ágúst | 2022 | Leikhus.is

    Leikhúsleikurinn í boði Kol restaurant

    Nafn:

    Netfang:

    Fæðingarár:

    Símanúmer:

    Kyn:

    KarlKona

     
    Á hvaða tíma er leikhústilboð Kol? - Smellið hér til að finna svarið.

    Svar:

     
    Vinningurinn í leikhúsleiknum er:

    Gjafabréf í leikhús fyrir tvo og 20.000 kr. gjafabréf á Kol restaurant

    Drögum einn heppinn þann 22. apríl 2015. Þeir sem taka þátt í leikhúsleiknum eru sjálfkrafa skráðir sem vildarvinir leikhús.is og fá send fréttabréf með fréttum úr leikhúslífinu og ýmis tilboð.

     


    Archive from ágúst, 2022

    Nýtt fjölbreytt leikár Þjóðleikhússins afhjúpað

    ágú 29, 2022   //   by gunnarandri   //   Uncategorized  //  Engar athugasemdir
    74. leikár Þjóðleikhússins er hafið.

    Leikhúsveturinn verður fjölbreytt og spennandi blanda af sprúðlandi stórsýningum, íslenskum og erlendum kraftmiklum verkum og kynngi mögnuðum sýningum þar sem nándin við list leikarans verður allsráðandi. Heimsfrumsýningar, ný íslensk barnaverk, danssýningar, söngleikir og áleitnir einleikir. Nýtt og endurnýjað gestarými í Kassanum mun  mæta áhorfendum í haust og Kjallarinn festir sig enn betur í sessi sem klassabúlla.

    Stóra sviðið – söngleikir fyrir alla fjölskylduna, heimsfrumsýning á þríleik eftir eitt fremsta leikskáld samtímans, glænýtt íslenskt verk og verðlaunaverk síðasta árs

    Sem á himni er splunkunýr söngleikur sem leikur á allan tilfinningaskalann. Ægifögur tónlist, litríkar og skemmtilegar persónur og hrífandi saga hafa nú þegar heillað fjölda áhorfenda erlendis, og nýjar uppsetningar á verkinu eru væntanlegar víða. (Frumsýnt 16. september). Unnur Ösp Stefánsdóttir leikstýrir verkinu,  Jón Ólafsson er tónlistarstjóri, í helstu hlutverkum er einvala hópur leikara og söngvara og í gryfjunni er 13 manna hljómsveit.

    Þjóðleikhúsið stendur fyrir stórviðburði í íslensku leikhúslífi á Stóra sviðinu – heimsfrumsýningu á glænýjum þríleik eftir Marius von Mayenburg, sem talinn er eitt merkasta núlifandi leikskáld Evrópu. Hinn heimsþekkti leikstjóri Benedict Andrews leikstýrir tveimur verkanna, Ellen B. og Ex, á leikárinu 2022-23 og Marius von Mayenburg mun sjálfur leikstýra því þriðja, Alveg sama, haustið 2023. Nina Wetzel hannar leikmynd og búninga fyrir sýningarnar en hún er meðal eftirsóttustu leikhúshönnuða Evrópu og er m.a. einn helsti samverkamaður leikstjórans Thomasar Ostermeier.  Það er mikill fengur fyrir íslenska leikhúsgesti og listafólk að fá þetta virta leikhúslistafólk hingað til starfa. Leikritin eru afburðavel skrifuð og fjalla um ástina og valdið í samtímanum, nútímafólk og nándina, af nístandi hreinskilni og kolsvörtum húmor. Bitastæð hlutverkin eru öll í höndum stórleikara. Ellen B. verður frumsýnt 26. desember og Ex í lok janúar.

    Draumaþjófurinn eftir Gunnar Helgason er glæný fjölskyldusýning sem byggir á geysivinsælli bók. Þar er á ferð æsispennandi þroskasaga, með litskrúðugum og skemmtilegum persónum, þar sem tekist er á við margt sem skiptir okkur svo miklu máli í dag! Frábær ný tónlist eftir Þorvald Bjarna, Stefán Jónsson leikstýrir og fjöldi leikara og dansara og hljómsveit taka þátt í sýningunni. (Frumsýnt í mars 2023).

    Draumaþjófurinn eftir Gunnar Helgason fer á svið í Þjóðleikhúsinu í vetur

    Til hamingju með að vera mannleg er nýtt íslenskt verk byggt á ljóðabók Sigríðar Soffíu Níelsdóttur sem hún skrifaði þegar hún gekk í gegnum krabbameinsmeðferð í heimsfaraldri. Verkið fjallar um þrautseigju, um andlegan styrk og um samfélag kvenna sem standa hver með annarri. Ljóðin eru gædd lífi á sviðinu og hughrifin sem textarnir vekja túlkuð af hópi sjö kvenna með leik, upplestri, dansi, gríni og söng.  Sannkallaður lofsöngur til lífsins. Verðlaunasýningar halda áfram.  Sjö ævintýri um skömm, eftir Tyrfing Tyrfingsson, sópaði til sín Grímuverðlaunum síðasta vor, m.a. sem leikrit ársins. Sýningar halda áfram á Stóra sviðinu í október.  Vertu úlfur, sigurvegari Grímuhátíðarinnar 2021, hefur nú sitt þriðja leikár og verður sýnd í 100. sinn í haust. Sýningar hefjast að nýju í september.

    Kassinn – þrjú íslensk verk, drepfyndinn Shakespeare í nýjum fötum og Jólaboðið

    Nokkur augnablik um nótt er glænýtt, kraftmikið verk eftir Adolf Smára Unnarsson en hann hefur á undanförnum árum getið sér gott orð sem rithöfundur, leikskáld og leikstjóri; hlaut meðal annars þrjár Grímutilnefningar árið 2021 fyrir óperuna Ekkert er sorglegra en manneskjan. Leikstjóri er Ólafur Egill Egilsson. (Frumsýnt 7. október í Kassanum). Þetta glænýja, kraftmikla verk er í senn vægðarlaus samtímaspegill og bráðfyndin en ógnvekjandi svipmynd af þeim sem eiga og þeim sem vilja, þeim sem sýnast og þeim sem eru. Þetta erum við – og þau.

    Hvað sem þið viljið er Shakespeare í splunkunýjum búningi, þar sem möguleikar leikhússins eru nýttir á frjóan og ævintýralegan hátt og list leikarans er í forgrunni. Verkið er byggt á skemmtilegasta gamanleik Shakespeares, As you like it en Karl Ágúst Úlfsson hefur endurort texta skáldsins á léttleikandi nútímamáli í nýrri leikgerð.  Ágústa Skúladóttir leikstjóri er þekkt fyrir fjörugar, litríkar og heillandi sýningar. Í helstu hlutverkum eru margir fremstu gamanleikarar  og tónlistarmenn landsins. (Frumsýnt í janúar í Kassanum).

    Jólaboðið er bráðfyndin, hlýleg og óvenjuleg sýning sem heillaði áhorfendur á aðventunni í fyrra! Við fylgjumst við með sögu íslenskrar fjölskyldu í leikandi sviðsetningu, eins og Gísla Erni Garðarssyni er einum lagið. Við gægjumst inn í stofu á aðfangadagskvöld, reglulega, á einnar aldar tímabili! (Sýningar hefjast í nóvember).

    Jóðboðið sló í gegn á síðasta leik´ári

    Leiksýningin Prinsinn var frumsýnd í Frystiklefanum á Rifi í apríl og hélt síðan í leikferð um landið. Nú er komið að sýningum í Þjóðleikhúsinu sjálfu. Hjartnæmt og fyndið nýtt íslenskt leikrit, byggt á sönnum atburðum, sem talar beint til okkar. María Reyndal leikstýrir verki sem hún skrifaði ásamt Kára Viðarssyni.

    Litla sviðið – tvær nýjar íslenskar barnasýningar og tvö áleitin ný verk fyrir fullorðna

    Umskiptingur er ævintýralega skemmtilegt barnaleikrit eftir einn af okkar ástsælustu höfundum, sem gerði mikla lukku á liðnu leikári! Umskiptingur hlaut tilnefningar til Grímunnar og Sagna á verðlaunahátíð barnanna sem barnasýning ársins. Sýningar hefjast strax í ágúst á Litla sviðinu. Höfundur: Sigrún Eldjárn, ný tónlist: Ragnhildur Gísladóttir, leikstjórn: Sara Martí Guðmundsdóttir.

    Sýningar á hugljúfu jólasögunni um Láru og Ljónsa seldust upp á augabragði í fyrra, enda njóta bækur Birgittu Haukdal um vinina góðu ómældra vinsælda hjá íslenskum börnum. Leikverkið hentar vel yngstu áhorfendunum og er tilvalin skemmtun í aðdraganda jólanna. Birgitta Haukdal samdi ný lög fyrir leiksýninguna en leikstjórn og handrit er eftir Góa.  Sýningar hefjast í nóvember á Litla sviðinu.

    Lára og Ljónsi snúa aftur

    Eyja er nýtt íslenskt leikrit um ólíka menningarheima undir einu þaki, þrána eftir því að brjóta múra, að tilheyra og mynda tengsl. Sviðslistahópurinn O.N., sem samanstendur af heyrnarlausu og heyrandi listafólki, setur upp tvítyngdar sýningar, jafn aðgengilegar fyrir þá sem hafa íslenskt raddmál og íslenskt táknmál að móðurmáli. Eyja er fyrsta leiksýning sinnar tegundar sem sýnd er í Þjóðleikhúsinu. Frumsýnt í nóvember í Kassanum. Leikstjórn: Andrea Elín Vilhjálmsdóttir.

    Íslandsklukkan birtist hér í áleitinni sviðsetningu sem Þjóðleikhúsið hefur þróað á síðustu tveimur árum með leikhópnum Elefant sem samanstendur af ungum íslenskum leikurum af blönduðum uppruna. Í gegnum skapandi vinnu með Íslandsklukkuna rannsaka þau stöðu sína í samfélaginu út frá Íslandssögunni, þjóðararfinum og menningarlegum uppruna sínum, í samvinnu við Þorleif Örn Arnarsson leikstjóra.

    Kjallarinn festir sig í sessi sem „klassabúlla“

    Kjallarinn birtist í nýjum búningi og með nýjum áherslum í fyrra og óhætt er að segja að þessi klassabúlla hafi vakið lukku. Sama stefna er áfram við lýði þar sem uppistand, kabarettar, drag-sýningar, sketsasýningar, hádegisleikhús og fleira gleður leikhúsgesti. 

    Kjallarinn mun breytast í kabarettklúbb á föstudagskvöldum í vetur. Ýmsir hópar taka yfir sviðið og leika á als oddi: Dömur og herrar, Reykjavík Kabarett, Coney Iceland, Sóðabrók og fleiri. Gógó Starr leiðir dragsýningar og Margrét Erla Maack býður upp á kabaretthlaðborð.  Þá mun okkar færasta draglistafólk í Drag-Súg syngja sinn Svanasöng nú í haust.  Kórinn Viðlag mun standa fyrir reglulegum tónleikum á þriðjudagskvöldum í allan vetur.

    Fullorðin er sprenghlægilegur gamanleikur um það hlutskipti að verða fullorðin og misheppnaðar tilraunir okkar til að sannfæra aðra um að við séum það. Sýningin gekk fyrir fullu húsi á Akureyri síðasta vetur. Improv Ísland hefur kitlað hláturtaugar áhorfenda í Kjallaranum um árabil og stór hluti áhorfenda kemur aftur og aftur, enda er engin sýning eins. Jakob Birgis fer með gamanmál á skotheldri kvöldstund í Kjallaranum. Leikhópurinn Kanarí vinnur glænýja og bráðfyndna sketsasýningu í Kjallaranum á vormisseri. Á síðasta ári frumflutti Sviðslistahópurinn Óður Ástardrykkinn – gamanóperu á íslensku í Þjóðleikhúskjallaranum við frábærar undirtektir. Nú snýr hópurinn aftur með Don Pasquale, í nýrri íslenskri þýðingu og með húmorinn að vopni. 

    Góðan daginn, faggi sló sannarlega í gegn í Kjallaranum á liðnu leikári, með yfir 40 uppseldum sýningum, einróma lofi gagnrýnenda og Grímutilnefningum. Sýningar halda áfram í Kjallaranum og auk þess fer sýningin í leikferð um landið þar sem verður bæði boðið upp á sýningar fyrir almenning og einnig verða sérstakar boðssýningar fyrir elstu bekki grunnskóla og yngstu bekki framhaldsskóla.

    Sýninginn Góðan daginn faggi hefur hlotið einróma lof gagnrýnenda

    Hádegisleikhúsið í endurnýjuðum Leikhúskjallara vakti mikla ánægju leikhúsgesta á síðasta leikári og við höldum ótrauð áfram að bjóða upp á ný íslensk verk í hádeginu. Í Hádegisleikhúsinu sjá gestir leiksýningu yfir léttum og ljúffengum hádegismat.

    Erlent samstarf og leikhús í stórmarkaði

    Þjóðleikhúsið hefur stóraukið erlent samstarf með komu framúrskarandi erlendra listamanna til landsins og með gestasýningum og erlendum samstarfsverkefnum

    Complicité
    Fyrr á árinu var tilkynnt um viðamikið samstarf við Complicité, einn virtasta leikhóp heims á síðustu áratugum.  Complicité þróar nú í samstarfi við Þjóðleikhúsið og nokkur önnur virt evrópsk leikhús glænýja sýningu sem byggð er á magnaðri skáldsögu eftir pólska Nóbelsverðlaunahafann Olgu Tokarczuk, Drag plóg þinn yfir bein hinna dauðu. Sýningin verður frumsýnd í Bretlandi í janúar 2023 en sýnd í Þjóðleikhúsinu í september sama ár eftir leikferð í mörg fremstu leikhús Evrópu.

    Gestaleikur frá Póllandi
    Samstarfsleikhús Þjóðleikhússins í Póllandi, Stefan Żeromski leikhúsið, færir okkur eina af sínum rómuðustu leiksýningum, Splendor in the Grass í gestaleik sem sýndur verður í júní 2023. Gestaleikurinn er hluti af viðamiklu listrænu samstarfi Þjóðleikhússins og Stefan Żeromski leikhússins í Kielce í Póllandi. Sýnt verður á pólsku, með enskum texta.

    Pussy Riot sýnir í Þjóðleikhúsinu
    Gjörningar Pussy Riot eru án efa einhver mikilvægustu pólitísku listaverk 21. aldarinnar. Ef einhverjir listamenn hafa gefið allt fyrir listina þá eru það þessir töffarar. Þungamiðjan í sýningunni er saga Möshu og lýsing hennar á helvítinu sem Rússland Pútins er. Glerhörð kvöldstund sem kýlir beint í magann og á sér í alvöru talað engan sinn líka.“

    Pussy Riot hafa gefið allt fyrir list sína

    Ragnar Kjartansson
    Þessi sýning Pussy Rioter sambland af tónleikum, gjörningalist og pólitískum viðburði. Sýningin var að hluta til æfð og þróuð í Þjóðleikhúsinu nú á vordögum rétt eftir að Masha Alyokhina forsprakki hópsins kom sér hingað undan klóm rússnesks óréttlætis. Sýningin er skipulögð í samhengi við fyrstu yfirlitssýningu Pussy Riot sem opnar í Kling & Bang í lok nóvember.

    Aspas er nýlegt verk eftir Gianina Cărbunariu í leikstjórn Guðrúnar S. Gísladóttur. Verkið verður sviðsett í stórmarkaði og aðgangur verður ókeypis. Mörkin milli flytjenda og áhorfenda, leikhúsgesta og neytenda verða óljós og útkoman er leikhús þar sem allt getur gerst!  Listrænn stjórnandi með Guðrúnu er Filippía I. Elísdóttir.

    Viðamikil önnur starfsemi, fræðslustarf og þróun

    Til viðbótar við hið fjölbreytta úrval leiksýninga stendur Þjóðleikhúsið fyrir viðamikilli annarri starfsemi. Fræðslu- og barnastarf Þjóðleikhússins er viðamikið en leikhúsið býður ólíkum skólahópum í heimsókn í leikhúsið og fer í skóla víða um land með sýningar og til að kynna töfraheim leikhússins. Jafnframt tekur leikhúsið þrátt í þróun kennsluefnis, stendur fyrir námskeiðahaldi, styður við áhugahreyfingu leikhúsfólks og stendur fyrir Þjóðleik í samstarfi við fjölda skóla, leikfélaga og landshlutasamtaka.  Þjóðleikhúsið stendur fyrir námskeiðum og umræðum eftir sýningar, á eigin vegum og í samstarfi við aðra. Fjölbreytt samstarf við Endurmenntun HÍ hefur skilað áhugaverðum námskeiðum sem njóta vinsælda. Þjóðleikhúsið stendur að viðburðum í samvinnu við Stofnun Vigdísar Finnbogadóttur í tengslum við 400 ára afmæli Molières.  Þjóðleikhúsið stendur fyrir markvissri þróun leikverka og vinnustofa þar sem hugmyndir eru þróaðar.

    Græn stefna Þjóðleikhússins

    Þjóðleikhúsið leggur áherslu á umhverfisvernd og loftslagsmál í starfsemi sinni og hefur markað sér græna stefnu sem felst í því að minnka kolefnisspor leikhússins. Af þeim sökum er Þjóðleikhúsblaðið nú prentað í mun minna upplagi en áður á sama tíma og tryggt er að allir áhugasamir geti fengið blaðið á því formi sem þeir kjósa. Á leikhusid.is er hægt að óska eftir að fá blaðið sent rafrænt eða í pósti. Jafnframt er öll prentun okkar með umhverfisvænum hætti og Svansvottuð.

    Á eigin vegum

    ágú 28, 2022   //   by gunnarandri   //   Uncategorized  //  Engar athugasemdir
    Sigrún Edda Björnsdóttir fer með aðalhlutverkið í fyrstu frumsýningu vetrarins í Borgarleikhúsinu.

    Almennt er sætabrauðið í erfidrykkjum að aukast á kostnað mæjónessins

    Sigþrúður er ekkja, stundar blaðburð, garðyrkju og jarðarfarir af miklum móð. Hún er ein en ekki einmana – hún hefur alltaf þurft að treysta á sjálfa sig og er ljómandi góður félagsskapur ef út í það er farið. Fólkið hennar er allt horfið á braut – en hefur reyndar farið mislangt. Sigþrúður gerir sér litlar vonir enda hefur lífið kennt henni að slíkt hafi ekkert upp á sig en draumarnir hafa þó fylgt henni frá blautu barnsbeini og nú fá þeir loks byr undir báða vængi.

    Á eigin vegum byggir á rómaðri skáldsögu metsöluhöfundarins Kristínar Steinsdóttur sem kom út árið 2006. Bókin var tilnefnd til Bókmenntaverðlauna Norðurlandaráðs og hlaut Fjöruverðlaunin árið 2007.

    Tjarnarbíó vill stækka við sig

    ágú 26, 2022   //   by gunnarandri   //   Uncategorized  //  Engar athugasemdir
    Úr sýningunni Blóðuga kanínan sem sýnd var í Tjarnarbíói

    Tjarn­ar­bíó og SL (Banda­lag sjálf­stæðra leik­húsa) hafa sett af stað sam­fé­lags­miðlaher­ferð til að vekja at­hygli á að Tjarn­ar­bíó, heim­ili sjálf­stæðra sviðslista og helsta sýn­inga- og vinnu­rými sjálf­stætt starf­andi at­vinnu­leik­hópa, hafi ekki leng­ur burði til að sinna allri sen­unni.

    Fram kem­ur í til­kynn­ingu að á síðustu árum hafi sviðslista­fólki fjölgað veru­lega á Íslandi og fjöl­breytni auk­ist. Óperu­hóp­ar, sirku­slista­hóp­ar, uppist­ands­hóp­ar, dans­leik­hóp­ar, improv­hóp­ar, kaba­rett­hóp­ar, drag-hóp­ar og sviðlista­hátíðir hafi bæst við flór­una, þar sem fyr­ir voru leik- og dans­hóp­ar.

    „Lausn­in er ekki langt und­an. SL og stjórn Tjarn­ar­bíós leggja til að Reykja­vík­ur­borg svari þessu kalli lista­fólks með því að leggja þeim til hús­næðið við hliðina á Tjarn­ar­bíói, sem get­ur mætt öll­um þörf­um þess­ar­ar ört vax­andi senu, en í Tjarn­ar­bíói starfa í um 250 at­vinnusviðslista­menn á þessu leik­ári,“ seg­ir í til­kynn­ing­unni.

    Stærra hús­næði Tjarn­ar­bíós myndi svara knýj­andi þörf um eft­ir­far­andi:

    • Æfingaaðstaða
    • Geymslupláss fyr­ir leik­mynd­ir
    • Skrif­stofu­rými fyr­ir starfs­fólk
    • Stúd­íó­rými fyr­ir lista­fólk til að þróa verk sín
    • Aðstaða til leik­list­ar­kennslu fyr­ir börn og full­orðna
    • Bætt aðstaða fyr­ir leik­hús­gesti

    „Þessu til viðbót­ar er nauðsyn­legt að byggja annað svið yfir þessa ört stækk­andi og sí fjöl­breytt­ari senu. Þar er hent­ug lausn að byggja yfir portið bak við Tjarn­ar­bíó. Þar er kjörið rými fyr­ir annað svið með 100 áhorf­enda sal, sem ólíkt væri hinu sviði Tjarn­ar­bíós að stærð og lög­un. Það myndi þjóna vel fjölda sviðsverka sem nú­ver­andi sal­ur hent­ar illa fyr­ir og gera Tjarn­ar­bíói kleift að sinna hlut­verki sínu með sóma,“ seg­ir einnig í til­kynn­ing­unni.

    FÍFLIÐ – Karl Ágúst Úlfsson (Kveðjusýning)

    ágú 16, 2022   //   by gunnarandri   //   Uncategorized  //  Engar athugasemdir
    Karl Ágúst Úlfsson kveður leiksviðið með sýningunni Fíflið.

    Karl Ágúst Úlfsson ætlar að ljúka sviðsferlinum með leiksýningu eftir sjálfan sig í Tjarnarbíói. Sýningin verður frumsýnd í byrjun september og heitir Fíflið.

    Í viðtali í Vikulokunum á Rás1 um síðastliðna helgi segir Karl Ágúst meðal annars: „Fíflið er fyrirbæri sem er orðið afgamalt í mannkynssögunni, hirðfíflið. Sá sem veitir konungnum og valdhafanum aðhald. Fíflið má segja hvað sem er svo framarlega sem það er fyndið. Þegar ég fór að velta fyrir mér ferli mínum og hvernig ég vildi að þessu lyki þá leitaði þessi hugmynd mikið á mig. Ég hef í raun og veru, ásamt félögum mínum, gengt einhverskonar hliðstæðu hlutverki við fíflið við hirð konunga.“

    HVORT VILTU HELDUR VERA KÓNGURINN EÐA FÍFLIÐ?

    Það er vandasamt að hafa vald yfir öðru fólki. Þess vegna hafa allir konungar þurft á því að halda að einhver standi við hlið hásætisins og dragi þá sundur og saman í háði. Einhver þarf að gera völd konungsins hlægileg og minna hann á að þrátt fyrir allt er hann ófullkominn maður eins og við hin. Þetta er hlutverk hirðfíflsins. Og fíflinu leyfist að segja nánast hvað sem er í návist konungsins – svo framarlega sem það er fyndið.

    Í sýningunni Fíflið kynnumst við hirðfíflum allra tíma og heimshluta og rýnum í samband fíflsins og valdsins. Eru það verstu harðstjórarnir sem ekki þola að skopast sé með þá? Er fíflinu bókstaflega ekkert heilagt? Getur fíflið haft raunveruleg áhrif á rás sögunnar og eru fíflið og kóngurinn ef til vill ein og sama persónan þegar allt kemur til alls?

    Karl Ágúst Úlfsson hefur brugðið sér í allra kvikinda líki í íslensku menningarlífi og meðal annars gegnt hlutverki fíflsins við hirð þeirra sem stjórna samfélagi okkar. Í þessu verki setur hann eitt og annað í nýtt og óvænt samhengi, en þar kemur 40 ára reynsla hans sem samfélagsrýnir, höfundur og sviðslistamaður í góðar þarfir.

    HANDRIT: Karl Ágúst Úlfsson
    LEIKSTJÓRN: Ágústa Skúladóttir
    TÓNLIST: Eyvindur Karlsson
    LEIKMYND OG BÚNINGAR: Guðrún Öyahals
    LÝSING: Ólafur Ágúst Stefánsson
    FLYTJENDUR: Karl Ágúst Úlfsson og Eyvindur Karlsson

    Hamingjudagar

    ágú 3, 2022   //   by gunnarandri   //   Uncategorized  //  Engar athugasemdir
    Hamingjudagar verður frumsýnt 2. september í Hofi.

    „Ó, þetta er hamingjudagur, þetta verður enn einn hamingjudagur!“ segir Vinní, frægasta kvenpersóna Samuels Becketts. Hún er ákveðin í því að finnast lífið hamingjuríkt og fallegt, þrátt fyrir að útlitið sé allt annað en bjart.

    Hamingjudagar er um takmarkalausan lífsvilja manneskjunnar og ódauðleika bjartsýninnar og er áreiðanlega lang skemmtilegasta leikrit nóbelshöfundarins sem lætur gamminn geisa með hrífandi húmor, visku og ólíkindi.

    Samuel Beckett er fæddur í Dublin á Írlandi föstudginn 13. apríl árið 1906. Hann settist að í París árið 1937. Hamingjudagar var frumflutt í Cherry Lane-leikhúsinu í New York 17. september 1961 og frumsýnt á Íslandi í Lindarbæ í Reykjavík árið 1965 á vegum leikhópsins Grímu í leikstjórn Eyvindar Erlendssonar. Beckett hlaut bókmenntaverðlaun Nóbels árið 1969. Hann lést í París árið 1989.

    Höfundur Samuel Beckett
    Þýðing Árni Ibsen
    Leikarar Edda Björg Eyjólfsdóttir, Árni Pétur Guðjónsson
    Leikstjórn Harpa Arnardóttir
    Leikmynd og búningar Brynja Björnsdóttir
    Lýsing Ólafur Ágúst Stefánsson
    Tónlist Ísidór Jökull Bjarnason
    Þýðing yfirfarin Hafliði Arngrímsson

    ATH: ef miði er keyptur fyrir 20. ágúst fæst 20 prósent forsöluafsláttur.

    Loksins aftur Act Alone á Suðureyri

    ágú 1, 2022   //   by gunnarandri   //   Uncategorized  //  Engar athugasemdir
    Act alone á Suðureyri fer fram dagana 4. – 6. ágúst

    Engin veit hve haft hefur fyrr en höft hindra árlega gleði á borð við Actið. Það skapast eitthvað tómarúm og tilveran verður örlítið einsleitari. Í tvö ár hefur ekki verið neitt Act en nú loksins er haldið Act á ný á Suðureyri. Act alone á Suðureyri fer fram dagana 4. – 6. ágúst og er dagskráin einstaklega vegleg og um leið alþjóðleg. Eitthvað í boði fyrir alla en alveg einsog í gamla daga þá er ókeypis á Actið einsog verið hefur frá upphafi. Boðið verður uppá einstakar leiksýningar, tónleika, götulist, myndlist, ritlist, uppistand og dans. Að vanda er talan einn í aðalhlutverki á Actinu því aðeins verður boðið uppá viðburði með einum listamanni hverju sinni. 

    Einsog í gamla daga þá hefst Actið með veglegri fiskiveislu enda mikilvægt að næra magann áður en andinn er fóðraður með einstakri list. Að þessu sinni er alþjóðlegur blær yfir dagskrá ársins því boðið verður upppá viðburði frá Bandaríkjunum, Danmörku, Ítalíu og Parakúæ auk vitanlega fjölda innlendra viðburða. Frá Bandaríkjunum fáum við einleikina, Let It be Art með Ronald Rand sem fjallar um leikhúslistamanninn Harold Clurman og Pink Hulk með Valerie David sem er sjálfsævisöguleikur þar sem leikkonan segir á áhrifaríkan hátt fyrir glímu sinni við krabbamein. Frá Parakuæ koma tvær brúðulistakonur Carola Mazzotti og Tess Rivarola. Þær hafa hlotið alþjóðlega vikurkenningu fyrir list sína og verða bæði með brúðusleikýningar sem og brúðunámskeið fyrir börn. Danssýning ársins er Okkur hefur langað til að brotna í sundur með hinni dönsku Mathilde Mensink. Frá Ítalíu kemur svo trúðurinn Marco Borghetti.

    Að vanda stígur fjöldi íslenskra listamanna á stokk á Actinu. Björn Thoroddsen slær fyrstu tóna ársins með einstökum konsert á opnunarkveldinu. Kveldið eftir stígur kollegi hans Herbert Guðmundsson á stokk. Daginn eftir, á laugardag, verða fjölskyldutónleikar með Dr. Gunna og um kveldið eru tónleikar með Kela. Af leiksýningum má nefna, Það sem er með Maríu Ellingsen og Síldarstúlkur með Halldóru Guðjónsdóttur. Þrír einleikir verða á fjölunum með leikaranemum úr Listaháskóla Íslands. Margt fleira mætti nefna m.a. verður  Arnar Jónsson á eintali og Hrafnhildur Hagalín er skáld ársins. 

    Loks má geta þess að það verður einnig hægt að fara ókeypis á Actið, því langferðabifreið Actins gengur daglega millum Ísafjarðar og einleikjaþorpsins Suðureyri.

    loading

    Takk fyrir að skrá þig!