Björt í sumarhúsi er nýr íslenskur söngleikur fyrir börn á öllum aldri eftir Elínu Gunnlaugsdóttur og Þórarin Eldjárn. Textinn byggir á ljóðum úr bókinni „Gælur, fælur og þvælur“. Leikstjóri er Ágústa Skúladóttir, Kristina Berman gerir leikmynd og búninga. Næatu sýningar eru kl. 13.00 og 15.00 laugardaginn 14. febrúar.

Sagan segir frá barni í pössun hjá afa sínum og ömmu í sumarbústað en þar er lítið við að vera og barninu leiðist. Í bústaðnum eru engin nútímatæki eins og tölvur og snjallsímar. Afinn og amman reyna að hafa ofan af fyrir barninu, en það gerist æ óþægara.

Glói gullfiskur, fiskifluga, könguló, draugur og fleiri koma við sögu en að lokum finnast bækur í bústaðnum og barnið kemst í ró. Verkið er ærslakennt og er tónlistin í anda verksins, létt og leikandi. Björt í sumarhúsi er einlæg og bráðskemmtileg fjölskyldusýning sem á ríkt erindi við íslensk börn í samtímanum.

Söngleikurinn var frumsýndur í Hörpu 1. febrúar og var framlag Töfrahurðar til tónlistarhátíðarinnar Myrkir músíkdagar. Aukasýningar í Tjarnarbíói hefjast 14. febrúar.

Björt í sumarhúsi er samstarfsverkefni Töfrahurðar og Óperarctic félagsins.

Hver ert þú og hvað ertu að gera í dag?
Ég er stjórnandi Útvarpsleikhússins á RÚV og er jafnframt dagskrárgerðarmaður á Rás 1. Þar nýtist afar vel menntun mín og reynsla sem leikari og leikstjóri. Ég hef helgað líf mitt leiklist, einfaldlega vegna þess að ekkert annað hefur heillað mig meira. En ég er þó enn að leita að fleiri möguleikum í lífinu til að hrífa mig… Það er aldrei að vita nema eitthvað nýtt verði á vegi mínum… Lífið er svo óútreiknanlegt.
 
 
Í hvaða stjörnumerki ertu?
Tvíburamerkið.
 
Hvað ætlaðir þú að verða þegar þú yrðir stór?
Leikhúslistamaður.
 
Hver er þinn helsti kostur og helsti galli?
Helsti kostir mínir eru skipulagshæfileikar og hugmyndaauðgi. Helstu gallar eru einnig þeir sömu, auk hvatvísi, sem getur nú stundum líka verið kostur.
 
Hver er uppáhaldsmaturinn þinn?
Allur matur úr fersku og hreinu hráefni sem Sveinn Kjartansson maðurinn minn og veitingamaður á AALTO Bistro eldar.
 
Hvaða sýningu sástu síðast í leikhúsi?
Ekki hætta að anda.
 
Hvaða áhugamál áttu þér?
Leiklist og mannlíf í sinni fjölbreyttustu mynd.
 
Hvernig tónlist hlustar þú mest á?
Þar sem fegurðin ríkir með hæfilegum skammti af drama.
 
Hvað fer mest í taugarnar á þér?
Óstundvísi og ónákvæmni.
 
Hver er þinn uppáhaldsstaður á Íslandi?
Svartir sandar örævanna.
 
Hver er þinn uppáhaldsstaður erlendis?
Þar sem enginn þekkir mig.
 

Flytja til London eða New York?
New York.
 
Eiga hund eða kött?
Hund.
 
Borða heima heima eða úti daglega?
Heima.
 
Finnst þér betra að vinna á morgnana eða kvöldin?
Morgnana.
 
Hvort drekkurðu bjór eða vín með matnum?
Bjór.
 
Hvort finnst þér skemmtilegra að lesa eða horfa á sjónvarp?
Lesa.
 
Hvort manstu betur: Nöfn eða andlit?
Andlit.
 
Veldu: Sturtu eða bað?
Sturtu.
 
Veldu: RÚV eða Stöð 2?
Rúv.
 
Ef þú ættir að lýsa þér í einu orði – hvaða orð væri það?
Ófyrirsjánlegur (vona ég!)
 

· Forsala á hófst í morgun

· Mikill áhugi á sýningunni

· Verið að bæta starfsfólki í miðasöluna

Í morgun kl 10 hófst forsala á Billy Elliot sem verður frumsýnt 6.mars. Á hádegi höfðu yfir 10 þúsund leikhúsgestir tryggt sér miða og er augljóslega mikill áhugi á sýningunni. Forsölutilboðið er einungis í dag og er verið að bæta fólki í miðasöluna til að anna eftirspurn.

„Þetta er eiginlega fyrst raunverulegt núna að þetta sé að fara að bresta á, sérstaklega þegar maður sér hvað það er mikill áhugi á sýningunni. Það er smá fiðringur í maganum svona blanda af stressi og spennu yfir því að sjá þetta lifna við á sviðinu” Segir Bergur Þór Ingólfsson leikstjóri.

Sýningin er sú stærsta sem Borgarleikhúsið hefur sett upp en 68 listamenn taka þátt í henni, það eru 33 börn, 24 fullorðnir og 11 hljómsveitarmeðlimir. Frumsýning er áætluð 6.mars. Þrír glæsilegir ungir strákar deila aðalhlutverkinu og leikstjóri er Bergur Þór Ingólfsson.

Verkið Billy er á leiðinni í boxtíma þegar hann lendir fyrir slysni á dansæfingu. Hann byrjar að hreyfa sig í takt við tónlistina og uppgötvar sér til furðu að þetta er ekki einungis það skemmtilegasta sem hann hefur gert heldur er hann einfaldlega fæddur til að dansa.

Billy á sér draum sem samræmist ekki hugmyndum fullorðna fólksins, hann dreymir um að verða dansari á heimsmælikvarða og er tilbúinn að leggja allt í sölurnar. Billy Elliot er þroskasaga unga fólksins og hinna fullorðnu – mögnuð og falleg saga um baráttu drengs við fordóma samfélagsins og fjölskyldunnar um að fá að vera sá sem hann er. Þetta er kraftmikið verk um alvöru fólk með skotheldri og grípandi tónlist eftir Elton John, stórfenglegum hópdansatriðum og ótrúlega hæfileikaríkum dreng í aðalhlutverki sem á eftir að fá áhorfendur til að gapa af undrun..

Aðstandendur Höfundur: Lee Hall & Elton John | Þýðing: Karl Ágúst Úlfsson | leikstjóri: Bergur Þór Ingólfsson |Tónlist: Elton John | Leikmynd: Petr Hlousek | Búningar: Helga I. Stefánsdóttir | Lýsing: Þórður Orri Pétursson | Hljóð: Ólafur Örn Thoroddsen| Leikarar: Baldvin Alan Thorarensen, Hjörtur Viðar Sigurðarson, Sölvi Viggósson Dýrfjörð, Halldór Gylfason, Jóhanna Vigdís Arnardóttir, Sigrún Edda Björnsdóttir, Valur Freyr Einarsson, Þórunn Arna Kristjánsdóttir, Hjörtur Jóhann Jónsson, Sigurður Þór Óskarsson, Örn Árnason og fleiri.

Hver ert þú og hvað ertu að gera í dag?
Leikhúsfræðingur, leiðsögumaður, mastersnemi í ritlist, söngkona, mamma og margt fleira. Ég vinn við að sjá um fræðsludeild Borgarleikhússins.
 
Í hvaða stjörnumerki ertu?
Ég er meyja, en með tungl í fiskum og rísanda í krabba. Stjörnukortið mitt er uppfullt af andstæðum og ólíkum stjörnumerkjum.
 
Hvað ætlaðir þú að verða þegar þú yrðir stór?
Ég tilkynnti það sjö ára í beinni útsendingu hjá Hemma Gunn að ég ætlaði að verða rithöfundur og bakari. Annars hafði ég afar margar og ólíkar hugmyndir um það fram eftir öllum aldri. Á tímabili vildi ég helst giftast sendiherra, ég sá fyrir mér að þá myndi ég lifa lífinu undirbúandi stórar og flottar veislur, spjallandi við fólk á öllum tungumálum og fengi reglulega að flytjast á milli landa. Ég nennti samt ekki að standa í því að vera sendiherra sjálf.
 
Hver er þinn helsti kostur og helsti galli?
Ég er glaðlynd, ástrík og klár. Ég tala alltof mikið, á erfitt með að taka gagnrýni og fæ kvíðakast ef ég þarf að pakka í tösku.
 
Hver er uppáhaldsmaturinn þinn?
Kalkúnninn hjá Frænku á gamlaárskvöld, og sérstaklega stöffingin sem honum fylgir.
 
Hvaða sýningu sástu síðast í leikhúsi?
Dúkkuheimili, aftur. Mér finnst hún stórfengleg. Eitthvað það allra besta sem ég hef séð í leikhúsi.
 
Hvaða áhugamál áttu þér?
Að skapa list, pæla í list, njóta listar. Í breiðustum skilningi þess hugtaks. Svo fæ ég mjög mikið kikk út úr prófarkalestri og á QuizUp finnst mér skemmtilegast að keppa í Spelling.
 
Hvernig tónlist hlustar þú mest á?
Jazz.
 
Hvað fer mest í taugarnar á þér?
Neikvæðni.
 
Hver er þinn uppáhaldsstaður á Íslandi?
Skorradalurinn.
 
Hver er þinn uppáhaldsstaður erlendis?
Á erfitt með að velja á milli staða á Ítalíu. Feneyjar, Flórens, Alberobello, Matera, Napoli og Sorrento, ýmsir staðir á Sikiley, Marina di Massa.
 

Flytja til London eða New York?
New York.
 
Eiga hund eða kött?
Kött.
 
Borða heima heima eða úti daglega?
Úti
 
Finnst þér betra að vinna á morgnana eða kvöldin?
Kvöldin.
 
Hvort drekkurðu bjór eða vín með matnum?
Vín.
 
Hvort finnst þér skemmtilegra að lesa eða horfa á sjónvarp?
Lesa.
 
Hvort manstu betur: Nöfn eða andlit?
Andlit.
 
Veldu: Sturtu eða bað?
Bað.
 
Veldu: RÚV eða Stöð 2?
Rúv.
 
Ef þú ættir að lýsa þér í einu orði – hvaða orð væri það?
Einlæg.
 
Er eitthvað sem þú vilt segja að lokum?
Ekki búa þig alltaf undir það versta. Vonaðu það besta fram í rauðan dauðann. Þú munt alltaf geta höndlað vonbrigðin hvort eð er.
 

Leikritið Konan við 1000 eftir Hallgrím Helgason hefur nú verið leikið fyrir fullu húsi í Kassanum Þjóðleikhúsinu frá því í september. Verkið hefur fengið frábærar viðtökur hjá gagnrýnendum og leikhúsgestum og ekkert lát virðist vera á vinsældum sýningarinnar. Nú er hins vegar svo komið að sýningin verður að víkja úr Kassanum, fyrir Segulsviði eftir Sigurð Pálsson, sem frumsýnt verður í mars. Til að bregðast við mikilli aðsókn og vinsældum sýningarinnar hefur verið ákveðið að færa Konuna við 1000° uppá Stóra svið Þjóðleikhússins og eru aukasýningar þar þegar komnar í sölu.

Konan við 1000° fjallar um ótrúlega ævi einstakrar konu sem upplifði umrót og hörmungar tuttugustu aldrarinnar víða um lönd og endaði ævina í íslenskum bílskúr.

★★★★

„Sýningin er sigur fyrir Unu leikstjóra, sviðslistamenn leikhússins og leikkonurnar Guðrúnu og Elmu.”

Fréttablaðið

★★★★

„Í þessu verki kemur allt saman: áhrifamikill saga, texti sem er á köflum skínandi og eftirminnilegur og glæsileg framsetning með hugvitsamlegri og fallegri leikmynd. Í stuttu máli fá töfrar leikhússins á njóta sín.“

Morgunblaðið

★★★★★

„Glæsileg byrjun á íslenskum vetri“

Vikan

★★★★

„Í fáum orðum er Konan við 1000°áhrifaríkt og vel leikið verk sem allt helst í hendur, góður texti, glæsilegur leikur og styrk leikstjórn.”

DV

Laugardaginn 7. febrúar frumsýnir Möguleikhúsið nýtt íslenskt leikrit, Eldbarnið – hamfaraleikrit fyrir börn og fullorðna, í Tjarnarbíói. Segja má að hér sé á ferðinni seinni hluti tvíleiks um Möguleikhússins um Skaftárelda, en síðasta vetur frumsýndi leikhúsið Eldklerkinn, einleik um sr. Jón Steingrímsson, sem hlaut afburðagóðar viðtökur og var sýndur víða um land. Að þessu sinni eru atburðirnir skoðaðir frá sjónarhorni barns í leikriti sem ætlað er áhorfendum frá 9 ára aldri. Frumsýning Eldbarnsins er hluti af aldarfjórðungs afmælisdagskrá Möguleikhússins, en í vor eru 25 ár frá því leikhúsið hóf starfsemi sína og er Eldbarnið 36. verkið á verkefnaskrá þess.

Hvernig bregst lítil stúlka við þegar veröldin umturnast vegna ógnvænlegra náttúruhamfara?
Sólveig er söguhetjan í þessu nýja leikriti Möguleikhússins. Eftir gríðarlega jarðskjálfta verður stórt eldgos og skömmu seinna steypist hraunstraumur ofan af hálendinu. Sólveig og móðir hennar verða að flýja upp í fjallshlíð, þaðan sem þær horfa á bæinn sinn fara undir hraun. Við tekur ný og gjörbreytt tilvera, flótti og leit að húsaskjóli. Sólveig lendir í ævintýralegum aðstæðum sem hljóma fjarstæðukenndar fyrir íslensk börnum í dag en voru raunverulegar á þessum tímum.

Höfundur Eldbarnsins er Pétur Eggerz, leikstjóri Sigrún Valbergsdóttir, leikmynd og búninga hannaði Guðrún Øyahals, Kristján Guðjónsson er höfundur tónlistar og hljóðmyndar og lýsing er í höndum Arnþórs Þórsteinssonar. Leikarar í sýningunni eru Andrea Ösp Karlsdóttir, sem leikur eldbarnið Sólveigu, og Pétur Eggerz og Alda Arnardóttir sem leika ýmis hlutverk.

Í dag hófust æfingar á leikritinu Fjalla-Eyvindi, eftir Jóhann Sigurjónsson, í Þjóðleikhúsinu, en frumsýning er áætluð í lok mars.

Fjalla-Eyvindur er talsvert dramatískt verk – en þjóðþekktir gamanleikarar hafa verið ráðnir til hússins til þess að fara með hlutverk í verkinu.

Steinn Ármann Magnússon mun fara með hlutverk Björns hreppstjóra, en hann er mikil örlagavaldur í lífi elskendanna Fjalla-Eyvindar og Höllu. Steinn Ármann á að baki fjölda verkefna í kvikmyndum og á sviði en hann sló eftirminnilega í gegn verðlaunamyndinni Hross í oss eftir Benedikt Erlingsson. Steinn Ármann var einn af Radíusbræðrum og er löngu landsþekktur fyrir gamanleik og uppistand.

Fleiri gamanleikarar hófu æfingar í morgun en leikarinn góðkunni Sigurður Sigurjónsson fer með hlutverk Arnesar, kaupamanns og flækings sem fylgir stundum þeim Eyvindi og Höllu á fjöllum. Sigurður hefur leikið fjölmörg veigamikil en ólík hlutverk á sviði, í sjónvarpi og í kvikmyndum allt frá því hann útskrifaðist úr Leiklistarskóla Íslandsárið 1976. Sigurður er einnig þekktur sem leikstjóri og er einn af ástsælli gamanleikurum þjóðarinnar og einn af meðlimum Spaugstofunnar, rétt eins og Pálmi Gestsson sem fer með hlutverk Jóns bónda í verkinu.

Halaleikhópurinn setur á svið morðsögu eftir drottningu glæpasagnanna, Agöthu Christie, Tíu litlir strandaglópar (And then there were none), í leikstjórn Guðjóns Sigvaldasonar. Frumsýning er föstudaginn 30. janúar kl. 20.00.

Halaleikhópurinn var stofnaður 27. september 1992 með það að markmiði að „iðka leiklist fyrir alla“ og hefur starfað óslitið síðan. Í þessum hóp er fötlun hvorki hindrun né skilyrði heldur tækifæri. Þetta er blandaður leikhópur þar sem hver og einn kemur inn á sínum eigin forsendum.

Leikverkið byggði Agatha á eigin metsölubók sem seld hefur verið í yfir 100 milljónum eintaka. „Tíu litlir strandaglópar“ eða morð á morð ofan segir söguna af 10 einstaklingum sem er boðið af dularfullum hjónum í helgarferð á klettaeyju. Gestirnir eru ekki fyrr búnir að koma sér fyrir þegar einn þeirrra deyr grunsamlega. Öll eru þau strand og komast ekkert. Gestgjafinn, sem sést hvergi, ásakar hvert og eitt þeirra í hljóðupptöku, um að hafa sloppið undan réttvísinni vegna morðs sem þau eiga að hafa framið. Strandglóparnir byrja að opna sig fyrir hvort öðru…. þar til þau taka að týna lífinu hvert á fætur öðru. Hver deyr næst? Hver er morðinginn? Agatha Christie og Halaleikhópurinn munu halda spennu áhorfenda fram á seinustu stundu.

10litlir2Strandaglópar fóru í boð og þá voru þeir tíu. Einn þeirra stóð á öndinni, og þá voru eftir níu.

Níu litlir strandaglópar fóru seint að hátta. Einn þeirra svaf yfir sig, og þá voru eftir átta.

Átta litlir strandaglópar vöknuðu klukkan tvö. Einn þeirra varð eftir og þá voru eftir sjö.

Sjö litlir strandaglópar sátu og átu kex. Exi féll á einn þeirra og þá voru eftir sex.

Miðaverð er 2500 kr. Ef keypt er heil sýning kostar hún 75.000 kr.

Næstu sýningar verða:
Frumsýning. föstudaginn 30. jan. kl. 20.00 – uppselt
Sunnudaginn 1. feb. kl. 17.00
Föstudaginn 6. feb. Kl. 20.00
Sunnudaginn 8. feb kl. 17.00
Laugardaginn 14. feb. kl. 20.00

Miðapantanir eru í síma 897-5007 og á midi@halaleikhopurinn.is
Áframhaldandi sýningarplan má finna á vefnum www.halaleikhopurinn.is Þar er einnig að finna nánari upplýsingar um sýninguna.

Á síðasta ári voru reglulega haldnir viðburðir í Tjarnarbíó undir nafninu Arty Hour, en þar komu fram þeir listamenn sem voru með vinnustofu eða með verk í vinnslu í Tjarnarbíó. Á morgun verður þeirri hefð haldið áfram.

Arty Hour er haldinn á Tjarnarbarnum, aðgangur er ókeypis og að venju eru ljúffengar veitingar í boði á barnum.

Mælendur verða:

– Bjartmar Þórðarson og Guðjón Þorsteinn Pálmarsson, sem sýna verkið Skepnu um þessar mundir.

– Tryggvi Gunnarsson og Hilmir Jensson í leikhópnum Sóma þjóðar munu fjalla um síðasta verk þeirra, MP5, sem og nýtt stykki.

– Ragnar Ísleifur Bragason í Kriðpleir með verkið Síðbúin rannsókn.

– Meðlimir Möguleikhússins, en þau setja upp verkið Eldbarnið þessa dagana.

„Strindberg – stundin okkar“ nefnist nýr þáttur Ríkisútvarpsins, helgaður „hinum dramatíska þræði lífsins“, eins og segir í kynningu.

Umsjónarmaðurinn fær hjónin Henning Ólafsson og Ernu Sigurðardóttur til sín í skemmtilegt spjall um leikritið „Föðurinn“ eftir August Strindberg. Henning og Erna flytja brot úr textanum og velta vöngum yfir efniviði og persónum verksins, ásamt umsjónarmanni.

Þeir sem hlusta á þáttinn gætu haldið því fram að næstum hvert einasta talað orð í þættinum megi á endanum rekja til leikverks hins sænska meistara. Ennfremur að gestir þáttarins – jafnvel umsjónarmaðurinn líka – eigi í nokkrum erfiðleikum með að greina á milli raunveruleika og blekkingar.

Útvarpsleikhúsið lætur hlustendum eftir að dæma hér um og minnir á að „ekki er allt sem heyrist“ …

Þetta er efni ýs útvarpsleikrits sem Útvarpsleikhúsið frumflytur sunnudaginn 1. febrúar kl. 13:00 á Rás 1.

Höfundur og leikstjóri er Bjarni Jónsson og Einar Sigurðsson sér um hljóðvinnslu.

Persónur og leikendur:
Henning Ólafsson: Sveinn Ólafur Gunnarsson
Erna Sigurðardóttir: Sólveig Guðmundsdóttir
Umsjónarmaður þáttarins: Hjálmar Hjálmarsson

„Málið er að útvarp hefur verið að þróast mikið á liðnum árum. Tækifærum til þess að framleiða efni frá grunni hefur fækkað á meðan það er aukin áhersla á almennt spjall. Þáttastjórnendur fá til sín skemmtilega viðmælendur og spjalla um tiltekin málefni frekar en að framleiða efni um málefnið.“ (Úr viðtali við Bjarna Jónsson í Fréttablaðinu 29. o1. 2015 í tilefni af flutningi leikritsins)

Bjarni Jónsson er eitt okkar helsta leikskáld og hefur víða komið við í íslensku leikhúsi.

Fyrir Útvarpsleikhúsið skrifaði hann og leikstýrði þríleiknum Besti vinur hundsins og hlaut sú uppsetning Grímuna 2008 sem útvarpsverk ársins.

Hann hefur gert fjölda leikgerða fyrir Útvarpsleikhúsið og má þar m.a. nefna þrjú verk sem hann vann ásamt hljómsveitinni m ú m: Svefnhjólið eftir skáldsögu Gyrðis Elíassonar sem hlaut Norrænu útvarpsleikhúsverðlaunin 2004, Augun þín sáu mig eftir samnefndri skáldsögu Sjón sem hlaut 6. sæti í evrópsku ljósmiðlakeppninni Prix Europa 2009 og var flutt af útvarpsleikhúsi tékkneska ríkisútvarpsins í þeirra eigin uppfærslu nú í vikunni, og Hér eftir samnefndri skáldsögu Kristínar Ómarsdóttur og var tilnefnt til Grímunnar 2014. Einnig má nefna útvarpsleikgerðir eins og Dáið er alt án drauma eftir skáldsögu Halldórs Laxness, Barni náttúrunnar, (02/03), Ævinlega eftir skáldsögu Guðbergs Bergssonar (02/03) og Hinn íslenski aðall eftir skáldsögu Þórbergs Þórbergssonar sem hlaut Grímuna 2004 sem útvarpsverk ársins og Saga af þriðjudegi eftir sögu Steinars Braga (09/10).

Af öðrum leikverkum Bjarna á íslenskum leiksviðum má nefna Kaffi (Þjóðleikhúsið 97/98), Vegurinn brennur (Þjóðleikhúsið 03/04), Óhapp! (Þjóðleikhúsið 07/08) og Falið fylgi (Leikfélag Akureyrar 08/09).

Þá hefur Bjarni unnið að leikgerðum fyrir leiksvið eins og Hýbýli vindanna eftir skáldsögu Böðvars Guðmundssonar (Borgarleikhúsið 04/05) og Lífsins tré eftir skáldsögu Böðvars Guðmundssonar (Borgarleikhúsið 04/05).

Bjarni hefur unnið nú síðast með leikhópnum Kriðpleir að sýningunum Lítill kall/Tiny Guy (12/13) og Síðbúin rannsókn (14/15). Bjarni er einn af listrænum stjórnendum alþjóðlegu leiklistarhátíðarinnar LÓKAL.