Uncategorized | Leikhus.is

    Leikhúsleikurinn í boði Kol restaurant

    Nafn:

    Netfang:

    Fæðingarár:

    Símanúmer:

    Kyn:

    KarlKona

     
    Á hvaða tíma er leikhústilboð Kol? - Smellið hér til að finna svarið.

    Svar:

     
    Vinningurinn í leikhúsleiknum er:

    Gjafabréf í leikhús fyrir tvo og 20.000 kr. gjafabréf á Kol restaurant

    Drögum einn heppinn þann 22. apríl 2015. Þeir sem taka þátt í leikhúsleiknum eru sjálfkrafa skráðir sem vildarvinir leikhús.is og fá send fréttabréf með fréttum úr leikhúslífinu og ýmis tilboð.

     


    Browsing "Uncategorized"

    Karitas

    nóv 17, 2014   //   by admin   //   Uncategorized  //  Engar athugasemdir

    eftir Kristínu Marju Baldursdóttur

    Seiðandi verk um ástir og örlög, og löngunina til að hlýða kalli listagyðjunnar í hörðum heimi

    ★★★★1/2

    SBH, Mbl.
    Skáldsögur Kristínar Marju, Karitas án titils og Óreiða á striga, hafa notið mikilla vinsælda. Þær fjalla um líf listakonu á fyrri hluta síðustu aldar og hlutskipti kvenna á Íslandi fyrr og síðar, ekki síst þeirra sem hafa þráð að feta aðra slóð en samfélagið hefur ætlað þeim.

    Í verkinu kynnumst við listakonunni og móðurinni Karitas sem hefur leitað skjóls í afskekktri sveit eftir að veröld hennar hefur hrunið. Minningabrot og andvökudraumar ásækja hana í hvítum bjarma jökulsins sem gnæfir yfir öllu. Móðurhjarta hennar er þjakað af sorg. Hugsanir um eiginmanninn sem hvarf úr lífi hennar fyrir þrettán árum sækja stöðugt á hana og löngunin til að hlýða kalli listagyðjunnar er knýjandi. Upp er runnin stund þar sem Karitas þarf að taka grundvallarákvörðun varðandi sjálfa sig og líf sitt.

    Karitas er átakamikil og hrífandi saga um langanir og þrár, sorgir og ástríður og fórnirnar sem hamingjan og draumarnir geta krafist.

    Karitas án titils var tilnefnd til Bókmenntaverðlauna Norðurlandaráðs árið 2006. Árið 2008 hlutu Karitas án titils og Óreiða á striga Fjöruverðlaunin, bókmenntaverðlaun kvenna og voru tilnefndar til Menningarverðlauna DV í bókmenntum.
     

    Leitin að jólunum

    nóv 17, 2014   //   by admin   //   Uncategorized  //  Engar athugasemdir

    eftir Þorvald Þorsteinsson og Árna Egilsson

    Sívinsæl aðventusýning tíunda árið í röð!

    Grímuverðlaunasýningin Leitin að jólunum hefur verið sýnd á aðventunni við miklar vinsældir allt frá því hún var frumsýnd árið 2005. Verkið verður nú sýnt tíunda leikárið í röð og eru sýningar orðnar yfir 200 talsins.

    Tveir skrýtnir og skemmtilegir náungar taka á móti litlum leikhúsgestum í anddyri Þjóðleikhússins. Með þeim í för eru tveir hljóðfæraleikarar og þessi fjörugi hópur leiðir börnin með leik og söng um leikhúsið. Börnin ferðast inn í ævintýraveröld jólanna og sjá leikþætti um jólin í gamla daga og
    á okkar tímum.
    Sýningar hefjast á Leikhúsloftinu í lok nóvember.

    Aldurshópur: 2ja – 99 ára.
     

     

    Don Carlo

    nóv 17, 2014   //   by admin   //   Uncategorized  //  Engar athugasemdir

    Ein af umfangsmestu óperum Verdis, Don Carlo, verður frumsýnd hjá Íslensku óperunni þann 18. október, en óperan hefur aldrei verið sviðssett á Íslandi áður. Eingöngu íslenskir söngvarar taka þátt í sýningunni og ber þar fyrstan að nefna þekktasta óperulistamann Íslands um þessar mundir, bassasöngvarann Kristinn Sigmundsson, sem tekur þátt í óperuuppfærslu hjá Íslensku óperunni í fyrsta sinn í 12 ár og fer hér með eitt voldugasta bassahlutverk tónbókmenntanna, Filippus konung og föður Don Carlo.

    Af öðrum söngvurum í sýningunni má nefna Jóhann Friðgeir Valdimarsson í titilhlutverkinu Don Carlo, Helgu Rós Indriðadóttur í hlutverki Elísabetar drottningar og hinn unga og upprennandi baritónsöngvara Odd Arnþór Jónsson, sem nýverið lauk söngnámi frá Mozarteum í Salzburg og sópar að sér spennandi verkefnum um þessar mundir, en hann verður í hlutverki Rodrigo. Auk þess syngja Hanna Dóra Sturludóttir, sem sló í gegn sem Carmen síðastliðið haust, hlutverk Eboli, Guðjón Óskarsson hlutverk Grand Inquisitor, en hefur aðallega sungið við erlend óperuhús á liðnum árum og söng m.a. í Arenunni í Verona á síðastliðnu ári og Viðar Gunnarsson, sem er íslenskum óperugestum að góðu kunnur í fjöldamörgum hlutverkum síðastliðin ár, syngur hlutverk Munksins. Þá verða Erla Björg Káradóttir og Hallveig Rúnarsdóttir í minni hlutverkum.

    Þórhildur Þorleifsdóttir leikstýrir sýningunni og er Páll Ragnarsson ljósahönnuður og Þórunn Sigríður Þorgrímsdóttir búninga- og leikmyndahöfundur. Guðmundur Óli Gunnarsson er hljómsveitarstjóri. Flutt verður fjögurra þátta útgáfan af þessu mikla verki Verdi, og verður hún sungin á ítölsku með íslenskum skjátexta.

    Frumsýning verður í Eldborg í Hörpu 18. október og eru þrjár aðrar sýningar ráðgerðar, í október og nóvember.

    Sýningin er um þrjár klukkustundir og fimmtán mínútur að lengd með hléi.

    Hamskiptin

    nóv 13, 2014   //   by admin   //   Uncategorized  //  Engar athugasemdir

    Hamskiptin

    Rómuð sýning Vesturports snýr enn á ný í Þjóðleikhúsið eftir sigurgöngu vítt og breitt um heiminn. Einstakt tækifæri!

    Hamskiptin er ein rómaðasta sýning Vesturports og hefur verið sýnd víða um heim og fengið frábærar viðtökur. Hún var frumsýnd í Lyric Hammersmith leikhúsinu í London árið 2006 og í kjölfarið endurfrumsýnd í Þjóðleikhúsinu, og hlaut þá Grímuverðlaunin sem leiksýning ársins.

    Hamskiptin eftir Franz Kafka er ein af þekktustu skáldsögum 20. aldarinnar. Leiksýningin er í senn ógnvekjandi og fyndin en í verkinu segir frá sölumanninum Gregor Samsa, sem vaknar upp einn morguninn í líki risavaxinnar bjöllu. Líf hinnar hversdagslegu Samsafjölskyldu breytist á svipstundu í einkennilega martröð.

    Hamskiptin er mögnuð leikhúsupplifun þar sem leikmynd Barkar Jónssonar og lýsing Björns Helgasonar skapa einstæðan heim á leiksviðinu, og leikhópurinn fer á kostum undir seiðandi tónlist Nicks Cave og Warrens Ellis.

    ★★★★★

    The Guardian, Michael Billington

    Áfangastaðir á ferð Hamskiptanna um heiminn:

    London – Reykjavík – London – Liverpool – Manchester – Birmingham – Newcastle – Plymouth – London – Seoul í Suður-Kóreu – Dublin – Hong Kong – Hobart í Tasmaníu – Wollongong í Ástralíu – Sydney – Bogotá í Kólumbíu – Reykjavík – New York – Malmö – St. Pétursborg – Norilsk í Rússlandi – Osló – Barcelona – München – Calgary í Kanada – London – Washington – Boston – Osló – Toronto – Osló – Reykjavík

    Sagan

    okt 1, 2014   //   by admin   //   Uncategorized  //  Engar athugasemdir

    Gunnar Andri Þórisson er upphafsmaður leikhus.is. Sagan á bak við
    vefsíðuna er sú að í upphafi, jólin 2003, styrkti Söluskóli Gunnars
    Andra (SGA) hinn þá nýstofnaða leikhóp Fimbulvetur. Hópurinn setti þá
    upp hið bráðskemmtilega verk Ójólaleikrit eftir Jeff Goode. Styrkur
    SGA var í formi auglýsinga og vefsvæðis fyrir leikhópinn.

    Á þessum tíma kynntist Gunnar Andri því af eigin raun hve erfitt það
    var fyrir lítinn atvinnuleikhóp að standa í markaðsstarfi og keppa við
    stóru leikhúsin á einhverjum jafnréttisgrundvelli og fór hann því að
    velta fyrir sér hvernig færa mætti leikhús nær almenningi og auka
    möguleika bæði áhuga- og atvinnuleikhúsa og hópa til að kynna sig. Það
    var svo þann 27. janúar 2004 að hugmyndin kviknaði – netið var besti
    staðurinn til að sýna framboðið í leikhúslífi á Íslandi.
    Eftirgrennslan leiddi í ljós að www.leikhus.is var laust og var það
    keypt þegar í stað.Undirbúningur að upplýsinga- og þjónustuvef fyrir
    leikhús á Íslandi var hafinn og í júní 2004 var fyrsta útgáfan af
    leikhus.is komin á netið. Leikhus.is opnaði síðan formlega haustið
    2004. SGA er enn aðal Mátarstólpi leikhus.is

    Síður:«1...8586878889909192
    loading

    Takk fyrir að skrá þig!