Félag leikskálda og handritshöfunda, FLH, og Borgarleikhúsið efna í samstarfi við Listahátíð í Reykjavík til hálfsviðsettra leiklestra á splunkunýjum verkum eftir fjóra íslenska höfunda. Verkin voru unnin í höfundasmiðju á vegum FLH og Borgarleikhússins.

Auglýst var eftir verkum í vinnslu, alls bárust 36 umsóknir og fjögur verk voru valin. Verkin voru unnin áfram með listrænum ráðunauti Borgarleikhússins og haldin var vinnuvika með skáldunum ásamt völdum leikstjórum og leikurum Borgarleikhússins.

Verkin fjögur sem lesið verður úr í Borgarleikhúsinu og nágrenni þess eru afar ólík að efni og formi. Við fylgjumst með íslenskum konum í gufubaði í fjarlægu landi þar sem hryðjuverk vofir yfir, systkinum sem hittast í íbúð í Reykjavík eftir margra ára fjarvistir til að útkljá myrkaverk úr fortíðinni, strák og stelpu sem hittast í grímupartíi í Reykjavík með ófyrirséðum afleiðingum og tveimur nágrannakonum sem eiga í óvæntum en ofsafengnum samskiptum út af ketti. 

Einn viðburður verður búinn til úr lestrunum og munu áhorfendur ferðast á milli verka frá einum stað til annars í leikhúsinu og nágrenni þess. 

Verkefnið er styrkt af Mennta- og menningarmálaráðuneytinu. 

EFNISSKRÁ:
Sjö konur myrtar í gufubaði eftir Sigurbjörgu Þrastardóttur í leikstjórn Kristínar Eysteinsdóttur
Rauðir þræðir eftir Jóhann Þórsson í leikstjórn Vigdísar Jakobsdóttur
Gestir eftir Hildi Knútsdóttur í leikstjórn Viðars Eggertssonar
Tvískinnungur eftir Jón Magnús Arnarsson í leikstjórn Stefáns Jónssonar

Verkefnið er styrkt af Mennta- og menningarmálaráðuneytinu.

Hin indversk-ættaða Shantala Shivalingappa snýr aftur á Listahátíð í Reykjavík, nú í fylgd eins þekktasta danshöfundar nútímans, marokkósk-belgíska danshöfundinum Sidi Larbi Cherkaoui.

Play er sköpunarverk dansaranna og danshöfundanna Shantala Shivalingappa og Sidi Larbi Cherkaoui. Þungamiðja verksins er hugmyndin um leikinn, hvort heldur sem er hlutverkaleikinn sem fram fer á leikhúsfjölunum eða þau hlutverk sem fólk tekur sér í lífinu sjálfu. Verkið segir meðal annars sögu samskipta karls og konu og hvað gerist þegar orku þeirra lýstur saman. Líkt og börn að leik setja þau upp grímur og taka sér þannig nýtt hlutverk. Þannig sneiða þau hjá ímynd sinni, sleppa undan nafni sínu, ytra formi og sögu. En það getur reynst erfitt að flýja sjálfið og í því ferli kemur oft fleira í ljós heldur en það sem reynt er að fela.

Play er gáskafullt og tilfinningaþrungið verk, tileinkað danshöfundinum og frumkvöðlinum heitna, Pinu Bausch, en það var hún sem fyrst hvatti til gjöfuls samstarfs dansaranna tveggja.

Shantala Shivalingappa hefur verið kölluð dansari tveggja heima, fædd í Madras í suðurhluta Indlands en uppalin í París. Hún þykir hafa ótrúlegt vald á hvoru tveggja: hinum aldagamla Kuchipudi-dansi frá Indlandi og vestrænum nútímadansi. Þetta er í annað sinn sem Shantala heiðrar gesti Listhátíðar í Reykjavík með nærveru sinni, en hún sýndi í fyrra Kuchipudi-verkið Akasha, við lifandi flutning indverskra tónlistarmanna, við mikla ánægju viðstaddra.

Belgíski danshöfundurinn og dansarinn Sidi Larbi Cherkaoui þykir hafa einstaka sýn á dans, þar sem hann gerir ólíkum danshefðum og dönsurum ólíkra menningarheima jafnhátt undir höfði í sköpun sinni. Sýn hans og hæfileikar hafa fleytt honum langt en hann hlaut meðal annars Laurence Olivier-verðlaunin fyrir bestu nýja dansverkið, árin 2011 og 2014.

Leikstjórn: Sidi Larbi Cherkaoui, Shantala Shivalingappa
Hljómsveit: Patrizia Bovi, Tsubasa Hori, Gabriele Miracle, Olga Wojciechowska
Dansarar: Sidi Larbi Cherkaoui, Shantala Shivalingappa
Sviðsmynd: Filip Peeters
Búningar: Lieve Meeussen / Alexandra Gilbert
Lýsing: Adam Carrées
Myndband: Paul Van Caudenberg

Hefðbundin ljóð og tónlist fara í gegnum nýstárlega skapandi hakkavél í ádeiluverki tónlistarmannanna Hallveigar Rúnarsdóttur, Erps Eyvindarsonar, Hilmars Arnar Hilmarsonar og Bjarna Frímanns Bjarnasonar.

„Enginn hér í heimi hefur eftir minni bestu vitneskju – og ég hef ráðist í áralangar rannsóknir og notið liðsinnis annara við þær – nokkurn tíma tapað fé á því að vanmeta greind hins almenna fjölda. Né hefur nokkur þurft að segja af sér embætti vegna þessa.“ H.L. Mencken – Um blaðamennsku í Chicago Tribune 19. september 1926.

Trúarbrögð, heimspeki og listir hafa í gegnum árþúsundir fjallað um hina „illu hneigð“ mannkyns og að það sé okkur eðlislægt að endurtaka mistök kynslóðanna .
Við skoðum söguna, kenningar Sigmundar Freud, Arthur Koestler og fleiri um þessa veilu, grípum niður í harmljóð bókmenntanna, tregasöngva ólíkra tónlistarstefna, kaldhæðna texta og hvernig við höfum öðlast óljósa von í gegnum söguna. Er líffræðin örlagavaldur, er Glámur í gangverkinu, eða erum við á leiðinni útí geim?

Er okkur viðbjargandi?

Flytjendur: Hallveig Rúnarsdóttir, Erpur Eyvindarson, Hilmar Örn Hilmarsson, Bjarni Frímann Bjarnason, og fleiri.

Fyrsta ópera Önnu Þorvaldsdóttur tónskálds, í leikstjórn Þorleifs Arnar Arnarsonar, verður frumsýnd á Íslandi á þrítugustu Listahátíð í Reykjavík í vor.

Verkið býður áhorfendum í íhugult ferðalag um óræða veröld í tíma og rúmi þar sem hugleiðingum um leit að uppruna og tengingu við rætur sjálfsins er velt upp. Dreymandi og næmur hljóðheimur Önnu Þorvaldsdóttur skapar tregafulla passíu, þar sem undirtónninn einkennist af brothættri nánd, yfirþyrmandi þrá eftir sannleika og von um endurheimt jafnvægi. Leikstjórn Þorleifs Arnar Arnarssonar leggur upp með hugmyndina um hið síleitandi mannkyn að leiðarljósi. Hann leyfir hinu skynræna og óhlutbundna myndmáli tónlistarinnar og frásagnarinnar að leiða flytjendurna í átt að flæðandi samruna skilningarvitanna.

„Aðalpersóna verksins er óræð táknræn persóna – þríþætt eining – sem er túlkuð af þremur söngvurum. Í verkinu fylgjumst við með þeim í leit að grunni sínum og rótum þar sem þau reyna að finna tengingu við uppruna sinn og eigin rödd sem þau virðast hafa glatað. Togstreita þeirra birtist í gegnum hljóð- og raddáferðir sem verða að tjáningarformi fyrir það sem tungumál getur ekki tjáð. Tungumálið, bæði brotakennt og heilsteypt, verður að táknmynd hinnar rökhugsandi manneskju, og hið lagræna táknmynd samhljómsins og þess að finna rödd sína í hinu víða samhengi. Verkið sjálft hefur djúpa skírskotun í samband manneskjunnar við náttúruna og þrána til að finna tengingu við grunninn.“
-Anna Þorvaldsdóttir

„Við sviðsetningu UR_ vildi ég kljást við grundvallar spurningar um listræna ferlið sem liggur að baki sérhverri óperuuppfærslu og leyfa því ferli að skína í gegn í sviðsetningu verksins. Að frumsýna nýtt verki býður upp á tækifæri til að taka listformið sjálft og staðsetningu þess í nútímanum til endurskoðunar. Þar sem UR_ er, með í allri sinni margræðni, díalektísk endursögn sköpunarsögu, langaði mig til að spegla hana með samtímaóperuna sjálfa sem bakgrunn. Óperu formið sjálft býður nefnilega uppá að skapa fullkomnlega útópískan heim, um stundarsakir“
-Þorleifur Örn Arnarsson

FAR NORTH er tengslanet og vettvangur til eflingar og framþróunar við framleiðslu samtíma tónleikhúss á norðurhjara. UR_ er afrakstur verkþróunar yfir tveggja ára tímabil, sem fram fór á Grænlandi, Íslandi, Noregi og Þýskalandi. Verkefnið er samstarfsverkefni Far North, Listahátíðar í Reykjavík, Theater Trier, Ultima Oslo Contemporary Music Festival, norsku Þjóðaróperunnar og grænlenska Þjóðleikhússins. Uppsetningin er unnin í samstarfi við Íslensku óperuna.

Tónlist: Anna Þorvaldsdóttir
Texti: Anna Þorvaldsdóttir og Mette Karlsvik
Leikstjórn: Þorleifur Örn Arnarsson
Leikmynd og búningar: Anna Rún Tryggvadóttir
Framleiðandi og listrænn stjórnandi Far North: Arnbjörg María Danielsen
Hljómsveitarstjóri: Bjarni Frímann Bjarnason
Flytjendur: Joa Helgesson, Melis Jaatinen, Sofia Jernberg, Tinna Þorsteinsdóttir, Miké Phillip Fencker Thomsen, CAPUT tónlistarhópur, Örnólfur Þór Eldon.
Sýningarstjóri: Sebastian Reckert
Sviðstæknistjóri: Florian Semmet

Hver ert þú og hvað ertu að gera í dag?
Ég er leikari, leikstjóri, leikskáld, rithöfundur, dagskrárgerðarmaður, þýðandi, faðir, sambýlismaður, sonur, bróðir og frændi, svo eitthvað sé nefnt. Þessa dagana er ég að leika í verki eftir sjálfan mig sem heitir Góði dátinn Svejki og Hasek vinur hans og er sýnt í Gaflaraleikhúsinu. Og svo líka margt annað sem felst í því að vera allt það sem ég taldi upp hér að ofan.

Í hvaða stjörnumerki ertu?
Sporðdrekanum. Eða kínverska merkingu hananum.

Hvað ætlaðir þú að verða þegar þú yrðir stór?
Fyrst dýralæknir, svo myndhöggvari og loks leikari. Svo hef ég lítið hugsað málið eftir það.

Hver er þinn helsti kostur og helsti galli?
Helsti kosturinn er umburðarlyndi þegar það á við. Helsti gallinn er umburðarlyndi þegar það á ekki við.

Hver er uppáhaldsmaturinn þinn?
Saltkjöt og baunir. Það hefur verið í uppáhaldi síðan ég var strákur, en ég var afskaplega matvant barn. Ennþá slær ekkert út þennan þjóðlega rétt.

Hvaða sýningu sástu síðast í leikhúsi?
Síðast sá ég Illsku hjá Óskabörnum ógæfunnar í samvinnu við Borgarleikhúsið. Það var frábær sýning, bæði vel gerð og hugsuð og ekki síður umhugsunarverð.

Hvaða áhugamál áttu þér?
Fjallgöngur og skíðamennsku. Líka kajakróður og veiði. Tennis og golf eru líka áhugaverð.

Hvernig tónlist hlustar þú mest á?
Ég hlusta mikið á söngleikjatónlist, enda hef ég samið nokkra söngleiki. Svo er það gamalt rokk. Hér áður fyrr hlustaði ég mikið á óperutónlist en hef ekki gefið mér tíma til þess nýlega. Svo reyni ég að setja mig inn í það sem börnin mín eru að hlusta á hverju sinni, en þau eru á aldrinum 12 – 35 ára svo það er býsna breiður skali.

Hvað fer mest í taugarnar á þér?
Misrétti, dónaskapur og hroki. Sérstaklega hroki misviturra valdsmanna. Einu skiptin sem mig langar til að beita ofbeldi eru þegar ég sé og heyri íslenska stjórnmálamenn meðhöndla þjóð sína eins og hún sé hálfviti.

Hver er þinn uppáhaldsstaður á Íslandi?
Kópavogur. Hann kemur mér stöðugt á óvart.

Hver er þinn uppáhaldsstaður erlendis?
Avignon í Suður-Frakklandi. Þar er haldin leiklistarhátíð árlega, sem er óendanleg auðlind og uppspretta hugmynda og upplifana.

Flytja til London eða New York?
New York.

Eiga hund eða kött?
Kött.

Borða heima heima eða úti daglega?
Heima.

Finnst þér betra að vinna á morgnanna eða kvöldin?
Morgnana.

Hvort drekkurðu bjór eða vín með matnum?
Vín.

Hvort finnst þér skemmtilegra að lesa eða horfa á sjónvarp?
Lesa.

Hvort manstu betur: Nöfn eða andlit?
Andlit.

Veldu: Sturtu eða bað?
Sturtu.

Veldu: RÚV eða Stöð 2?
Rúv.

Ef þú ættir að lýsa þér í einu orði – hvaða orð væri það?
Þolinmóður.

Er eitthvað sem þú vilt segja að lokum?
Ég vil bara óska öllum sem þetta lesa hamingju og farsældar í lífinu almennt og afkomendum þeirra þæginda og langlífis.

Nemendur í lokaáfanga á leiklistarbraut í Fjölbrautaskólanum í Garðabæ, sýna fjórar sýningar af lokaverkefni sínu.

Verkin eru samin og leikin af nemendum og öll listræn vinna er í þeirra höndum og byggist á öllu því námi sem farið hefur fram á brautinni síðustu ár.

Verkin eru fjögur samtals og eru um 15 mínútur að lengd hvert og eitt. Öll verkin sameinast í eina sýningu sem að tekur um klukkustund.

Sýningar eru:
Mánudaginn 2. maí kl 18:00
Mánudaginn 2. maí kl. 20:00
Þriðjudaginn 3. maí kl. 18:00
Þriðjudaginn 3. maí kl. 20:00 – LOKASÝNING!

Frír aðgangur!

Nemendur eru:
Helga Margrét Höskuldsdóttir
Hrafnhildur Ólafsdóttir
Íris Heiða Jónsdóttir
Karítas Sif Bjarkadóttir
Patrekur Ísak Steinarsson
Rakel Ýr Stefánsdóttir
Reginn Tumi Kolbeinsson
Selma Rán Lima
Sigríður Margrét Ágústsdóttir
Urður Bergsdóttir
Örn Gauti Jóhannsson

Kennari er Vigdís Gunnarsdóttir
Við mælum með að panta miða hjá henni þar sem miðafjöldi er takmarkaður, netfangið er: vigdisg@fg.is

Jörðin er að deyja. Til að bjarga mannkyninu eru spandex-geimfararnir Ísak og Vilhjálmur sendir í könnunarleiðangur til KOI. Þar á að byggja mannkyninu nýtt heimili, nýja framtíð. En á leiðinni er bankað og einhver í neyð vill komast inn í geimskipið.

Könnunarleiðangur til KOI er sjálfstætt framhald af leikverkinu MP5 sem vakti mikla athygli í Tjarnarbíói á síðasta leikári.

Sviðslistamennirnir Hilmir Jensson og Tryggvi Gunnarsson reyna á þolmörk leikhússins með því að fjalla hratt um pólitískt málefni líðandi stundar. Þeir skrifa handrit, æfa, smíða leikmynd og frumsýna á innan við einum mánuði.

Frumsýning – 29. apríl kl. 20:30
2. sýning – 5. maí kl. 20:30
3. sýning – 10. maí kl. 20:30

Miðaverð er 3.900 kr.
Miðasala á Midi.is og miðapantanir á midasala@tjarnarbio.is.

Í MP5 tóku Hilmir og Tryggvi fyrir byssumálið svolkallaða, er vopnvæða átti almenna lögreglu á Íslandi, en núna taka þeir fyrir flóttamannavandann og viðbrögð okkar við honum.

Umsagnir um MP5:

„Hilmir og Tryggvi hafa þróað með sér virkilega skemmtilegt samband á sviðinu sem einkennist af leikgleði og einlægni. Þeir hafa fundið skemmtilegan leiktaktsem á vel við sviðssetninguna og skapar þar af leiðandi gott jafnvægi sín á milli. (MP5) er spennandi og bráðnauðsynlegt innslag í íslenskt samtímaleikhús…“ – Sigríður Jónsdóttir, Fréttablaðið

„…frábærir leikarar og frábært handrit…“ – Djöflaeyjan / RÚV

„Rífandi skemmtileg leiksýning…“ – TMM.is

Leikfélag Menntaskólans á Akureyri færir ykkur söng- og dansleikinn Konung ljónanna, sem byggður er á samnefndri kvikmynd frá árinu 1994.

Aðalpersónan í söngleiknum er Simbi, fjörugur ljónsungi, sem einn daginn á að taka við hlutverki föður síns sem konungur ljónanna. En valdagræðgi föðurbróður hans veldur því að Simbi hrökklast burt frá heimaslóðunum, tekur upp kæruleysislegan lífsstíl og gleymir framtíðarhlutverki sínu. Sýningin er fyrir alla aldurshópa enda er þetta saga og tónlist sem flestir þekkja. Leikfélag Menntaskólans á Akureyri hefur undanfarin ár sett upp stórar leiksýningar sem hafa slegið hvert aðsóknarmetið á fætur öðru. Þetta er ein stærsta uppsetning leikfélagsins frá upphafi. Föngulegur hópur menntskælinga hefur lagt allt sitt í að gera sýninguna að veruleika.

Leikstjóri er Vala Fannell en hún kemur alla leið frá London til að stjórna uppsetningu á þessu skemmtilega verki. Sýningin einkennist af söngi og dansi ásamt mikilli ástríðu og leikgleði.

Sýningin hefur hlotið góðar viðtökur á Akureyri og nú hyggst leikfélagið setja sýningu upp í Reykjavík, í fyrsta sinn í langan tíma.

HLEYPTU ÞEIM RÉTTA INN eftir Jack Thorne, byggt á bók og kvikmynd eftir John Ajvide Lindqvist

Hrífandi verk um einelti, einsemd og óvenjulega vináttu.

Unglingsstrákurinn Óskar er einmana og vinalaus, og lagður í gróft einelti í skóla. Þegar hin dularfulla Elí flytur inn í íbúðina við hliðina á honum, þar sem hann býr einn með móður sinni, umturnast tilvera hans.

Þegar undarlegir og óhugnanlegir atburðir fara að eiga sér stað á svæðinu, áttar Óskar sig smám saman á því hvert leyndarmál Elí er. Hún er vampíra, sem verður að nærast á blóði fólks til að komast af. En hún er líka einstaklingur sem er einmana og utangarðs, rétt eins og Óskar sjálfur. Smám saman þróast á milli Óskars og Elís vinátta sem hvorugt þeirra átti von á eða gat látið sig dreyma um.

Hvað myndir þú taka til bragðs ef nýi nágranninn þinn væri vampíra?

Leikritið Hleyptu þeim rétta inn er byggt á metsölubók sænska rithöfundarins Johns Ajvides Lindqvists. Sænsk kvikmynd byggð á verkinu hefur notið mikillar hylli og var endurgerð í Hollywood undir nafninu Let the Right One In. Leikritið hefur verið sýnt við miklar vinsældir í Royal Court leikhúsinu í London, Skoska þjóðleikhúsinu, St. Ann’s Warehouse í New York og á Norðurlöndunum.

Hrollvekjandi fantasía sem hreyfir við þér, og hefur gagntekið áhorfendur víða um heim.

Verkið er sýnt samkvæmt samkomulagi við Marla Rubin Productions Ltd.

Hvítt er leikandi létt og afar sjónræn sýning fyrir börn frá 1 til 5 ára og fullkomin sem fyrsta reynslan af leikhúsinu. Hún er lærdómur um litina fyrir börnin en áminning um litróf mannlífsins og fjölmenningarsamfélagið fyrir okkur foreldrana.

Hvítt (White) var frumsýnd á Edinborg Fringe leiklistarhátíðinni árið 2010 af Catherine Wheels leikhúsinu og fékk gagnrýnendaverðlaun hátíðarinnar. Árið eftir var hún sýnd á alþjóðlegri leiklistarhátíð Assitej í Kaupmannahöfn og Malmö og var einnig tekin til sýninga á West End í London, á Broadway í New York og í Los Angeles. Verkiðhefur verið sýnt um allan heim og farið til Norður og Suður Ameríku, Evrópu, Asíu og Ástralíu og er núna í sýningum í Skotlandi, Frakklandi, Mexíkó og Bandaríkjunum. Leikritið hefur fengið fjölda viðurkenninga.

Hvítt er framleidd í samstarfi við Catherine Wheels leikhúsið í Skotlandi, Góða Gesti, Hafnarfjarðarbæ og Mennta og Menningarmálaráðuneytið.

Áhorfendur er boðnir velkomnir á stað þar sem allt er hvítt. Þetta er heimur sem glitrar, glansar og skín á nóttunni og er fullur af fuglasöng og fuglahúsum. Heimurinn er bjartur, skipulagður og hvítur, En uppi í trjánum er ekki allt hvítt. Litirnir birtast. Fyrst rauður….svo gulur …svo blár.

Leikstjóri er Gunnar Helgason og leikarar eru María Pálsdóttir og Virginia Gillard.