Hin dulúðuga listakona Ásta Sigurðardóttir (1930-1971) var lifandi goðsögn í bæjarlífi Reykjavíkur um miðbik síðustu aldar. Myndlist hennar og ritverk vöktu aðdáun en líka hneykslun, og oft urðu skilin á milli lífs þessarar hæfileikaríku en breysku konu og höfundarverks hennar óljós.

Saga um vonir, langanir og drauma sem enn geta ræst

Ásta hikaði ekki við að ögra ríkjandi viðhorfum og fylgja kalli hjarta síns, en brenndi kertið í báða enda og féll frá langt fyrir aldur fram. Hún varð táknmynd hinnar frjálsu konu, kynfrelsis nýrra tíma og framúrstefnulistar en mætti fordómum og útskúfun og kynntist hinu dýpsta myrkri sorgar og örvæntingar. En saga Ástu er líka saga um vonir, langanir og drauma sem enn geta ræst.

Í þessu nýja verki er svipmyndum af Ástu og skáldskap hennar fléttað saman. Matthildur Hafliðadóttir söngkona og hljómsveit Guðmundar Óskars Guðmundssonar flytja ljóð Ástu og endurskapa tíðarandann í tónum.

Í myrkri eru allir kettir gráir er svokallaður tvíleikur, eða tveir einleikir sýndir sama kvöldið. Verkin eru að mörgu leyti ólík en fjalla þó bæði í grunninn um mennskuna og hvernig fólk glímir á ólíkan hátt við áföll.

Næstu sýningar verða í Hlöðunni, Litla-Garði á Akureyri 25. sept. 26. sept. 30. sept. og 1. okt. Í hverri viku rennur hluti andvirðis seldra miða til góðgerðarmála. Fyrstu vikuna renna 15% af miðasölu til Rauða krossins.

Fyrra verk tvíleiksins heitir Heimþrá og fjallar um Öldu, sem vinnur að lokaritgerð sinni til meistaragráðu í HA og tekur viðtöl við flóttamenn. Einn þeirra lánar henni stílabók með frásögnum samlanda sinna úr flóttamannabúðunum og smám saman vekja þær hjá Öldu viljann til að vinna sig út úr eigin missi.

Seinna verkið heitir Líf og fjallar um Sissu, sem er tónlistarkona af lífi og sál. Hún hefur óbilandi trú á eigin ágæti en finnst hún ekki alltaf njóta sannmælis í listaheiminum, þar sem klíkuskapurinn ræður ríkjum. Eftir eins sumars frægð á unglingsárunum og vinsælan einsmellung dreymir hana um meira. Svo miklu meira. En lífið þvælist fyrir henni og áframhaldandi frægð lætur bíða lengi eftir sér. En Sissa gefst ekki upp fyrr en í fulla hnefana og loksins, einn góðan veðurdag, springur allt út.

Hugmyndin að tvíleiknum fæddist á fundi hjá leikhópnum Umskiptingum árið 2018. Þá voru bæði Margrét og Sesselía komnar með hugmyndir að einleikjum sem þær langaði að skrifa. Þær ræddu innihald beggja einleikjanna og ákváðu að sýna þá saman og fá Jennýju Láru til þess að leikstýra þeim. Margrét hellti sér svo í að skrifa einleikinn Líf og á meðan samdi Sesselía Heimþrá. Áformað var að sýna tvíleikinn haustið 2020, en önnur bylgja Covid kom í veg fyrir það. Báðir einleikirnir nutu þó góðs af biðinni og höfundar þeirra fóru í gegnum nokkrar útgáfur handritanna sem nú eru fullkomnuð.

Atvinnuleikhópinn Umskiptinga skipa þau Birna Pétursdóttir, Jenný Lára Arnórsdóttir, Margrét Sverrisdóttir, Sesselía Ólafsdóttir og Vilhjálmur B. Bragason. Árið 2017, þegar leikhópurinn var stofnaður markaði það tímamót. Það var í fyrsta skipti í 4 ár sem atvinnuleikhópur var starfandi á Akureyri. Það sama ár sýndu þau sitt fyrsta verk, „Framhjá rauða húsinu og niður stigann“. Það vakti mikla eftirtekt og fékk góða dóma og var sýnt bæði í Hlöðunni, rétt utan Akureyrar, og í Tjarnarbíói og árið eftir var leikhópurinn tilnefndur til Grímunnar sem sproti ársins. Árið 2019 settum þau svo upp frumsamda fjölskylduleikritið
„Galdragáttin og þjóðsagan sem gleymdist“, með frumsamdri tónlist og aðkomu fjölmargra listamanna víðsvegar að af landinu. Hún fékk frábærar viðtökur og fjórar stjörnur í Morgunblaðinu og árið eftir var sýningin tilnefnd til Grímunnar sem barnasýning ársins.

Leikstjóri og framleiðandi beggja einleikja er Jenný Lára Arnórsdóttir, en hún útskrifaðist sem leikari og leikstjóri frá KADA í London árið 2012. Hún hefur einbeitt sér meira að leikstjórn en að leika frá útskrift en meðal hlutverka sem hún hefur farið með eru Sophie í Blik í uppsetningu Leikhópsins Artik í Gamla Bíói, Þórey í Hrútum eftir Grím Hákonarson, Söndru í Djúpum sporum í Tjarnarbíói og kvenhlutverkið í Elsku – ástarsögur Norðlendinga sem var gestasýning hjá LA veturinn 2016-2017.
Meðal leikstjórnarverkefna og handritsskrifa eru heimildarverkið Skjaldmeyjar hafsins með hjá leikhópnum Artik, gamanóperan Piparjúnkan og þjófurinn með Óperuhópnum, Einki orð með InTime Theatre og Tjóðpalli Føroya og Heima er þar sem ég halla mér – upplifunarferð um Melrakkasléttu.
Hún er meðlimur í leikhópnum Umskiptingar en hún sá um framleiðslu, markaðssetningu og verkstjórn á fyrsta verki þeirra Framhjá rauða húsinu og niður stigann. Jenný skrifaði og tilheyrði höfundateymi leikritsins Galdragáttin og þjóðsagan sem gleymdist ásamt því að leika í fjölmörg hlutverk í verkinu en það var sýnt hjá Leikfélagi Akureyrar haustið 2019, en það verk var tilnefnt til Grímuverðlaunanna árið 2020 sem Barnasýning ársins.

Verkið Heimþrá er samið og leikið af Sesselíu Ólafs, en hún lærði leiklist og leikstjórn í leiklistarskólanum KADA í London. Hún útskrifaðist árið 2012 og hefur frá útskrift leikið bæði hérlendis og erlendis, í kvikmyndum og á sviði. Þar ber helst að nefna Melody í kvikmyndinni The Circle, Ylfu í þáttaröðinni Föngum, Sessý í Sjeikspír eins og hann leggur sig og Dimmbjörgu og Móra í Galdragáttinni.
Skrif hafa alltaf heillað hana og hún hefur samið handrit fyrir og leikstýrt tveimur stuttmyndum sem báðar hafa unnið til verðlauna, á Íslandi og erlendis.

Sesselía er einn af stofnendum bæði gríndúettsins Vandræðaskálda og leikhópsins Umskiptinga, en undir þeirra formerkjum hefur hún verið í höfundateymi revíu og tveggja leikrita, nýlega Galdragáttinni og þjóðsögunni sem gleymdist, en hún samdi líka helming söngtexta og tónlistar verksins. Verkið Líf er samið og leikið af Margréti Sverrisdóttur, en hún útskrifaðist úr BA námi í leiklist frá Arts Ed London 2003. Frá útskrift hefur hún skrifað, leikið og leikstýrt bæði í sjónvarpi og leikhúsi. Margrét er Umskiptingur og lék m.a í barnaleiksýningunni Galdragáttin og þjóðsagan sem gleymdist sem fékk tilnefningu til Grímunnar sama ár. Verk sem hún hefur leikið í eru m.a. Gallsteinar afa Gissa, Halla, Þöggun og Bólu-Hjálmar sem fékk Grímuverðlaunin 2009. Hún var umsjónarkona Stundarinnar okkar hjá Rúv í tvö ár og skrifaði og lék í barnaþáttunum Himinlifandi í samstarfi við Biskupsstofu og N4.

„Það hjólar enginn svona vegalengd í norðanátt og skafrenningi nema hann sé geðbilaður.“

„Við erum öll einbýlishús, jólaskrautið uppi og öll ljós kveikt, ein upp á hól og enginn veit hvað er að gerast inni.“ Húsmóðir úr Hlíðunum, arkítekt úr Vesturbænum, unglingur úr Breiðholti og iðnaðarmaður úr Grafarvogi – Fjórir Reykvíkingar eru læstir inni í fundarherbergi í Borgartúninu af öryggisástæðum. Þau deila um skipulagsmál, Dominos og hverjum er raunverulega hægt að kenna um allt sem er að. Ef byggðin er of þétt, þá heyrum við tómahljóðið í hjörtum nágranna okkar og þá er erfiðara að sofna á kvöldin. Þar liggur vandinn.

Hinn bráðfjörugi brúðuleikur Kómedíuleikhússins um Bakkabræður er sló í gegn fyrir vestan í sumar heldur nú suður á svið. Bakkabræður hafa komið sér vel fyrir i Gaflaraleikhúsinu í Hafnarfirði og er fyrsta sýning laugardaginn 19. september kl.13.00. Önnur sýning verður daginn eftir kosningar, sunnudaginn 26. september kl.13.00. Miðasla fer fram á tix.is og í Gaflaraleikhúsinu.

Bakkabræður er bráðfjörugt brúðuleikrit um hina einu sönnu bræður frá Bakka þá Gísla, Eirík og Helga. Kómedíuleikhúsið hefur fangað fjörið sem fylgir þessum þekktustu klaufabárðum Íslandssögunnar og setur upp sýningu þar sem ævintýri Bakkabræðra eru færð yfir í töfrandi búning brúðuleikhússins.

Lögin í sýningunni eru sungin af Diddú við tónlist sem Björn Thoroddsen, gítarleikari, semur og flytur. Marsibil G. Kristjánsdóttir hannar ævintýraheim leiksýningarinnar og gerir brúðurnar sömuleiðis. Leikari og þjónn brúðanna er Elfar Logi Hannesson, sem einnig er höfundur verksins ásamt Sigurþóri A. Heimissyni sem jafnframt leikstýrir.

Rómeó og Júlía er saga af sannri ást en um leið ástsýki og ungæðishætti. Í forgrunni verður mögnuð barátta ungrar konu gegn yfirþyrmandi feðraveldi. Fegurstu sögurnar geta sprottið upp úr hræðilegustu aðstæðunum.

Leikritið Rómeó og Júlía er frægasta ástarsaga allra tíma. Hún birtist hér í nýrri þýðingu og með grípandi tónlist, í útfærslu sem hrífur áhorfandann með inn í heillandi og hættulegan heim.

Þorleifur Örn Arnarsson er einn fremsti leikstjóri Evrópu og einn listrænna stjórnenda hins virta leikhúss Volksbühne. Hann á að baki geysivinsælar sýningar á Íslandi á borð við Engla alheimsins og Njálu. Nú hefur hann gengið til liðs við nýtt listrænt teymi Þjóðleikhússins þar sem hann mun starfa á næstu árum.

Öllum sýningum lýkur á umræðum með leikhópnum

Uppfærslan á Rómeó og Júlíu talar til samtíma okkar með beinskeyttum hætti og áhorfendum býðst að taka þátt í umræðum með listafólkinu að lokinni sýningu.

Gaflaraleikhúsið er einstaklega stolt af því að kynna BÍDDU BARA – hlátursprengju fyrir glaðsinna grindarbotna sem verður frumsýnt 10. september 

BÍDDU BARA! er eftir stórstjörnurnar Sölku Sól Eyfeld, Selmu Björnsdóttur og Björk Jakobsdóttur sem leiða nú saman hryssur sínar í fyrsta sinn. 

Þetta  einlæga, beitta og drepfyndna verk fjallar um raunveruleika íslenskra kvenna; um vonir og drauma, biturleika og frú-strasjónir, uppeldi, kvíða og hvítvín. Þær Björk, Salka Sól og Selma  byggja verkið á sinni eigin reynslu og draga ekkert undan en ljúga helling. Þetta er verk um íslenskar konur, samið af íslenskum konum og fyrir íslenskar konur, hinsegin, kynsegin og allar hinar (og fyrrverandi, núverandi og tilvonandi maka sem þora að koma). Það má segja að þetta sé olnboga-verk, því áhorfendur munu skjóta olnboga í sessunautana ótt og títt og hvísla: svona ert þú! Uppistand, leiksenur og söngur af bestu sort.

Salka Sól sló fyrst í gegn sem söngkona og nú síðast sem Ronja ræningjadóttir. Hún er ein allra vinsælasta og hæfileikaríkasta listakona landsins um þessar mundir. 

Selma Björns hefur verið ástmögur þjóðarinnar frá því hún var í Grease og svo stimplaði hún sig rækilega inn sem stórstjarna í Söngvakeppninni. Hún hefur leikstýrt stórsýningum  á borð við Vesalingana á undanförnum árum og leikið á sviði og í sjónvarpsþáttum en leikur hér sitt stærsta hlutverk til þessa. 

Björk Jakopsdóttir sló rækilega í gegn með einleik sínum Sellófon hér um árið sem var settur upp í 19 löndum víða um heim. Hún hefur síðan þá skrifað og leikstýrt stórsmellum á borð Blakkát og Mömmu klikk! auk þess að vera leikhússtýra Gaflaraleikhússins. Hún snýr loksins aftur á svið sem leikkona í Bíddu bara!
Þetta er því alvöru stórstjörnu tríó!

Það er nefnilega  ekki nóg með að þær stallsystur skrifi og leiki í verkinu heldur hafa þær samið í félagi við Karl Olgeirsson gullfalleg og oft á tíðum bráðfyndin lög – og texta – sem bæta miklu við verkið. Þetta eru lög sem við í Gaflaraleikhúsinu spáum að muni lifa langt fram yfir líftíma sýningarinnar. Og auðvitað verður enginn svikinn af flutningi laganna í meðförum þessara söngkvenna. 

Leikstjórn er í höndum fyndnasta  leikstjóra landsins  Ágústu Skúladóttur sem er sá leikstjóri á Íslandi sem hefur hlotið flestar Grímur. 

Þórunn María Jónsdóttir sér um búninga og leikmynd hjá okkur í Gaflaraleikhúsinu í fyrsta sinn og Freyr Vilhjálmsson sér um ljósahönnun eins og hann hefur gert í undanförnum sýningum hjá okkur.

Lárus Vilhjálmsson framkvæmdastýrir sýnignunni og Gunnar Helgason hjálpar til með það sem til fellur eins og markaðsmál og smíðavinnu. 

Miðasala er hafin á tix.is og Gaflaraleikhúsinu – midasala@gaflaraleikhusid.is, s: 5659900

Leikárið hjá bæjarleikhúsi Hafnfirðinga Gaflaraleikhúsinu hefst með trukki 10. september með hinni glæsilegu uppistands og tónlistarsýningu Bíddu Bara eftir stjörnurnar Björk Jakobsdóttur, Sölku Sól Eyfeld og Selmu Björnsdóttur. Sýningin sem er sannkölluð hlátursprengja fyrir glaðsinna grindarbotna  fjallar um raunveruleika íslenskra kvenna; um vonir og drauma, biturleika og frú-strasjónir, uppeldi, kvíða og hvítvín. Þær Björk, Salka Sól og Selma  byggja verkið á sinni eigin reynslu og draga ekkert undan en ljúga helling.

Í október hefjast svo æfingar á leikgerð Bjarkar Jakobsdóttur á hinni frábæru bók Bergrúnar Íris Sævarsdóttur Langelstur að eilífu sem fjallar um Eyju sem er 6 ára og er að byrja í 1 bekk og  besta vin hennar og bekkjarfélaga Rögnvald sem er 96 ára. Einstaklega skemmtileg og  falleg saga um vináttu, gleði og sorg. Með hlutverk Rögnvaldar fer Sigurður Sigurjónsson sem er án efa einn af ástsælustu gamanleikurum Íslands og Hafnfirðingur að auki. Í lok september fara síðan fram prufur í Gaflaraleikhúsinu til að finna sex 7-10 ára snillinga til að leika börnin í verkinu. Prufur verða auglýstar beru síðar og skráning fer fram á gaflarar@gaflaraleikhusid.is. Fylgist með. Áætluð frumsýning á verkinu er í byrjun árs 2022.

Í janúar 2022 hefjast síðan æfingar á nýju verki eftir Gunnar Helgason sem heitir Drottningin sem kunni allt nema að… . Þar fær Gunnar í lið með sér snillingana Bernd Ogrodnik og Rán Flygenring til að skapa ógleymanlega veröld fyrir yngstu áhorfendurna. Fyrirhugað er að frumsýna verkið í byrjun mars. 

Gaflaraleikhúsið hefur staðið fyrir öflugu sviðslistar og höfundanámi fyrir ungt fólk um árabil. 

Nú í haust fer Gaflaraleikhúsið inn á nýjar lendur í þeim efnum og mun bjóða upp á undirbúningsnám fyrir ungt sviðslistafólk sem stefnir á framhaldsnám í listum

Kennarar verða Björk Jakobsdóttur  leikkona,höfundurog leikstjóri.. Chantelle Carey danshöfundurog Guðlaug Ólafsdóttir söngkennari. Bæði Guðlaug  og Chantelle hafa unnið með fjölda ungmenna í hinum ýmsu söngleikjum í Borgar-  og Þjóðleikhúsinu.  Björk hefur undanfarin 10 ár sett á svið og samið fjölda verka og söngleikja í höfundasmiðju með ungmennum sem að notið hafa mikilli vinsælda Kennt verður í tveim önnum í vetur og seinni önn lýkur með glæsilegum söngleik sem verður frumsýndur í júní . 

Einungis verður pláss fyrir 24 nemendur. Inntökupróf í skólann fara fram um miðjan september og verða auglýst fljótlega

Covid19 faraldurinn hefur reynst Gaflaraleikhúsinu erfiður eins og öllum öðrum leikhópum og leikhúsum vegna harðra samkomutakmarkana og það var afar sárt að þurfa hætta sýningum á vinsælasta sýningu leikhússins til þessa, Mömmu Klikk. Leikhúsið lenti utan þeirra stuðningsaðgerða sem ríkið veitti atvinnulífinu í landinu vegna þess að það er óhagnaðardrifið en Sviðslistarráð kom til leihúsinu til bjargar með myndarlegum fjárstuðningi til tveggja ára. 

Þetta hleypti nýju lífi í starf leikhússins á þessu ári og í framhaldinu var ákveðið að æfa upp á ensku hina gríðarvinsælu sýningu Fyrsta Skiptið sem sannarlega náði til ungs fólks þegar hún var sýnd 2017-18 og halda í útrás. Sýningin var síðan sýnd undir nafninu My First í Unicorn leikhúsinu í London við frábærar viðtökur og er nú í sýningum á Edinburgh Fringe hátíðinni sem er núna á netinu vegna Covid. Í september er My First boðið að vera opnunarsýningin á Alþjóðlegri leiklistarhátíð Assitej í Kristiansand í Noregi en hún var valin úr hópi 80 alþjóðlegra sýninga.

Gaflaraleikhúsið reynir á meðan húsrúm leyfir að vera í góðu samstarfi við aðra sjálfstætt starfandi leikhópa og nú í september verður sýnd bráðfjörug  brúðusýning um Bakkabræður í leikstjórn Sigurþórs Heimissonar og leik og brúðustjórn Elfars Loga Hannessonar, með fallegri tónlist Björns Thoroddsen sem er flutt af Sigrúnu Hjálmtýsdóttur. Þetta er samstarfsverkefni Gaflaraleikhússins og  Kómedíuleikhússins á Vestfjörðum fyrir börn á öllum aldri.                   

Leikárið hjá Gaflaraleikhúsinu sýnir að leikhúsið ætlar sér að vera áfram í fremstu röð leikhúsa fyrir unga áhorfendur á Íslandi. Þökk sé Hafnarfjarðarbæ og Sviðslistaráði og okkar ástkæru áhorfendum lítum við björtum augum til framtíðar. 

Þjóðleikhúsið mun standa fyrir einstakri leikhúshátíð fyrir unga fólkið í tengslum við frumsýningu á Rómeó og Júlíu í leikstjórn Þorleifs Arnar Arnarssonar á Stóra sviðinu þann 4. september. Ungu fólki á menntaskólaaldri, sem er fætt 2002-2005, verður boðið á fyrstu sýningar verksins. Sigurbjartur Sturla Atlason, einnig þekktur sem tónlistarmaðurinn Sturla Atlas, og Ebba Katrín Finnsdóttir fara með hlutverk elskendanna frægu og tónlistarkonurnar Salka Valsdóttir og Bríet Ísis Elfar sjá um lifandi tónlistarflutning í sýningunni.

Nú styttist í frumsýningu Þjóðleikhússins á frægustu ástarsögu allra tíma, Rómeó og Júlíu. Verkið birtist hér í nýrri þýðingu og með grípandi tónlist, í útfærslu sem hrífur áhorfandann með inn í heillandi og hættulegan heim. Þjóðleikhúsið mun bjóða ungu fólk á menntaskólaaldri á fimm fyrstu sýningarnar. Hér er hægt að tryggja sér miða. Fyrstir koma fyrstir fá.

Auk sýninganna verða viðburðir á Stóra sviðinu og plötusnúðarnir Young Nasareth, Dóra Júlía og Unnur Birna munu sjá um fjörið í forsal fyrir og eftir sýningar.

Rómeó og Júlíu-hátíðin stendur yfir dagana 4. – 10. september og er fyrir gesti sem fæddir eru 2002-2005. Hægt verður að tryggja sér miða á sýningar eftirfarandi daga:
lau 4. sept kl. 18:30

• sun 5. sep.t kl. 18:30
• mið 8. sept. kl. 18:30
• fim 9. sept. kl. 18:30
• fös 10. sept. kl. 18.30

Vinir og vinahópar, geta skráð sig saman, allt að 10 manns í hóp.

Rómeó og Júlía er saga af sannri ást en um leið ástsýki og ungæðishætti. Í forgrunni verður mögnuð barátta ungrar konu gegn yfirþyrmandi feðraveldi. Fegurstu sögurnar geta sprottið upp úr hræðilegustu aðstæðunum. Þorleifur Örn Arnarsson er einn fremsti leikstjóri Evrópu og einn listrænna stjórnenda hins virta leikhúss Volksbühne. Hann á að baki geysivinsælar sýningar á Íslandi á borð við Engla alheimsins og Njálu. Nú hefur hann gengið til liðs við nýtt listrænt teymi Þjóðleikhússins þar sem hann mun starfa á næstu árum.

Dagskrá alla þessa daga verður með svipuðum hætti:

• Húsið opnar kl. 18.30 með plötusnúðum
• Viðburður hefst á sviðinu kl. 19
• Leiksýningin hefst kl. 20

Plötusnúðar spila áfram eftir sýningu

Sjálfsævi­sögu­legi heim­ilda­söng­leik­ur­inn Góðan dag­inn faggi verður frum­sýnd­ur í ný­upp­gerðum Þjóðleik­hús­kjall­ara föstu­dag­inn 13. ág­úst kl. 21.00. Sýn­ing­in er sam­starfs­verk­efni Þjóðleik­húss­ins og leik­hóps­ins Sterta­bendu og eru höf­und­ar og aðstand­end­ur verks­ins Bjarni Snæ­björns­son leik­ari, Gréta Krist­ín Ómars­dótt­ir leik­stjóri og Axel Ingi Árna­son tón­skáld.

Góðan dag­inn faggi er ein­leik­ur þar sem fer­tug­ur söng­leikja­hommi leit­ar skýringa á skyndi­legu tauga­áfalli sem hann fékk upp úr þurru einn blíðviðris­dag. Eft­ir vanda­sam­an leiðang­ur um innra líf sitt, fortíð og sam­tíma rekst hann á ræt­inn homma­hat­ara á óvænt­um stað.

Sýning­in er ber­skjald­andi leiðang­ur um skömm og mennsku og ein­lægt sam­tal við draum­inn um að til­heyra. Sýning­in er unn­in upp úr dag­bók­um Bjarna Snæ­björns­son­ar sem hann hef­ur haldið frá æsku til dags­ins í dag. Sýning­in skart­ar glænýrri ís­lenskri söng­leikja­tónlist eft­ir Axel Inga Árna­son og verður tit­il­lag sýning­ar­inn­ar gefið út á næstu dög­um.

18 ára menntaskólastrákur er staddur á Laugaveginum í leit að töffaralegum fötum. Síminn hringir, þetta er sæta stelpan sem var að vinna á Prinsinum í sumar. „Ég er ólétt. Þú ert að verða pabbi.“ Andstæðar tilfinningar sækja að honum næstu mánuði. Ótti, afneitun, sjálfsvorkunn, kvíði, vonleysi, þunglyndi. Og svo byrjar hann að verða spenntur. Sátt, friður, bjartsýni, ábyrgðarkennd og tilhlökkun taka við. Ungi maðurinn ákveður með sjálfum sér að verða heimsins besti pabbi. En þá kemur skyndilega í ljós að hann er ekki sá eini sem kemur til greina sem faðir barnsins.

Tuttugu árum síðar, þegar ungi maðurinn er orðinn leikari og rekur lítið leikhús á landsbyggðinni, sest hann niður með leikstjóra og þau skoða þetta mál saman. Þau taka viðtöl við fólkið sem kemur við sögu. Ýmislegt óvænt kemur í ljós. Er maður áreiðanlegt vitni í sinni eigin sögu? Er hægt að muna hlutina rétt?

Sýningin verður frumsýnd í Frystiklefanum á Rifi og víðar um landið og að endingu í Þjóðleikhússinu. Leikferðin er liður í auknu samstarfi Þjóðleikhússins við leikhús á landsbyggðinni. Prinsinn verður áleitið og skemmtilegt verk um föðurhlutverkið – og móðurhlutverkið!

Verkefnið er styrkt af mennta- og menningarmálaráðuneytinu – Leiklistarráði