Elfar Logi Hannesson og Marsibil G. Kristjánsdóttir, leikhússtjórar Kómedíuleikhússins Haukadal Dýrafirði.
Hve allt var dýrðlegt við annan brag
Þannig kvað vestfirska skáldið Stefán Sigurðsson, auknefndur frá Hvítadal, í einu jólaljóða sinna og bætti við.
á Þorláksmessu, þann þráða dag. Um bekki var strokið og brík og hólf.
Góður og gegn landans siður að gera hreint í sínu húsi fyrir hátíðina miklu nær árslokin nálgast og nýtt frábært ár bíður tilbúið á kantinum. Það er eigi nóg að þrífa bara húsin heldur og rifja upp það helsta frá árinu sem er alveg að kveðja eða einsog áðurnefndur Stefán kvað.
Og allt hið gamla var endurfætt.
Það er einmitt erindi ritara að rifja upp það helsta í starfsemi Kómedíuleikhússins atvinnuleikhús Vestfjarða á því kómíska ári 2024
Kómedíuleikhúsið skartar sínu fegursta í vestfirsku sumarnóttinni.
Blóðugt leikverk að sumri
Kómedíuleikhúsið starfar allt árið og árið 2024 var sannarlega annasamt einsog hér verður rakið í stórum dráttum. Fyrstu tveir mánuðir ársins voru nýttir í að undirbúa verkefni ársins bæði handritsgerð sem og fjármögnun verkefna. Þá nýttum við ekki síður tímann til markaðssetningar á leikhúsinu og tókum m.a. þátt í Mannamótum í Kópavogi hvar við kynntum okkar árlega Sumarleikhús. Næstu tvo mánuði, mars og apríl, unnum við að handritsgerð bæði á sýningu ársins Ariasman sem og að tveimur gönguferðum Fransí Biskví í Haukadal og Around Þingeyri hvort tveggja nýjar göngur í okkar starfi. Á páskum vorum við með sýningar í leikhúsinu okkar í Haukadal bæði á Dimmalimm og Lífið er lotterí, aðsókn var mjög góð. Í framhaldinu sýndum við Dimmalimm á höfuðborgarsvæðinu og í apríl hófust æfingar á Ariasman. Í maí héldu æfingar áfram á Ariasman sem stóðu alveg þar til leikurinn var frumsýndur 29. júní í Djúpuvík. Við frumsýndum einnig nýja vestfirska heimildarmynd Vélsmiðja 1913 á Skjaldborgarhátíðinni á Patreksfirði 19. maí, myndina gerðum við í samstarfi við Austan mána og Yellowleg. Myndin var svo sýnd í Félagsheimilinu á Þingeyri um sumarið. Maí var einnig nýttur til að klæða framhlið leikhússins í Haukadal sem og skifta um glugga og útidyrahurð. Það var því einstaklega gaman að geta byrjað okkar árlega Sumarleikhús Kómedíuleikhússins í Haukadal með nýtt að framan. Var þetta okkar 4 sumarleikhús sumar og hafa aldrei verið jafn margir og fjölbreyttir viðburðir í boði á dagskránni. Þar bar hæst sýning ársins sem var Ariasman, er fjallar um hin hrottalegu og blóðugu Baskamorð. Var leikurinn sýndur vikulega í allt sumar. Við byrjuðum einnig með nýja gönguferð Fransí Biskví hvar gengið var á slóðir Fransmanna í Haukadal. Einnig buðum við áfram upp á okkar vinsælu Gísla Súrsonar göngu. Sýning okkar Lífið er lotterí var sýnd nokkra ganga í sumar og svo fengum við fjölda gestalistamanna til okkar. Af gestaviðburðum Sumarleikhús Kómedíuleikhússins 2024 má nefna tónleika með Svavari Knúti, Jón og Ölmu, Áttavilt og Magnúsi Þór Sigmundssyni. Sagnakveld með Einar Kárasyni og Margréti Höskuldsdóttur. Sirrý var bæði með viðburð fyrir börn og fullorðna. Það gerði einnig Jón Víðis er var bæði með töfrasýningu og dáleiðslu. Þó sumarið hafi verið annasamt í Haukadal þá gáfum við okkur einnig tíma til að vera með enska sögugöngu á Þingeyri er fékk heitið Around Þingeyri og var einkum sótt af skemmtiferðaskipagestum.
Ariasman í Kómedíuleikhúsinu, Haukadal.
Matti og væntanlegur draugagangur
Við gáfum einnig út nýja vestfirska barnabók í sumar, Matti saga af drengum með breiða nefið eftir listahjónin Elfar Loga Hannesson og Marsibil G. Kristjánsdóttur. Hér er á ferðinni bók er fjallar um bernsku hins vestfirska Matthíasar Jochumssonar. Í september fórum við í leikferð til Reykjavíkur og sýndum bæði Lífið er lotterí og Ariasman. Í október vorum við með lestrastundir í skólum og víðar uppúr Mattabókinni vinsælu. Í október fórum við í leikferð til Baskalands, en þar var verið að minnast hinna hrottalegu Baskamorða og fluttum við þar hina einstöku Sönnu frásögu Jóns Lærða á nokkrum stöðum í Baskalandi af því tilefni. Í október og nóvember var okkar aðalstarf handritsgerð og undirbúningur á nýju leikverki er nefnist Draugar Dýrafjarðar. Um er að ræða söguleik sem verður frumsýndur í mesta skammdeginu í Haukadal í Dýrafirði á nýju kómísku ári. Leikurinn er okkar framlag til að bjóða upp á vetrarafþreyingu bæði fyrir heimamenn og ferðamenn á Vestfjörðum. Í desember var að vanda vanda okkar megin starfi að aðstoða jólakallana er koma af fjöllunum og til byggða til að gleðja og kæta. Svona var okkar Kómíska ár 2024.
Án ykkar værum við ósköp klén
Að endingu viljum við þakka áhorfendum, velunnurum og stuðningsaðilum um land allt fyrir komuna í leikhúsið okkar og fyrir að hafa trú á atvinnuleikhúsi Vestfjarða og veita okkur þannig brautargengi til að starfa áfram. Okkar megin markmið verður enn hið sama á nýju ári að starfrækja atvinnuleikhús á Vestfjörðum árið um kring með sérstakri áherslu á okkar árlega Sumarleikhús í Haukadal Dýrafirði. Gaman er að geta þess að sumarið í Sumarleikhúsinu okkar hefur verið að lengjast í báða enda og mun sú þróun halda áfram á komandi ári svo jafnvel verði úr bara endalaust sumarleikhús, það væri nú kómískt.
Vegni ykkur öllum allt að sólu í leik og starfi. Þess óska Elfar Logi Hannesson og Marsibil G. Kristjánsdóttir, leikhússtjórar Kómedíuleikhússins Haukadal Dýrafirði.
YERMA er Kraftmikið nútímaverk sem slegið hefur í gegn.
Hún er kona í blóma lífsins, sjálfsörugg og opinská, eldklár, ákveðin og óhefluð. Henni gengur vel í starfi sínu og er að flytja inn í nýtt hús með manninum sem hún elskar. Það er bara eitt sem vantar – barn. Kærastinn er til í það, og það er ekki eftir neinu að bíða! En það sem virðist svo eðlilegur hluti af lífinu reynist ekki sjálfsagt. Eftir því sem biðin lengist virðist einhver ofursterkur kraftur ná sífellt öflugri tökum á henni. Löngun verður að þrá, þráin að þráhyggju og smám saman missir hún tökin. Hvernig bregst kona við ef lífið verður ekki við hennar heitustu bón?
Hversu langt er manneskjan reiðubúin að ganga til að fá óskir sínar uppfylltar?
Yerma er í seinn leiftrandi, áleitið og átakanlegt nútímaverk sem hefur slegið rækilega í gegn. Leikritið er byggt á samnefndu meistaraverki Federico García Lorca frá árinu 1934 sem gerist í spænsku sveitasamfélagi. Höfundur leikritsins, hinn heimsþekkti leikhúsmaður Simon Stone, flytur atburðarásina inn í borgarsamfélag samtímans og frumkraftarnir í verkinu birtast okkur í nýju ljósi.
Gísli Örn Garðarsson leiðir hér saman einstaklega sterkan hóp leikara í fádæma kraftmiklu verki. Það er óhætt að lofa magnaðri kvöldstund.
Borgarleikhúsið hefur tryggt sér sýningarétt á söngleiknum Moulin Rouge!
Borgarleikhúsið hefur tryggt sér sýningarrétt á nýrri útfærslu Nordiska Production á Moulin Rouge! söngleiknum sem frumsýndur verður á Stóra sviðinu í september 2025.
Moulin Rouge! söngleikurinn byggir á Óskarsverðlaunamynd Baz Luhrmann frá árinu 2001 sem skartaði þeim Nicole Kidman og Ewan MacGregor í aðalhlutverkum. Árið 2018 leit söngleikurinn dagsins ljós í Boston og ári síðar var hann frumsýndur á Broadway þar sem hann gengur enn fyrir fullu húsi. Sýningin hlaut tíu Tony® verðlaun, meðal annars sem besti söngleikurinn, fyrir leikstjórn, kóreógrafíu og tónlistarútsetningu.
Líkt og í kvikmynd Baz Luhrmann er tónlistin í söngleiknum listilega fléttuð saman úr lögum og tónverkum úr ýmsum áttum, þar á meðal mörgum af þekktustu slögurum tónlistarsögunnar allt frá Bizet til Bowie og Beyonce.
Íslandsfrumsýning í leikstjórn Brynhildar Guðjónsdóttur
Söngleikurinn Moulin Rouge! gerist í París þar sem söngvaskáldið Christian kemur til borgarinnar í leit að innblæstri. Honum er tekið opnum örmum af bóhemum Montmartre sem vinna að söngleik sem þá dreymir um að verði settur upp í Rauðu Myllunni. Skáldið unga slæst í lið með þeim en verður ástfanginn af stjörnu Myllunnar – hinni óviðjafnanlegu Satine.
Leikstjóri íslensku uppfærslunnar verður Brynhildur Guðjónsdóttir, leikhússtjóri Borgarleikhússins. Tónlistarstjóri er Jón Ólafsson og þýðing er í höndum Braga Valdimars Skúlasonar. Uppsetning Borgarleikhússins á Moulin Rouge! söngleiknum verður stórbrotin upplifun fyrir augu, eyru og hjarta. Öllu verður til tjaldað hvað varðar leik- og hljóðmynd og besta sviðslistafólk landsins fengið til að flytja okkur inn í grípandi heim Rauðu Myllunnar í París 1899!
„Það er stórkostleg tilfinning að geta loksins greint frá því að söngleikurinn Moulin Rouge! sé á leið í Borgarleikhúsið.“ Segir Brynhildur Guðjónsdóttir, leikhússtjóri. „Við erum búin að vinna lengi að því að tryggja okkur titilinn og nú hefst undirbúningurinn fyrir alvöru. Það fer óneitanlega fiðringur um leikstjórann að vera að stíga inn í heim Rauðu myllunnar sem Baz Luhrmann gerði ódauðlega í rómaðri kvikmynd sinni. Eldheit ástarsaga, stórkostleg tónlist og gildi bóhemanna ofar öllu: frelsi, fegurð, sannleikur, ást. Það gerist ekki heitara – verið velkominn í Rauðu mylluna!“
Sigurför söngleiksins Moulin Rouge! víða um heim
Söngleikurinn Moulin Rouge! hefur verið sýndur víða um heim. Borgarleikhúsið tryggði sér réttinn til að sýna verkið í gegnum réttindaskrifstofu Nordiska sem fer með sýningarrétt nýrrar útfærslu (e. non replica) söngleiksins á Norðurlöndum. Þar með fylgir Reykjavík í fótspor Osló, Stokkhólms, Helsinki og Kaupmannahafnar þar sem söngleikurinn hefur verið settur upp frá haustinu 2023 við gríðarlegar vinsældir og einróma lof gagnrýnenda.
Um Moulin Rouge í París
Moulin Rouge í París, undir forystu Jean-Jacques Clerico, forstjóra, er stórbrotinn, glæsilegur heimur og tákn fyrir Parísarskemmtanir allt frá árinu 1889. Upphaflega opnaði staðurinn sem vinsæll kabarett- og dansstaður en öðlaðist sess sem goðsagnakenndur vettvangur fyrir tónleikasýningar á þriðja áratug 20. aldarinnar, og síðar sem leikhús þar sem margir frægir franskir og alþjóðlegir listamenn tróðu upp. Í dag býður Moulin Rouge upp á revíusýninguna Féerie, þar sem 60 flytjendur taka þátt í tveggja tíma flutningi þar sem skipt er á milli dansatriða, og óvæntra uppákoma – þar á meðal hins fræga franska Can-can dans!
Frá upphafi hefur Moulin Rouge boðið gestum sínum að upplifa gleði og tilfinningar í gegnum einstakar og íburðamiklar skrautsýningar.
Um Moulin Rouge! söngleikinn
Moulin Rouge! söngleikurinn var heimsfrumsýndur í Boston 2018 og náði fljótt alþjóðlegri velgengni. Ári síðar var söngleikurinn frumsýndur á Broadway þar sem hann fékk mikið lof áhorfenda jafnt sem gagnrýnenda og vann til tíu Tony verðlauna. Velgengni söngleiksins hefur haldið áfram og er söngleikurinn enn sýndur fyrir fullu húsi á Broadway auk þess hann er sýndur í London, Köln, Utrecht og á leikferð í Norður Ameríku. Sýningarferð um heiminn hefst í Edinburgh í apríl 2025. Fyrri sviðssetningar hafa meðal annars verið í Tokyo og Osaka (2023 og 2024), Seoul (2023) og sem hluti af ástralskri leikferð árin 2021-2024.
Framleiðandur Moulin Rouge! söngleiksins eru Carmen Pavlovic og Gerry Ryan hjá Global Creatures ásamt Bill Damaschke.
Lápur, Skrápur og jólaskapið er sannkölluð fjölskyldusýning.
Litli leikklúbburinn frumsýndi jólaleikritið Lápur, Skrápur og jólaskapið eftir Snæbjörn Ragnarsson, í leikstjórn Tinnu Ólafsdóttur um liðna helgi en þetta er fyrsta verkið sem Tinna leikstýrir. Uppselt var á báðar sýningarnar um helgina og fóru leikhúsgestir uppfullir af jólaskapi af sýningunni. Miðasala er í fullum gangi á sýningarnar á næstu helgi.
Lápur, Skrápur og jólaskapið er sannkölluð fjölskyldusýning, þar sem börn á öllum aldri tengd aðstandendum sýningarinnar sátu æfingar og syngja nú lögin úr sýningunni heima hjá sér (að minnsta kosti er það raunin á heimili formannsins). Lápur, Skrápur og jólaskapið er annað verkið sem Litli leikklúbburinn sýnir á árinu. Félagið fer ört stækkandi og sumir meðlimir eru að stíga sín fyrstu skref á sviði í sýningunni.
Skúli Þórðarson og Þórður Jóhann Guðbrandsson eiga stórleik sem tröllastrákarnir Lápur og Skrápur sem reknir eru úr Grýluhelli til að finna jólaskapið, þar sem þeir eru ekki hellum hæfir svona stutt í jól, hrekkjóttir og óþekkir. Bræðurnir hitta mannabarnið Sunnu sem vill allt geta til að aðstoða þá við að finna jólaskapið. Anna Ásgerður Hálfdánardóttir og Salka Gallo skipta með sér hlutverki Sunnu og hefur það verið aðdáunarvert að sjá svo ungar stelpur leggja þessa miklu vinnu á sig og skína á sviðinu, hvor á sinn hátt. Grýlu, Leiðindaskjóðu og Gáttaþef bregður einnig fyrir í leikritinu en með hlutverkin fara Hjördís Þráinsdóttir, Sædís Ólöf Þórsdóttir og Sveinberg Þór Birgisson.
Lápur, Skrápur og jólaskapið er frábær 50 mínútna jólasýning fyrir alla fjölskylduna sem kemur öllum í jólaskap og við hlökkum til að finna jólaskapið með góðum gestum að minnsta kosti tvisvar í viðbót um næstu helgi.
Köttur á heitu blikkþaki Tímalaus klassík Tennessee Williams í leikstjórn Þorleifs Arnar.
Í þessu meistaraverki Tennessee Williams kemur fjölskylda saman til að fagna stórafmæli föðurins, en þegar líða tekur á kvöldið er fögnuðurinn fljótur að snúast upp í andhverfu sína. Erfðadeilur, sálarflækjur og kynferðisleg spenna leiða persónur verksins á tilfinningaleg jarðsprengjusvæði, þar sem baráttan fyrir tilverunni, frelsinu og sannleikanum tekur yfir. Hvað erum við tilbúin að gera til að horfast ekki í augu við raunveruleikann?
Þorleifur Örn er þekktur fyrir umfangsmiklar sýningar og listræn stórvirki, en í þetta sinn tekst hann á við sígilt verk með innilegri nálgun og mögnuðum leikhópi. Þetta magnaða verðlaunaverk hefur aðeins einu sinni áður verið sett á svið í atvinnuleikhúsi á Íslandi en um fádæma vinsældir þess þarf ekki að fjölyrða.
Sýningarréttur: Nordiska ApS, skv. sérstöku samkomulagi við The University of the South, Sewanee, Tennessee.
Séríslenskur jólasöngleikur í bæjarleikhúsinu í Mosfellsbæ
Sangríuþyrstir ferðalangar freista þess að sleikja sólina á sólarströnd yfir jólin en bregður í brún þegar amstur jólanna eltir þau alla leið til Spànar og ógnar jólafriðinum.
Ylur er nýr sprenghlægilegur íslenskur jólasöngleikur með þekktum jólalögum í nýjum búningi eftir Aron Martin Ásgerðarson og Ástrósu Hind Rúnarsdóttur.
Leikstjóri er Aron Martin Ásgerðarson og tónlistarstjóri Þorsteinn Jónsson.
Heimur bókanna opnast með Hallgrími Helgasyni í Borgarleikhúsinu.
Hallgrímur Helgason er margverðlaunaður metsöluhöfundur sem fangað hefur hug og hjörtu þjóðarinnar með verkum sínum um fólkið í sjávarþorpinu Segulfirði í bókum sínum Sextíu kíló af sólskini, Sextíu kíló af kjaftshöggum og þriðju bókinni, Sextíu kíló af sunnudögum sem kom út nú í haust.
Hallgrímur er kunnur sögumaður og hefur haldið gríðarlega vinsæl námskeið þar sem hann opnar bækurnar upp á gátt fyrir lesendum sínum og nú gerir hann gott betur og býður gestum til sætis á Litla sviði Borgarleikhússins. Á sviðinu rekur hann frásögnina í gegnum skáldsögurnar af alkunnri list, les upp úr bókunum. lyftir hulunni af vinnuferlinu, baksögunum og innblæstrinum og gæðir persónur sínar lífi sem aldrei fyrr.
Leikfélagið Borg sýnir hinn sprenghlægilega farsa Svörtu kómedíuna í Félagsheimilinu Borg. Svarta kómedían er sprenghlægilegur farsi um ungan mann sem þarf að kljást við þrjá elskhuga sína, tannhvassan verðandi tengdaföður, og heyrnalausan miljónamæring – og það allt í algjöru rafmagnsleysi á regnvotu sunnudagskvöldi í London ca. 1965. Ungur listamaður og mikill elskandi að nafni Brindsley býr í hrörlegri íbúð í London sem hann er búinn að laga aðeins til fyrir kvöldið. Hann er kominn með nýja unnustu og á von á stórfenglegu kvöldi með afar mikilvægum gestum. Á ögurstundu fer rafmagnið af húsinu og í einni hendingu er kvöldið komið af sporunum … og lengi getur vont versnað.
Leikfélag Hafnarfjarðar hefur lokið störfum í bili eftir 88 ár.
Starfsemi Leikfélags Hafnarfjarðar hefur verið lögð niður, skv. ákvörðun aðalfundar þann 29. október 2024. Leikfélagið þakkar öllum félögum sínum og áhorfendum í gegnum tíðina fyrir samstarfið, leikinn, vináttuna, stuðninginn og gleðina, og fyrir að gera LH að þeim einstaka gullmola sem það hefur verið.
Þessi ákvörðun átti sér afar langan aðdraganda og var tekin einróma af fundarmönnum, en fundinn sátu félagar sem flestir hafa starfað áratugum saman hjá leikfélaginu. Þó ákvörðunin hafi reynst félagsmönnum afar þungbær, er þakklæti þó efst í huga fyrir þann fjársjóð sem félagið skilur eftir sig.
Úr skýrslu formanns á aðalfundi:
„Hafnarfjarðarbær eða íbúar í bænum geta hvenær sem er kosið að endurvekja starfsemi félagsins. Það er ósk okkar að svo verði, að stjórnendur bæjarins sjái mikilvægi þess að styðja við áhugaleikhúsið sem valkost í flóru lífsgæðaeflandi félagsstarfs fyrir íbúa bæjarins. Við höfum ítrekað lagt áherslu á að áhugaleikfélagið sé heilsueflandi og að það sé lýðheilsumál að fólk hafi kost á því að skapa og læra og þroskast og dafna og tjá sig í því hlýja og uppbyggjandi umhverfi sem áhugaleikfélagið er. Leikfélag Hafnarfjarðar hefur verið athvarf og andlegt heimili fyrir mörg og reynst jafnvel lífsbjörg fyrir sum. Í leikfélaginu er pláss fyrir alla en því miður er ekki alltaf pláss fyrir leikfélagið. Þannig er bara lífið. Þess vegna erum við á þessum tímamótum í dag og tilbúin til þess að leita á önnur mið þar sem okkur er tekið opnum örmum. Við erum tilbúin til þess að kveðja félagið okkar, sátt og þakklát, því við sem vorum félagið getum haldið áfram starfinu annars staðar og verðum áfram félagar í listinni um ókomna tíð.
Leikfélag Hafnarfjarðar mun lifa í frásögnum og heimildum og ekki síst í minningum okkar allra sem höfum iðkað leiklistina undir merkjum félagsins. Leikfélag Hafnarfjarðar deyr aldrei, það bara leggur sig um stund og safnar kröftum og fer svo fíleflt aftur í gang þegar aðstæður innan bæjarins eru því hagstæðari.
Leikfélag Flateyrar setur upp sígilda ævintýrið um Bláa hnöttinn eftir Andra Snæ Magnason.
Villibörnin sem búa á hnettinum verða logandi hrædd þegar geimskip brotlendir. En ógurlega geimveran reynist vera hinn galsafulli Gleði-Glaumur. Hann lofar þeim endalausu fjöri og enn meira stuði í skiptum fyrir dass af æsku þeirra. En hvers virði er æskan? Og er hægt að fá hana til baka? Komið með í langhættulegasta ævintýri sem gerst hefur á Bláa hnettinum fyrr eða síðar.
Sýningartími: 90 mínútur. Stórskemmtileg sýning sem hentar allri fjölskyldunni.
Miðaverð: Forsöluverð: kr. 3.500. Miðaverð eftir 12 nóv. kr. 3.900. Nemendaverð kr. 3.000. (Leik-,grunn-,framhalds-, og -lýðskóla) Miðaverð við hurð kr. 4.500.
