Nýtt hlaðvarp um leiklist í landinu er komin inn á allar helstu hlaðvarpsveitur.
Leikhópurinn Leikfjelagið sem Arnfinnur Daníelsson og Halldóra Harðardóttir standa að, hefur hleypt af stokkunum hlaðvarpinu Lífsins leik. Í fyrsta þætti ræddu þau við formann og framkvæmdastjóra BÍL, þau Guðfinnu Gunnarsdóttur og Hörð Sigurðarson um þessi rúmlega 70 ára samtök áhugaleikfélaga á landinu.
Í öðrum þætti okkar var skyggnst inní starf Leikfélags Keflavíkur sem er 60 ára um þessar mundir og er atorkusamt félag, þar sem sýningin þeirra, Fyrsti kossinn, sem er á fjölum leikhússins þennan veturinn er hundraðasta sýningin sem félagið setur upp..
Ætlun tvíeykisins er að halda áfram umfjöllun leikfélögin í landinu og ástæða til að hvetja leiklistaráhugafólk að fylgjast með.
Einleikurinn – Það sem er – er sýndur í Tjarnarbíó
Árið er 1987. Elskendur sem Berlínarmúrinn skilur að eiga í leynilegu og lífshættulegu ástarsambandi. En hver eru þau í raun og veru? Og hvað gerist þegar múrinn á milli þeirra fellur?
ÞAÐ SEM ER eftir danska verðlaunaskáldið Peter Asmussen er magnað verk um að elska vona og svíkja. Um múrinn sem umkringir okkur, löngunina eftir frelsi og leitina að því sem er – og er ekki.
Listamenn
Höfundur: Peter Asmussen
Þýðing: Auður Jónsdóttir
Leikkona: María Ellingsen
Leikstjórn: Ólafur Egilsson
Búningar: Filippía Elísdóttir
Leikmynd: Snorri Freyr Hilmarsson
Lýsing: Björn Bergsteinn
Tónlist: Ólafur: Björn Ólafsson
Aðstoðarleikstjóri: Melkorka Gunnborg Briansdóttir
Sviðshreyfingar: Anna Kolfinna Kuran
Gervi: Erla Sigurbjarnadóttir
Tæknimaður: Stefán Ingvar Vigfússon
Ljósmyndir og video: Christopher Lund
Ólafur Egill Egilsson er listrænn ráðunautur Þjóðleikhússins og Björn Bergsteinn Guðmundsson yfirljósahönnuður Þjóðleikhússins og taka þeir þátt í sýningunni með góðfúslegu leyfi Þjóðleikhússins.
Leikfélag Hafnarfjarðar frumsýnir nýtt gamanleikrit eftir höfundasmiðju leikfélagsins í leikstjórn Ólafs Þórðarsonar.
Í kjallara í Reykjavík er hópur fólks í miðjum klíðum að standsetja íbúð fyrir útleigu til ferðamanna. Af óviðráðanlegum ástæðum neyðast þau skyndilega til að hýsa ferðamann í hálfköruðu húsnæðinu, sem leiðir af sér atburðarás sem ekkert þeirra hefði nokkurn tíma órað fyrir.
Sýningar verða í Leikhúsinu, Funalind 2 í Kópavogi og sýnt verður á eftirtöldum dögum:
Laugardagur 22. janúar kl. 20.00 (frumsýning, uppselt)
Á ljúfu síðdegi sitja fjórar nágrannakonur í bakgarði einnar þeirra og ræða allt milli himins og jarðar: sápuóperur, barnabörnin, horfnar hverfisverslanir, drauma um að fljúga og óstjórnlegan ótta við ketti. Undir broslegum hversdeginum krauma leyndarmál og sársauki langrar ævi og allt um kring leynist yfirvofandi – eða jafnvel afstaðinn – heimsendir. Með einstökum húmor rennur teboð saman við hörmungar og náttúruhamfarir, sem eru jafn skelfilegar og þær eru kostulegar og staðfesta þau orð leikskáldsins Samuel Beckett að ekkert sé fyndnara en óhamingjan.
Caryl Churchill (f. 1938) er eitt helsta og afkastamesta leikskáld Breta síðustu áratuga, en eftir hana liggja á sjötta tug leikverka fyrir svið, útvarp og sjónvarp. Ein komst undan er skrifað fyrir fjórar leikkonur sem allar eru að minnsta kosti sjötugar og þar eru sögur eldri kvenna í forgrunni, kvenna sem hafa staðið af sér áföll og árekstra í heimi sem virðist stöðugt á heljarþröm. Í þessu magnaða verki sameina fjórar af ástsælustu leikkonum þjóðarinnar krafta sína, þær Edda Björgvinsdóttir, Kristbjörg Kjeld, Margrét Ákadóttir og Margrét Guðmundsdóttir, í leikstjórn Kristínar Jóhannesdóttur.
Geysivinsælar Napólí-sögur Elenu Ferrante nú loks á íslensku leiksviði Napólí-sögur Elenu Ferrante hafa farið sigurför um heiminn og sjónvarpsþættir byggðir á þeim hafa slegið í gegn. Lesendur og áhorfendur víða um heim hafa hlegið og grátið til skiptis yfir vegferð hinna skarpgreindu vinkvenna Lilu og Elenu sem alast upp í fátækrahverfi í Napólí á sjötta áratugnum. Þær þurfa að beita öllum brögðum til að komast af, brjótast til mennta og berjast fyrir betra lífi í harkalegu umhverfi þar sem ofbeldi stjórnar tilverunni og réttur kvenna er lítils virtur.
Yaël Farber er þekkt fyrir djarfar, ágengar og listrænt hrífandi sýningar sem hafa farið sigurför um heiminn.
Hin suður-afríska Yaël Farber leikstýrir þessari stórsýningu en uppsetningar hennar hafa hlotið fjölda verðlauna og viðurkenninga víða um heim. Gestir Þjóðleikhússins mega eiga von á ítalskri leikhúsveislu þar sem öllu verður tjaldað til við sviðsetningu þessarar mögnuðu sögu um flókna vináttu, heitar ástir, afbrýðisemi, sárar fórnir, æðruleysi og örvæntingu.
Hér er á ferð sannkölluð stórsýning með mörgum af okkar fremstu leikurum.
Skugga Sveinn, hér í nýrri og ferskri útgáfu, er bráðskemmtilegt verk um einn þekktasta útlaga Íslands og baráttu hans við laganna verði.
Lárensíus sýslumaður á þann draum heitastan að klófesta útilegumanninn Skugga Svein og lið hans enda Skugga Sveinn stórglæpamaður, þjófur og morðingi. En heldur vandast málið þegar dóttir Lárensíusar verður ástfangin af einum útilegumannanna og gerir hvað hún getur til að frelsa hann frá fangelsun og dauða. Hefst þá spennandi atburðarrás og barátta á milli ástar og haturs, réttlætis og ranglætis.
Skugga Sveinn eftir þjóðskáldið Matthías Jochumsson var eitt þekktasta og vinsælasta leikverk á Íslandi um áratuga skeið og litríkar persónur þess, Grasa Gudda, Gvendur smali og Ketill skrækur hafa lifað með þjóðinni og tekið sér bólfestu í hjarta hennar.
Leikstjóri: Marta Nordal
Leikgerð: Marta Nordal og leikhópurinn
Leikmynd: Kristján Garðarsson
Búningar: Björg Marta Gunnarsdóttir
Tónsmíði og tónlistarútsetningar: Sævar Helgi Jóhannsson
Söngtextar: Vilhjálmur B Bragason
Ljósahönnuður: Ólafur Ágúst Stefánsson
Sýningarstjóri: Þórunn Geirsdóttir
Hljóðhönnuður: Gunnar Sigurbjörnsson
Leikarar: Jón Gnarr, Björgvin Franz Gíslason, Sunna Borg, María Pálsdóttir, Árni Beinteinn Árnason, Þórdís Björk Þorfinnsdóttir, Vala Fannell og Vilhjálmur B Bragason
Sviðsstjóri: Jasmína Woyjtola
Aðstoð við smíði leikmyndar: Einar Rúnarsson
Eyrún Ósk Jónsdóttir, Gunnar Jónsson, Hildur Kristín Thorstensen eru hluti af leikhópnum Kvistur.
Listahópurinn kvistur kynnir nýtt íslenskt hlaðvarpsleikrit, Rauð silkinærföt eftir Eygló Jónsdóttir, verkið fjallar um hjón og vin þeirra sem eru á leiðinni að skoða eldgos þegar gerir allt í einu ofsaveður og ýmislegt óvænt um samband þeirra kemur í ljós. Leikarar eru Eyrún Ósk Jónsdóttir, Gunnar Jónsson, Hildur Kristín Thorstensen, Kristján Hans Óskarson og Óskar Harðarson. Hljóðvinnsla og klipping voru í höndum Óskars Harðarsonar. Þetta er þriðja hlaðvarpsleikritið sem hópurinn sendir frá sér, en allar æfingar fóru fram í gegnum fjarfundabúnað.
Kómedíuleikhúsið hefur hleypt af stokkunum nýju hlaðvarpi um leiklist
Hlaðvarp Kómedíuleikhússins, Leikhúsmál, er komið í loftið. Hlaðvarp þar sem fjallað verður um leiklistina á breiðum grunni. Um er að ræða vikulega þætti sem fara í loftið á fimmtudegi hverrar viku. Umsjónarmaður Leikhúsmála er Elfar Logi Hannesson og upptakari er Marsibil G. Kristjánsdóttir. Leikhúsmál eru tekin upp í nýstandsettu hljóðveri Kómedíuleikhússins sem er til húsa í Leiklistarmiðstöð Kómedíunnar á Þingeyri.
Táknmynd hlaðvarpsins Leikhúsmál sem finna má á öllum helstu hlaðvarpsveitum
Kómedíuleikhúsið, atvinnuleikhús Vestfjarða, hefur komið sér upp hljóðveri. Hið ný opnaða hljóðver er til húsa í Leiklistarmiðstöð Kómedíuleikhússins á Þingeyri. Er hið kómíska hljóðver öllum nauðsynlegum tækjum búið til upptöku á töluðu máli. Það var byggðaverkefnið Öll vötn til Dýrafjarðar sem styrkti uppsetningu hljóðversins.
Kómedíuleikhúsið hefur í gegnum árin gefið út fjölda hljóðbóka sem eru allar aðgenilegar á streymisveitunni Storytel. Alls eru hljóðbækurnar nú orðnar 23 talsins. Kómedíuleikhúsið hefur ávallt þurft að fara af bæ til að taka upp þessar hljóðbækur og hefur því vitanlega fylgt gífurlega mikill aukakostnaður. Það er því alveg ljóst að hljóðver Kómedíuleikhússins er einstaklega kærkomið og næsta víst að áframhald verður á hljóðbókaútgáfu Kómedíuleikhússins fyrir Storytel og það frá Þingeyri.
Í fyrsta þætti Leikhúsmála er hlaðvarpið kynnt og fjallað um fyrsta leiklistartímaritið sem hét einmitt, Leikhúsmál.
Hver kannast ekki við Emil í Kattholti, uppátækjasama og hjartahlýja drenginn sem er hugarsmíð barnabókahöfundarins ástsæla Astrid Lindgren? Síðan Emil kom fyrst fram á sjónarsviðið árið 1963, hefur hann átt vísan stað í hjörtum barna jafnt sem fullorðinna um heim allan og er nafn hans samofið hugmyndum um lífsgleði og prakkaraskap. Hér kynnumst við ekki bara Emil og Ídu, litlu systur hans, heldur einnig misþolinmóðum foreldrum þeirra Ölmu og Anton, hinni seinheppnu Línu vinnukonu, sögukonunni Týtuberja Mæju, vafasömu Ráðskunni á fátækrahælinu og síðast en ekki síst stórvini Emils, Alfreð vinnumanni.
Hér mun ekki skorta fjörið þegar leikstjórinn Þórunn Arna Kristjánsdóttir leiðir glæsilegan hóp leikara og tónlistarmanna inn í Smálöndin sænsku. Kattholt er heill heimur ævintýra og nú lifnar hann sem aldrei fyrr í söngvum og gleði á stóra sviði Borgarleikhússins.
vegna gríðarlegrar eftirspurnar og sölu hefur verið bætt við aukasýningum á valda sýningardaga.
Í fylgd með fullorðnum er nýtt leikrit með lögum Bjartmars Guðlaugssonar
Í fylgd með fullorðnum er nýtt leikrit eftir Pétur Guðjónsson sem Leikfélag Hörgdæla mun frumsýna í mars á næsta ári. Áheyrnarprufur verða haldnar á Melum í Hörgárdal sunnudaginn 5.desember milli 10 og 14.
Leitað er eftir leikurum á öllum aldri, um barna og unglingahlutverk er líka að ræða. Æfingar munu fara fram á Melum í febrúar og mars. Frumsýnt í mars. Áhugasamir sendi póst á leikfelaghorgdaela@gmail.com og við sendum til baka hvernig prufur fara fram og nánari tímasetningu.
Í fylgd með fullorðnum fjallar um Birnu sem stendur á tímamótum í lífinu. Það má segja að seinni hálfleikur blasi við. Hún lítur um öxl og ýmislegt kemur í ljós og margt er þar óuppgert. Birna segir okkur söguna af sjálfri sér, foreldrunum Krissý og Sumarliða og fyrstu ástinni honum Engisprettu-Haraldi. Sagan er í senn drepfyndin, grátbrosleg, dramatísk og sorgleg en líka bráðfjörug.
Eins og nafnið gefur til kynna er leikritið byggt á tónlist Bjartmars Guðlaugssonar, en Pétur, höfundur og leikstjóri hefur borið þá hugmynd með sér um alllangt skeið að skrifa leikrit með tónlist hans. Frumsýning 2022 er engin tilviljun því það ár verður Bjartmar sjötugur og sýningin sett upp honum til heiðurs. Pétur Guðjónsson er eigandi Draumaleikhússins og hefur í gegnum tíðina skrifað leikrit, ýmist einn eða með öðrum. Auk þess sinnir hann leikstjórn, kennslu, stuttmyndagerð og viðburðastjórnun. Áheyrnarprufur fyrir „Í fylgd með fullorðnum“ verða fyrstu vikuna í desember og verður óskað eftir leikurum á öllum aldri. Meðal laga sem eru í sýningunni eru: Týnda kynslóðin, Bissí Krissí, Ljóð um þig, Þegar þú sefur, Með vottorð í leikfimi, Þannig týnist tíminn og fleiri og fleiri.
