Flokkstjórinn – Einleikur

Útileikhús um unglinga og illgresi.

Illgresið er okkar óvinur. Þetta eru kraftmiklar og frekar plöntur sem ógna því gróðurfari sem þegar er til staðar. Þær geta spírað mjög snemma á vorin og því berum við ábyrgð á að uppræta illgresið áður en það nær að mynda fræið. En ræturnar ná oft djúpt ofan í jarðveginn, og þá þarf meira til en litlar skóflur, einfara og hrífur.

Leiksýningin „Flokkstjórinn“ byggir á reynslu Hólmfríðar sem flokkstjóri í unglingavinnu en starfið veitti innsýn í samskipti unglinga, eineltismenningu og hve grimm mannskepnan getur verið þegar hún þráir ekkert heitar en að tilheyra hópnum. Er til slæmt fólk? Eða einungis slæm hegðun? Þarf virkilega alltaf að stíga í spor karlmanna til að öðlast virðingu? Jafnvel óvæntasta fólk getur brotið þig niður, sama hversu mikil völd þú ert með í rýminu.

Einleikurinn er sýndur á hringleikahúsinu Grandahvarfi, Kópavogi í júlí. Verkefnið er hluti af Skapandi sumarstörfum í Kópavogi og er styrkt af Kópavogsbæ. Panta þarf miða á tix.is, en frítt er inn á sýninguna!

Sviðið er staðsett á horni Elliðahvammsvegar og Grandahvarfs. Strætó 28 stoppar hjá hringleikahúsinu, á biðstöð sem heitir Elliðahvammur. Einnig er nóg er af bílastæðum við sviðið. Verkið er sýnt utandyra, komið klædd eftir veðri. Áhorfendur sitja á grasþöktum tröppum. Sniðugt er að koma með pullur, tjaldstóla eða hvað annað sem þægilegt er að sitja á á meðan sýningunni stendur.
Lengd: 40 mín.

Höfundar:
Hólmfríður Hafliðadóttir og Magnús Thorlacius

Leikkona:
Hólmfríður Hafliðadóttir

Leikstjóri:
Magnús Thorlacius

Tónlist:
Iðunn Einars

Aðstoð við plakat:
Tómas Óli K. M.

Myndbönd:
Hákon Örn Helgason

Sérstakar þakkir:
Vinnuskólinn í Kópavogi, Starfsfólk Molans, Steinunn hjá Starfsleikni, Soffía hjá Kópavogsbæ, fyrrum flokkstjórar, vinir og allir unglingarnir