Hátíðarsýning verður á Árum, álfum og tröllum, leiksýningu Leikfélags Sólheima í Þjóðleikhúsinu 24. maí næstkomandi. Leikfélag Sólheima var stofnað árið 1931 og á því 90 ára afmæli í ár.
Leikritið Árar, álfar og tröll var frumsýnt í Sólheimaleikhúsinu á sumardaginn fyrsta, þann 22. apríl sl. Sýningin sló rækilega í gegn og uppselt varð á allar sýningarnar fimm. Verkið er skrifað af Hannesi Blandon og Guðmundi Lúðvík Þorvaldssyni en Lárus Sigurðsson gerði tónlistina. Verkið er skrifað sérstaklega í tilefni 90 ára afmælis Sólheima og er byggt á sögu Sesselju Hreindísar Sigmundsdóttur, stofnanda Sólheima. Sagan er sett í ævintýralegan búning. Guðmundur Lúðvík leikstýrir verkinu en hann er leikfélaginu að góðu kunnur þar sem þetta er í fimmta sinn sem hann leikstýrir á Sólheimum. Fjöldi íbúa Sólheima kemur að verkinu, bæði í leikhlutverkum og bakvið tjöldin.
Verkið er ævintýri sem fjallar um baráttukonuna Sesselju sem á sér þann draum að opna barnaheimili þar sem allir geta lifað í sátt og samlyndi. Til þess að láta draum sinn rætast þarf hún að takast á við konungsríki og alls kyns verur, svo sem álfa og tröll. Löng hefð er fyrir því hjá Leikfélagi Sólheima að frumsýna á sumardaginn fyrsta og var engin undantekning á því í ár. Leikhópurinn er sérstaklega spenntur fyrir hátíðarsýningu í Þjóðleikhúsinu á 90 ára afmæli sínu.
Þjóðin er orðin veisluþyrst og Veisla er kærkomin vökvun eftir langa þurrð. Á meðan heimsfaraldri stendur kemst þjóðin ekki í neina stóra veislu. Hugsa sér öll afmælin sem enginn getur mætt í, árshátíðirnar, útskriftarveislurnar, brúðkaupin, kóramótin og matarboðin. Að ekki sé minnst á alla óbökuðu heitu brauðréttina og kransakökurnar sem aldrei verða snæddar eða freyðivínið sem aldrei verður dreypt á úr plastglösum á völtum fæti. Þá eru ótalin löngu trúnóin við hálfókunnugar konur, slúður um valdamikið fólk, hátt spiluð lög og grillaðar pylsur á miðnætti. Þjóðin á inni risa summu í Gleðibankanum og við bjóðum áhorfendum í allt sem þeir hafa misst af í einni stórkostlegri Veislu í Borgarleikhúsinu.
Hér sameina krafta sína þau Bergur Þór Ingólfsson, þaulreyndur leikhúsmaður og Saga Garðarsdóttir, fyndlistakona, en síðast unnu þau saman við hina geysivinsælu sýningu Kenneth Mána sem frumsýnd var á Litla sviði Borgarleikhússins árið 2014. Partýpinninn Berndsen gerir tónlistina og Veisla verður því bragðgóð en görótt blanda af grínsketsum sem leikhópurinn skrifar saman og tónlist sem svarar áleitnum spurningum á borð við hvort tartalettur séu góðar í alvörunni og hversu hratt skuli ganga um gleðinnar dyr.
Leikfélag Sauðárkróks heismsfrumsýnir nýtt verk sem heitir Frívaktin
Leikfélag Sauðárkróks fagnar á þessu ári 80. ára afmæli en 9 janúar á þessu ári eru 80 ár síðan félagið var endurstofnað. Af því tilefni var heimsfrumsýnt nýtt verk sem heitir Á frívaktinni. Höfundur þess og leikstjóri er Pétur Guðjónsson.
Sögusviðið er sjávarþorp, einhvers staðar á Íslandi á tímum síldaráranna þegar síldin var duttlungarfull og hafði mikil áhrif á lífsgæðin í sjávarþorpunum. Sagan gerist á þeim tímum þegar síldin er að hverfa frá Íslandsströndum. Daníel er tvítugur sendill hjá Kaupfélaginu en dreymir um að komast á sjó. Hann hefur reynt að komast að hjá Stjána bláa, skipstjóra á Aðalsteini Jónssyni en hefur ekki átt erindi sem erfiiði. En hann þráir ekkert heitar en að komast á sjó, verða ríkur og koma undir sig fótunum. Hann hefur engan tíma fyrir konur og ætlar sko ekkert að stofna fjölskyldu, enda er það fjölskyldumynstur sem hann þekkir ekki svo gæfulegt. Móðir hans er kölluð Gerða tvöfalda og pabbi hans, Siggi lamaði er búinn að gefast upp á lífinu. En örlögin grípa í taumana og Daníel fær tækifæri á sjónum en örlögin spinna þráðinn einnig þegar hann kynnist Guðrúnu, nýju stúlkunni í plássinu. Þau fella hugi saman en það eru ýmis öfl sem reyna að koma í veg fyrir það. Daníel kynnist því ýmsu mótlæti, þrátt fyrir að hafa komist á sjóinn. Sagan snertir því ýmsa strengi í gleði og sorg, er í senn falleg og fjörug, með þekktum sjómannalögum eins og Ship og hoj, Einsi kaldi, Þórður sjóari, Á sjó, Síldarstúlkan og Allt á floti, ásamt fleiri þekktum lögum.
Alheimsfrumsýning sýningarinnar var föstudaginn 7 maí. Æfingargferlið og aðdragandinn að sýningunni hefur verið óvenju langt þar sem var byrjað á verkinu í fyrra. Miðapantanir eru í síma: 849-9434
Borgarleikhúsið leitar að krökkum á aldrinum 8–12 ára til að fara með hlutverk Emils og Ídu í sýningunni Emil í Kattholti sem frumsýnd verður á Stóra sviðinu næsta vetur. Skráning í prufur er til og með 13. maí. Í prufunni þarf að syngja lag og taka þátt í leiklistarleikjum.
Áætlað er að æfingar á Emil í Kattholti hefjist snemma í haust 2021. Vertu með!
Hygðust frumsýna þann 1. Apríl en allt fór úrskeiðis
Kómedíuleikhúsið vinnur hörðum höndum þessa dagana að æfingum á uppsetningu brúðuleikritsins Bakkabræður sem fjallar um ævintýri hinna þjóðþekktu bræður Gísla, Eirík og Helga. Í sýningunni eru kostuleg ævintýri Bakkabræðra sett í spaugilegan búning með töfrum brúðuleikhússins.
Kómedíuleikhúsið kemur nú tvíelft tiltaka eftir síðasta samkomubann og ætlar sér að frumsýna Bakkabræður með pomp og prakt þann 22. Maí í Kómedíuleikhúsinu í Haukadal, Dýrafirði en þetta verður önnur tilraun leikhússins til að frumsýna verkið. Hvern hefði órað fyrir að eitthvað gæti farið úrskeiðis við að frumsýna verk um klaufabárðana sem Bakkabræður eru, þann 1. apríl?
Lögin í sýningunni eru sungin af Diddú við tónlist sem Björn Thoroddsen, gítarleikari, samdi og flytur. Marsibil G. Kristjánsdóttir hannar ævintýraheim leiksýningarinnar og gerir brúðurnar sömuleiðis. Leikari og þjónn brúðanna er Elfar Logi Hannesson, sem einnig er höfundur verksins ásamt Sigurþóri A. Heimissyni sem jafnframt leikstýrir.
Leikfélagið Verðandi í FG sýnir Leg eftir Hugleik Dagsson
Leikfélagið Verðandi kynnir Leg eftir Hugleik Dagsson. Leikstýrt af Birnu Rún Eiríksdóttir, danshöfundur Þórey Birgisdóttir.
Við erum stödd í Garðabæ framtíðarinnar. Kata 19 ára nemi í Fjölbraut kemst að því að hún er ólétt, foreldrar hennar eru að skilja og kærastinn hennar að hætta með henni. Kata tekst á við miklar breytingar á meðan hún þarf að ákveða hvort hún ætli að eiga barnið. En hver er pabbinn? Gæti þessi erfingi mögulega breytt öllu?
Hér mætir svarti húmor Hugleiks frábærri tónlist Flís og útkoman er sprenghlægilegur söngleikur sem við öll höfum beðið eftir.
Aðalfundur Bandalags íslenskra leikfélaga var haldinn á Park Inn hótelinu í Reykjanesbæ um helgina. Í ljósi aðstæðna var fundurinn stuttur og fámennur en engu að síður skilvirkur og skemmtilegur. Á dagskrá voru venjulega aðalfundarstörf en auk þess var samþykkt lagabreyting sem opnar fyrir möguleika á ræfrænni þátttöku á aðalfundum. Þá var einnig samþykkt tillaga stjórnar að stofnun húsnæðissjóðs fyrir samtökin. Aðalfundargerð mun birtast á Leiklistarvefnum innan tíðar. Eftir fund bauð Leikfélag Keflavíkur fundargestum að skoða hið glæsilega Frumleikhús þar sem félagið starfar.
„Gosi er allt í senn falleg, fyndin og töfrandi sýning sem enginn leikhúsunnandi ætti að láta framhjá sér fara.“
Trésmiðurinn Jafet kemst yfir talandi viðardrumb og fær þá hugmynd að smíða úr honum brúðu. Til verður spýtustrákurinn Gosi; forvitinn prakkari sem á erfitt með að feta hinn rétta veg. Í stað þess að hlýða föður sínum heldur hann á vit vafasamra ævintýra, kynnist talandi kribbu sem reynir að koma fyrir hann vitinu, lætur undirförulan kött og ref snúa á sig og þarf að ganga í gegnum alls konar hremmingar áður en hann kemst til þroska með dyggri hjálp bláhærðu dísarinnar.
Leikarar og tónlistarmenn sýna okkur þetta sígilda og ástsæla ævintýri um spýtustrákinn í nýjum og litríkum búningi. Leikstjóri sýningarinnar, Ágústa Skúladóttir, hefur leikstýrt fjölda barna og fjölskyldusýninga sem ávallt hafa notið mikilla vinsælda.
Boðið er upp á alla sunnudaga að hafa sýninguna textaða á ensku, íslensku og pólsku. Þeir sem vilja nýta sér þessa þjónustu standa til boða að sækja smáforrit fyrir snjallsíma og valið á milli þess að fylgjast með textanum á meðan á sýningu stendur.
Söngvasyrpan Litla Gula Hænan ferðast um landið í sumar
Kæru vinir, fylgjendur og allir sem bíða spenntir eftir upplýsingum frá Leikhópnum Lottu um sumarið 2021.
Á þessum fordæmalausu tímum höfum við öll þurft að hugsa út fyrir kassann og haga lífi okkar í samræmi við þær reglur sem gilda á hverjum tíma.
Við í Leikhópnum Lottu leggjum mikið upp úr því að framleiða og setja upp vandaðar sýningar og skemmtiatriði sem henta við öll tækifæri. Sýningar sem við ferðumst með um allt land, allt árið um kring. Covid hefur sett stórt strik í reikninginn hjá okkur síðasta árið, eins og hjá flestum öðrum, og mun því miður halda áfram að gera það eitthvað lengur.
Í vetur neyddumst við til að fella niður okkar árlegu vetrarsýningu sem stefnt var á að sýna í Tjarnarbíói og ferðast með um landið. Sýningin um Mjallhvíti og dvergana sjö hefði orðið fjórða vetrarsýning Lottu en á veturna höfum við gert það að hefð að endurgera eldri sumarsýningarnar okkar 10 árum seinna og klætt þær í glænýjan búning innandyra. Covid hefur ákveðið að fresta þessum áformum okkar og stefnir allt í að Mjallhvít fari á fjalirnar í janúar 2022, 11 árum eftir að við frumsýndum hana fyrst.
Við höfum einnig þurft að taka aðra erfiða ákvörðun varðandi sumarið. Með sorg í hjarta neyðumst við til að tilkynna að í sumar munum við ekki setja upp nýja sýningu eins og við höfum gert með stolti síðastliðin 14 ár. Ákvörðunin var tekin fyrst og fremst til að vernda Lottuna okkar og passa að hún fari hreinlega ekki á hausinn sökum kostnaðar við uppsetningu og óvissu með leyfi til sýninga og fjöldatakmarkanir sökum Covid.
Sannleikurinn er sá að kostnaðurinn við sýningu af þessari stærðargráðu er gríðarlega hár. Handrit, lagasmíð, söngtextar, leikstjórn, leikarar, tónlistarupptaka, danshöfundur, búningahönnuður, ljósmyndir, auglýsingar, grafík, leikmynd, leikmunir, gisting, bíll, kerra og svo mætti lengi telja. Á hverju ári tökum við áhættu á þessum kostnaðarliðum öllum og vinnum hörðum höndum að því að ná þeim kostnaði inn yfir sumarið með seldum sýningum, ferðastyrkjum og miðasölu.
Þegar fyrsta samkomubannið var sett á síðasta vetur vorum við á sýningarferðalagi með Hans klaufa, vetrarsýninguna okkar 2020. Vegna sóttvarnaraðgerða þurftum við að fella niður fjölda sýninga og hætta sýningum á verkinu mun fyrr en áætlað var. Stór hluti af innkomu sýningarinnar fór því út um gluggann og varð Lotta fyrir miklu fjárhagslegu tapi vegna þess.
Við héldum þó bjartsýn af stað inn í síðasta sumar og gerðum það algjörlega með trompi. Bakkabræður sumarið 2020 var frábær sýning sem við erum mjög stolt af og hlaut hún mikið lof áhorfenda. Við nutum þess virkilega að sýna sýninguna um allt land, finna upp ýmsar lausnir til að geta fylgt öllum sóttvarnarreglum til hins ýtrasta og geta boðið upp á frábæra leikhúsupplifun á slíkum tímum. En þó sumarið hafi verið algjörlega dásamlegt fengum við helmingi færri áhorfendur en á venjulegu sumri og verður að viðurkennast að Lotta hefði líklega farið á hausinn í haust ef ekki hefði verið fyrir verkefnastyrk sem við hlutum en hann rétt hélt verkefninu á floti. Þrátt fyrir styrkinn kom Lottan okkar virkilega illa út úr sumrinu og árinu öllu. Þess má geta að engin úrræði stjórnvalda (lokunarstyrkir, hlutabótaleiðin…) hafa verið í boði fyrir félög eins og Lottu og engir styrkir verið veittir fyrir verkefni og vinnu sem þegar hefur verið unnin að fullu en ekki hefur verið hægt að sýna áhorfendum. Styrkirnir sem hafa verið veittir til leikfélaga eru fyrir nýjar sýningar sem á eftir að setja upp dekka nýjan kostnað en ekki skuldir sem hafa orðið til vegna Covid 19.
Þegar kom í ljós við veitingu listamannalauna og verkefnastyrkja fyrir árið 2021 að Lotta fengi enga úthlutun fyrir sumarið hreinlega neyddumst við til þess að taka þá mjög erfiðu ákvörðun að fara ekki af stað í nýja sumarsýningu eins og við höfum gert síðastliðin 14 ár. Okkur þykir það svakalega sárt, en við ráðum víst lítið við ástandið og þessar aðstæður sem við erum öll í. Þetta sumar hefði verið 15. starfssumar Leikhópsins Lottu, en 15. sumarsýningin verður að bíða betri tíma.
SITJUM EKKI AÐGERÐALAUS
Við munum þó aldeilis ekki sitja aðgerðalaus í sumar. Það verður annar bragur á okkur þetta árið en við stefnum á að ferðast um landið allt og heimsækja alla sem við mögulega getum.
ÞAÐ SEM VERÐUR Í BOÐI Í SUMAR
Pínu litla gula hænan – söngvasyrpa Í sumar ferðumst við um allt land með skemmtilegt atriði unnið upp úr Litlu gulu hænunni, verki sem við sýndum árið 2015. Atriðið verður um 25 mínútur að lengd, stútfullt af söng, sprelli og fjöri fyrir allan aldur. Fjórir þekktir Lottu leikarar mæta á svæðið með frábært skemmtiatriði sem hentar vel við öll tækifæri.
Pínu litla gula hænan – söngvasyrpa verður eingöngu í boði fyrir þá sem kaupa hana í heilu lagi og þó einstaklingar og fjölskyldur landsins geti ekki tryggt sér miða á glænýjan íslenskan Lottusöngleik þetta árið – þá er möguleiki fyrir bæjarfélög, hátíðir, fyrirtæki, hópa, skóla, leikskóla, frístundaheimili og bara hvern sem er að bóka Pínu litlu gulu hænuna og bjóða uppá, að sjálfsögðu miðað við þær samkomutakmarkanir sem eru í gildi hverju sinni.
Við mætum þá á svæðið með frábært atriði sem auðvelt er að laga að hvaða aðstæðum sem er! Sýninguna er hægt að setja upp utandyra sem er einstaklega sóttvarnavænt en svo er lítið mál að færa hænuna inn á þeim stöðum sem það hentar betur. Við höldum fjarlægð við áhorfendur, mætum sprittuð frá toppi til táar, bjóðum upp á wi-five í stað high five, myndir með fjarlægð í stað knúsa og að sjálfsögðu risastórt bros á vör!
