Það er aðeins ein sýning eftir af Línu Langsokk í Borgarleikhúsinu. Lokasýning er 14. febrúar næstkomandi.
Lína langsokkur, Herra Níels api og hesturinn eru aftur mætt til leiks ásamt vinum sínum Tomma og Önnu. Leiðindaskarfurinn frú Prússólín er staðráðin í að koma Línu fyrir á vandræðaheimili þannig að Lína þarf að hafa sig alla við vilji hún búa áfram á Sjónarhóli. Lína langsokkur er hjartahlýr og réttsýnn prakkari sem allar kynslóðir barna verða að kynnast. Ágústa Eva fer á kostum sem Lína í þessu bráðfyndna og skemmtilega leikriti sem sýnir okkur að við eigum alltaf að vera við sjálf og ekkert annað.
Astrid Lindgren höfundur Línu langsokks er einn ástsælasti barnabókahöfundur allra tíma. Hún fæddist 14. nóvember 1907 í Smálöndum í Svíþjóð og lést í Stokkhólmi 28. janúar 2002, 94 ára að aldri. Hún skrifaði samtals 40 barnabækur og fjölda myndabóka.
Úr gagnrýni
„Uppfærsla Borgarleikhússins á ævintýrum Línu langsokks er allt í senn lífleg, fjörug og mikilvæg. Það er löngu tímabært að ný kynslóð fái að kynnast þessari einkennilegu ofurkonu betur.” VG – DV
Hver er hræddur við Virginíu Woolf? í leikstjórn Egils Heiðars Antons Pálssonar sem sýnd er á Nýja sviði Borgarleikhússins lýkur í febrúar. Leikarar eru þau Margrét Vilhjálmsdóttir, Hilmir Snær Guðnason, Elma Stefanía Ágústsdóttir og Eysteinn Sigurðarson.
Marta og Georg elska hvort annað. Þau vita allt um sig og lífið en samt – eða einmitt þess vegna- eru þau ekki hamingjusöm. Hann er sögukennari við lítinn háskóla, hún heimavinnandi. Að lokinni rektorsveislu í háskólanum býður Marta nýja unga líffræðikennaranum og konu hans heim í eftirpartý án vitneskju eiginmanns síns. Hann þekkir allt of vel gestaleiki konu sinnar. Hún veit allt um völd sín og áhrif og nýtur þess að leika sér að tilfinningum annarra. Miskunnarlaus stigmagnandi barátta hrekur fjórar glæsilegar persónur út á ystu nöf í þessu stórkostlega leikriti.
Edward Albee er eitt fremsta leikskáld Ameríku. Leikritið “Hver er hræddur við Virginíu Woolf?” var frumsýnt í New York árið 1962 og kvikmyndað skömmu síðar með þeim Elizabeth Taylor og Richard Burton og hefur allar götur síðan talist til sígildra leikrita og leikið um allan heim. Leikritið og höfundurinn eru margverðlaunuð í bak og fyrir og hefur meðal annars hlotið Pulizer-verðlaunin í tvígang.
Aðstandendur Höfundur: Edward Albee | Þýðing: Salka Guðmundsdóttir | leikstjóri: Egill Heiðar Anton Pálsson | Leikmynd: Gretar Reynisson | Búningar: Helga I. Stefánsdóttir | Lýsing: Þórður Orri Pétursson| Tónlist: Margrét Kristín Blöndal |Leikgervi: Margrét Benediktsdóttir | Hljóð: Ólafur Örn Thoroddsen | Leikarar: Elma Stefanía Ágústsdóttir, Eysteinn Sigurðarson, Hilmir Snær Guðnason og Margrét Vilhjálmsdóttir.
EDDA BJÖRGVINS
ástælasta gamanleikkona þjóðarinnar
Ásamt Stellu, Bellu, Bibbu, Túrhillu og öllum hinum ógleymanlegu kerlingunum sem hún hefur skapað í kvikmyndum, áramótaskaupum, heilsubælum, útvarpsþáttum og á leiksviði.
Gestaleikarar:
týndi sonurinn: BJÖRGVIN FRANZ GÍSLASON, nýsnúinn heim frá Ameríku og stórsöngvarinn klassíski BERGÞÓR PÁLSSON. Sprenghlægileg gamanleiksýning í lifandi leik & söng, máli & myndum.
Leikarar:
EDDA BJÖRGVINS, BJÖRGVIN FRANZ GÍSLASON OG
BERGÞÓR PÁLSSON
Höfundar handrits:
Edda Björgvins og
Björk Jakobs
Leikstjóri:
Gunnar Helgason
Hreyfingar og dans:
Selma Björnsdóttir
Tónlistarstjórn og útsetningar:
Kristjana Stefánsdóttir
Á nýju ári hófust æfingar hjá Leikfélagi Hörgdæla á leikverkinu með „Vifið í lúkunum“ eftir Ray Cooney. Leikverkið er gamanleikur af bestu gerð og fjallar um leigurbílstjóra sem heldur tvö heimili og tvær eiginkonur. Líkt og fyrirséð er kemst bílstjórinn í margvísleg vandræði við að viðhalda tvöföldu líferni sínu og spynnast inn í vef hans bráðskondnir karakterar. Átta leikarar eru í sýningunni, en leikstjórar sýningarinnar eru hjónin Margrét Sverrisdóttir og séra Oddur Bjarni Þorkelsson. Fyrirhuguð frumsýning er 4. mars og áætlað er að sýna allar helgar í mars.
Lífið er stórskemmtilegt drullumall á mörkum leikhúss og myndlistar fyrir alla fjölskylduna. Sýningin vann tvenn Grímuverðlaun á síðasta leikári, “Barnasýning ársins 2015” og “Sproti ársins 2015”.
Leikhúsið 10 fingur, sem stendur að þessari sýningu, setti upp verðlaunasýninguna Skrímslið litla systir mín og hlaut einnig Grímuverðlaunin sem besta barnasýning ársins 2012.
Leiksýningin fjallar um sköpunarkraftinn, vináttu og hringrás lífsins, þar sem unnið er með mold. Á einu plani er verið að búa til sögu um sköpun heimsins, hvernig landslag breytist í gegnum hamfarir og kraft náttúruafla, hvernig líf kviknar, hvernig fyrstu dýrin skriðu á land og goggunarröðina í náttúrunni – en á öðru plani má lesa úr þessari sömu leiksýningu einfalda sögu af tveimur krökkum að leik. Börnum sem uppgötva skugga sinn og sjálfa sig, finna mold í pokum og fara að drullumalla.
Aðstandendur
Það eru Charlotte Böving sem leikstýrir, Helga Arnalds hannar myndræna hlið verksins og leikarar eru Sólveig Guðmundsdóttir og Sveinn Ólafur Gunnarsson. Tónlist semur Margrét Kristín Blöndal og lýsingu hannar Björn Bergsteinn Guðmundsson. Höfundar eru Sveinn Ólafur Gunnarsson og Sólveig Guðmundsdóttir, Charlotte Böving og Helga Arnalds.
Verkið er styrkt af Leiklistarsjóði og listamannalaunum
Old Bessastaðir er nýtt leikverk eftir Sölku Guðmundsdóttur í uppfærslu Sokkabandsins sem frumsýnt verður í Tjarnarbíói fimmtudaginn, 4. febrúar 2016.
Þrjár konur koma saman til að framkvæma, til að skilgreina sín sameiginlegu grunngildi, til að borða brauð með spægipylsu, til að finna tilganginn, sem fjærst öllum útveggjum. Þær ætla að verða fyrri til. Þær ætla ekki að láta sparka sér niður stigaganginn. Þær eru ekki vont fólk.
Gildi eitt: Við tortryggjum ekki gildin.
Gildi tvö: Þær sem ekki virða gildin eru ógn við gildin.
Gildi þrjú: Við þrýstum þumlunum þéttingsfast inn í augntóttirnar á þeim sem ekki virða gildin.
…það er blóð á skónum þínum.
Leikstjórn: Marta Nordal.
Leikmyndahönnun: Finnur Arnar Arnarsson.
Búningahönnun: Helga Stefánsdóttir.
Tónlist: Högni Egilsson.
Ljósahönnun: Arnar Ingvarsson.
Leikarar: Arndís Hrönn Egilsdóttir, Elma Lísa Gunnarsdóttir og María Heba Þorkelsdóttir
Nemendafélag Verzlunarskóla Íslands setur á hverju ári upp glæsilegan söngleik. Þessir söngleikir hafa hvað eftir annað slegið í gegn og hafa hlotið lof bæði gagnrýnenda og sýningargesta.
Í ár verður söngleikurinn Moulin Rouge settur upp, byggður á samnefndri kvikmynd frá árinu 2001. Sýningin fjallar um Kristján, ungan rithöfund sem flytur til Parísar og endar þar á að skrifa leikrit fyrir skemmtistaðinn Moulin Rouge. Þar kynnist hann Demantadrottningunni og gleðikonunni Satín og verður ástfanginn af henni.
Sýningin er fyrir fólk á öllum aldri, full af gríni, spennu og rómantík, keyrð áfram á glæsilegum leik, söng og dansi.
Listrænu stjórnendurnir eru ekki af verri endanum en það er Björk Jakobsdóttir sem leikstýrir þessu krefjandi verki. Einnig eru dansarnir stórkostlegir þar sem Unnur Elísabet Gunnarsdóttir er danshöfundur sýningarinnar. Helga Margrét Marzellíusardóttir, söngstjóri, sér til þess að leikararnir syngi eins og englar og Hallur Ingólfsson, tónlistarstjóri, sér um að öll tónlistin sé töfrum líkust.
Þvottur eftir Matthías Tryggva Haraldsson verður sýnt í Tjarnarbíói þann 17. febrúar, kl. 21:00.
„Þessi skafa er hluti af mér, þessi skafa er ég og ég er þessi skafa.“
Þvottur er stutt leikrit um eilífan glerþvott. Maður nokkur þvær stóra plötu með lítilli sköfu. Annar sér til þess að platan sé þvegin. Þriðji á plötuna og sköfuna og hefur komið reglu á hlutina í þessum rokrassi.
Ketiltetur kompaní er sjálfstæður sviðslistahópur sem varð til innan veggja Listaháskóla Íslands haustið 2015. Listrænir stjórnendur og leikarar eru nemar við Sviðslistadeild LHÍ.
AÐSTANDENDUR
Handrit og leikstjórn: Matthías Tryggvi Haraldsson
Aðstoðarleikstjórn og útlit: Alma Mjöll Ólafsdóttir
Framleiðsla og ljós: Stefán Ingvar Vigfússon
Tónlist: Friðrik Guðmundsson
Leikmynd: Klemens Hannigan
Leikarar:
Aron Már Ólafsson – Jósef
Árni Beinteinn – Jens
Hákon Jóhannesson – Styrmir
Ljósmyndari: María Guðjohnsen
Grafísk hönnun: Helga Dögg Ólafsdóttir
Forsala MAMMA MIA! hófst í gærmorgun. Frumsýnt verður 11.mars.
Yfir 54 milljónir manna um allan heim hafa hrifist með og fallið fyrir persónum, sögu og rífandi fjörugri tónlist ABBA í söngleiknum heimsfræga MAMMA MIA. Enn fleiri hafa séð bíómyndina með Meryl Streep í aðalhlutverki en sagan segir frá einstæðri móður sem undirbýr brúðkaup einkadóttur sinnar. Forvitni dótturinnar ungu um uppruna sinn verður til þess að hún býður á laun þremur gömlum kærustum móður sinnar í brúðkaupið í því skyni að komast að því hver þeirra sé faðir hennar. Nú eru góð ráð dýr; feðurnir vilja allir eiga dótturina og móðirin þarf að horfast í augu við skrautlega fortíð sína – úr verður syngjandi skemmtilegur tilfinningarússíbani fyrir alla viðstadda.
Unnur Ösp Stefánsdóttir tekst hér á við einn frægasta söngleik allra tíma með einvala hóp listamanna sér við hlið. Saman bjóða þau okkur uppá ómótstæðilega gleðisprengju, sannkallaða stórsýningu sem hrífur unga sem aldna!
Catherine Johnson (1957) er breskur leikrita- og handritshöfundur, best þekkt fyrir handrit sitt að kvikmyndinni og söngleiknum Mamma mia sem farið hefur sigurför um heiminn.
ABBA (1972) var sænsk popphljómsveit sem sló í gegn um allan heim á áttunda áratugnum. Hljómplötur þeirra eru með söluhæstu hljómplötum allra tíma.
LOKASÝNING Á FÖSTUDAGINN!
Trúðar Borgarleikhússins hafa fært okkur dásamlegar sýningar. Við höfum séð trúðana okkar glíma við dauðasyndir og jólaguðspjallið. Nú hafa þeir tæklað heimspekina og tóku Sókrates sér til fyrirmyndar og spyrja og spyrja og spyrja þangað til við komumst að minnsta kosti skrefi nær því að vita um hvað við getum verið sammála um í heiminum. Trúðum er ekkert óviðkomandi. Í opinni og einlægri nálgun glíma þeir við stóru spurningarnar og eru í senn fyndnir og harmrænir, grimmir og góðir.
Síðasta trúðasýning Borgarleikhússins, Jesús litli, var ótvíræður sigurvegari Grímunnar árið 2010. Jesús litli var valin sýning ársins og leikverkið sjálft var valið leikrit ársins auk þess sem sýningin hlaut sjö Grímutilnefningar. Gagnrýnendur hlóðu sýninguna lofi og áhorfendur voru hrærðir og yfir sig hrifnir.
Verkið verður sýnt á Litla sviði Borgarleikhússins. Leikarar eru Bergur Þór Ingólfsson, Kristín Þóra Haraldsdóttir, Kristjana Stefánsdóttir og Maríanna Lúthersdóttir. Leiksjórar eru Bergur Þór og Rafael Bianciotto.
