá ykkur öll í leikhúsinu!
Umskiptingur verður frumsýnt 19. mars
Umskiptingur Nýtt íslenskt barnaleikrit
Bráðskemmtilegt nýtt barnaleikrit eftir einn af okkar vinsælustu höfundum barnaefnis. Sigrún Eldjárn leikur sér hér á frumlegan og sniðugan hátt með minnið um umskiptinga úr gömlu þjóðsögunum okkar. Ragnhildur Gísladóttir semur tónlist eins og henni einni er lagið. Frumsýnt 19. mars
Í fyrsta sinn setur Þjóðleikhúsið upp leikrit eftir Caryl Churchill, eitt virtasta leikskáld Bretlands. Churchill (f. 1938) er í hópi framsæknustu leikskálda samtímans, og er hún ekki síst þekkt fyrir afar áhugaverðar tilraunir með form og innihald. Hún hefur hlotið fjölda verðlauna og verk hennar hafa verið sett upp í helstu leikhúsum Bretlands og víða um heim. Frumsýnt 25. mars
Farsakennd ævintýri, byggð á sönnum atburðum, þar sem við fylgjum eftir ferðalagi skammarinnar í íslenskri fjölskyldu frá kanamellum í Flórída að Lúkasarmálinu á Akureyri og skoðum allt þar á milli. Kópavogsbúinn Tyrfingur Tyrfingsson hefur slegið í gegn hér heima og vakið mikla athygli erlendis. Þetta nýja leikrit Tyrfings er sjöunda verk hans sem er sviðsett í íslensku leikhúsi, en hið fyrsta sem sýnt er í Þjóðleikhúsinu. Frumsýnt 1. apríl
18 ára menntaskólastrákur er staddur á Laugaveginum í leit að töffaralegum fötum. Síminn hringir, þetta er sæta stelpan sem var að vinna á Prinsinum í sumar. „Ég er ólétt. Þú ert að verða pabbi.“ Bráðskemmtilegt verk sem frumsýnt verður á Rifi og sýnt víða um land í kjölfarið. Sýningar í Reykjavík hefjast í haust. Frumsýnt 6. apríl
Leikfélag Keflavíkur Sýnir söngleikinn sívinsæla Grease
Föstudaginn 18.mars mun Leikfélag Keflavíkur frumsýna ungmennasöngleikinn Grease en söngleikurinn er settur upp í samstarfi við Nemendafélag Fjölbrautaskóla Suðurnesja og Vox Arena, leikfélag NFS.
Prufur voru haldnar í janúar þar sem mun færri komust að en vildu en það reyndist listrænum stjórnendum erfitt að velja en hópurinn sem endaði á sviðinu stendur sig framúrskarandi vel. Um er að ræða 18 manna hóp af 16-20 ára krökkum ásamt 6 manna hljómsveit sem Sigurður Smári Hansson stýrir.
Brynja Ýr Júlíusdóttir sér um leikstjórn og Sigríður Rut Ragnarsdóttir Ísfeld er danshöfundur. Listrænir stjórnendur voru allir þátttakendur í Fyrsta kossinum en því sýningarferli lauk 19.febrúar og því byrjuðu æfingar á Grease ekki af fullum krafti fyrr en um miðjan febrúar og því má algjörlega segja að síðustu vikur hafi verið mjög krefjandi fyrir alla sem koma að sýningunni.
Stjórnarmeðlimir Leikfélags Keflavíkur eru mjög ánægðir með það að geta stutt leikfélag NFS við að koma sinni starfsemi aftur á gott ról, en það leikfélag hefur ekki sett upp sýningu síðan árið 2018 þar sem Brynja var einnig leikstjóri. Við hvetjum alla að sjálfsögðu til að mæta á sýninguna og styðja við öflugt menningarstarf hjá leikfélögum Reykjanesbæjar/Suðurnesja.
Opnað hefur verið fyrir skráningu í hinn árlega Leiklistarskóla Bandalags íslenskra leikfélaga (BÍL). Skólinn hefur verið haldinn á hverju ári síðan 1997 en skólinn er að þessu sinni að Reykjaskóla í Hrútafirði.
KVEÐJA FRÁ SKÓLANEFND
Kæru leiklistarvinir!
Við hlökkum mikið til þess að bjóða ykkur velkomin í Reykjaskóla í sumar þar sem leiklistarskólinn okkar verður settur í tuttugasta og fimmta sinn! Fjórfalt húrra fyrir þessum áfanga! Skólinn blómstar sem aldrei fyrr og við sjáum fram á mikla sköpun, metnað og gleði í sumar.
Að þessu sinni verða þrjú fjölbreytt námskeið í boði. Við bjóðum velkominn aftur Ólaf Ásgeirsson sem kennir Leiklist I að þessu sinni. Einnig bjóðum við velkomna í fyrsta sinn í kennarahópinn, Jennýju Láru Arnþórsdóttur. Hún mun kenna Leikstjórn II sem er framhald af námskeiði Völu Fannell frá 2021. Þess má geta að Jenný Lára og Vala hafa sömu menntun og mun Vala styðja við undirbúning námskeiðsins til að tryggja samfellu. Sérnámskeið fyrir reynda leikara verður svo í höndum hins þrautreynda kennara Ágústu Skúladóttur. Að þessu sinni verður það námskeiðið Hvernig segjum við sögu sem Ágústa hefur boðið upp á áður við góðar undirtektir. Þá bjóðum við höfundum í heimsókn til að skerpa stílvopnið!
Við vonum að sem flestir eigi þess kost að koma, nema og njóta.
Hlökkum til að sjá ykkur – með bestu kveðju, Hrefna, Dýrleif, Herdís, Hrund og Gisli Björn
Slá í gegn verður sýnt í Félagsheimilinu Lyngbrekku.
Leikdeild UMF Skallagríms frumsýnir söngleikinn Slá í gegn föstudaginn 11. mars. Söngleikurinn er eftir Guðjón Davíð Karlsson (Góa). Innblástur verksins er sóttur í lög Stuðmanna. Leikstjóri er Elvar Logi Hannesson og sýnt er í Félagsheimiinu Lyngbrekku.
