Undanfarnar vikur hefur staðið yfir uppsetning og æfingar á gamanleikritinu Beint í æð! eftir Ray Cooney í þýðingu Gísla Rúnars Jónssonar heitins. Verkið er hvorki meira né minna bráðfyndið og drephlægilegt, eða “bráðdrepandi og hlægilega fyndið” eins og leikstjórinn, Gunnar Björn Gunnarsson, mismælti sig svo skemmtilega á einni æfingunni.

Á sviðinu verða bæði þrautreyndir og glænýjir leikfélagar, og úrvalsfólk á bakvið tjöldin. 11 leikarar eru á sviði en í heildina koma að 40 manns að uppsetningunni í ár. “Við vildum endilega hefja leikárið með hlátri og gleði, það veitir ekki af eftir síðustu misseri” segir Guðný Lára Gunnarsdóttir, formaður leikfélagsins.

Sýnt verður flesta þriðjudaga, fimmtudaga og föstudaga klukkan 20:00 og sunnudaga klukkan 18:00

Næstu sýningar:
Frumsýning föstudagur 29. okt – UPPSELT
2. sýning sunnudagur 31. okt klukkan 18:00
3. sýning þriðjudagur 2. nóv klukkan 20:00
4. sýning fimmtudagur 4. nóv klukkan 20:00
5. sýning sunnudagur 7. nóv klukkan 18:00

Einnig má senda póst á midasala@leikfelagselfoss.is eða hringja í síma 4822787 eftir klukkan 18 á daginn
Almennt verð 2500 kr
Hóptilboð 10+ 2000 kr
Salurinn (80 sæti) 120 þúsund

Heiðbrá hafði gefið upp alla von þar til hún hitti ástina sína hinum megin á hnettinum sem kynnti hana fyrir mætti „cacao“. Síðan þá hefur parið staðið í stórræðum og planar hvern viðburð á fætur öðrum. Framtíðin hefur aldrei verið bjartari. Konserta frumsýnir djarft, nýtt sviðsverk með aðferða- og fagurfræði snjallsímans að leiðarljósi.

Sérstakar þakkir fá: Hákon Jóhannesson, Ragnar Kjartansson, Margrét Bjarnadóttir, Katrín Gunnarsdóttir, Tómas Sturluson, Svanhildur Gréta Kristjánsdóttir, Sóley Lee Tómasdóttir, Ester Rún Mondragon, Sigurbjartur Sturla Atlason, Hjalti Rúnar Jónsson, Dansverkstæðið, starfsfólk og stjórn Þjóðleikhússins.

Leikhópurinn Konserta var stofnaður árið 2019 og notast við handahófs- og óreiðukenndar vinnuaðferðir við sköpun sviðsverka sem leka eins og ísmolar niður á bak áhorfenda. Eina regla Konserta er að það er allt í lagi að vera smá slappur.

Sundurlimuð lík, smygl og ólöglegir innflytjendur var ekki beint það sem Tom og Linda sáu fyrir sér daginn sem konan frá ættleiðingarstofunni ætlaði að koma til að taka út aðstæður á heimilinu. Dick og Harry, hinir vitgrönnu bræður Tom, sjá hinsvegar til þess að allt fer úrskeiðis sem mögulega getur gert það.

Leikfélag Fljótsdalshéraðs frumsýnir vandræðafarsann Tom, Dick og Harry í leikstjórn Ármanns Guðmundssonar að Iðavöllum 23. október. Verkið er eftir þá feðga Ray og Michael Cooney en Cooney eldri hefur verið ókrýndur konungur farsans um margra ára skeið. Níu leikarar taka þátt í sýningunni en mest mæðir á Víði Má Péturssyni í hlutverki hins ólámsama og sífellt taugaveiklaðri Tom.

Miðasala er á midasala.lf@gmail.com,  eða í síma 862-3465.
 Athugið að miðar eru ekki seldir á staðnum.
Miðaverð 3000 og 2500 fyrir öryrkja og eldri borgara.
Frumsýnt er á Iðavöllum laugardaginn 23. október klukkan 20:00.

Næstu sýningar:
2.sýning, 24.október kl. 20:00
3.sýning, 27.október kl. 20:00

Vorið 2019 hélt Freyvangsleikhúsið handritasamkeppni og bárust nokkur handrit í samkepnnina, send til félagsins undir dulnefnum höfunda. Tekin var ákvörðun um að setja á svið verkið Smán og á daginn kom að verkið var eftir Sigríði Láru Sigurjónsdóttur. Fyrirhugað var að setja upp verkið haustið 2020 en ástandið í samfèlaginu gerði það að verkum að ákvðið var að fresta uppsetningu til hausts 2021. Sindri Swan var fenginn til að leikstýra og æfingar hófust í haust.

Sindri leikstjóri og höfundurinn, Sigríður Lára hafa síðan unnið saman að því að stílesera og útfæra verkið svo útkoman verði sem glæsilegust. Að verkinu kemur svo stór hópur af fólki til þess að gera þetta allt að raunveruleika því að sjálfsögðu þarf leikarahóp, hönnuði, smiði, tæknifólk og alla aðra sem gera frábæra sýningu.

Smán er leikverk sem fjallar um 6 ólíka einstaklinga, sem við fáum að fylgjast með yfir langa helgi, þar sem líf þeirra flèttast saman á kaffihúsi/bar. Einnig eru nokkrar aukapersónur sem gæða staðinn lífi, hver á sinn hátt.
Alheimsfrumsýning á Smán er 22.október, nánari upplýsingar eru að finna á freyvangur.is sem og á feisbúkksíðu Freyvangsleikhússins.

Ein skemmtilegasta ópera tónlistarsögunnar

Nemorino trúir ekki því sem hann les í bókum. Hann trúir hinsvegar því sem honum er sagt að standi í bókum. Hann kann nefnilega ekki að lesa. Adina er vön að fá athygli frá karlmönnum. Hvað gerir hún þegar einhver hættir að sýna henni athygli? Belcore vantar konu. Belcore vantar alltaf konu. Það væri fullkomin fjöður í hattinn fyrir svona flottan offisér. Dulcamara er búinn að flytja sömu söluræðuna mörghundruð sinnum. Hann veit alveg að „töfralyfin“ hans virka ekki. En hvað ef þau gera það?

Sviðslistahópurinn Óður
Sviðslistahópurinn Óður neitar að geyma óperur í glerkössum. Þau vilja miklu frekar taka þær upp, hrista af þeim rykið og leika sér að þeim, pota í óskrifaðar reglur og skemmta sér og öðrum. Þau trúa á nálægð við áhorfendur og einlæga túlkun á tungumáli sem áhorfendur skilja.

Leikfélagið Hugleikur stendur fyrir námskeiði í brelluförðun (special effects) 16. og 17. október. Leiðbeinandi er Ninna Karla Katrínardóttir. Þátttakendur læra að nota latex og vax við sáragerð og aðrar leikhúsbrellur. Þeir læra um bestu aðferðir og val á réttum litum fyrir marbletti, sár, hrukkur og fleira. Vilji þátttakendur fræðast um fleiri atriði í leikhúsförðun gefst færi á umræðum og mögulega sýnikennslu tengt þeim.
Ninna Karla Katrínardóttir hefur mikla reynslu af leikhúsförðun og er með diplómu í listförðunarfræði frá MASK, Makeup&Airbrush Academy.

Skipulag námskeiðs verður eftirfarandi:-
Laugardagur kl. 11-15 – Farið verður í hvernig latex og vax eru notuð. Ninna verður með sýnikennslu en einnig fá þátttakendur að prófa aðferðirnar hvert á öðru eða á sjálfum sér. Ef tími gefst geta þátttakendur hafið undirbúning að verkefni seinni dagsins.

Sunnudagur kl. 11-15 – Þátttakendur hafa með sér módel og búa til karakter. Módelið má vera af hvaða kyni sem er og á hvaða aldri sem er en gott er að hafa í huga að módelið henti vel í fyrirhugað verkefni. Útfærsla verkefnisins er valfrjáls, velja má karakter úr leikriti eða kvikmynd eða búa til sinn eigin karakter. Þátttakendur vinna „heildarlúkk“, þ.e. förðun og búning, en nýta það sem þer lærðu daginn áður og sýna það í lúkkinu. Ninna verður þeim að sjálfsögðu innan handar og deginum lýkur á myndatöku. Gott er að hafa í huga námskeiðið gæti dregist á langinn þann dag.

Laus eru 8 sæti á námskeiðinu og kostar það 8.000 kr. fyrir félaga í Hugleik sem greitt hafa félagsgjöld yfirstandandi leikárs, en 12.000 kr fyrir aðra. Innifalið í námskeiðsgjaldi er aðgangur að öllum efnum og áhöldum sem nota þarf í leikhúsförðun og nóg af kaffi. Námskeiðið fer fram í húsnæði leikfélagsins Hugleiks að Langholtsvegi 109-111 (gengið inn baka til).

Bergur Ebbi á að baki langan feril sem rithöfundur, uppistandari og fyrirlesari og Snorri Helgason sem starfað hefur sem tónlistarmaður í hálfan annan áratug og á að baki fjölmargar sólóplötur og leikhúsverkefni.

Saman hafa þeir gefið út hlaðvarpið Fílalag frá árinu 2014 og eru þættirnir orðnir á þriðja hundrað talsins og uppsöfnuð hlustun um milljón spilanir. Nú gefst áhorfendum færi á að sjá þessa tvo skemmtilegu listamenn fíla lag á sviði. Fílalag fjallar um tónlist – hver sýning gengur út að kryfja eitt dægurlag til mergjar – en leiðin að kjarna tónlistarinnar liggur í gegnum alla dægurmenninguna og dýpri þætti tilverunnar. Leikhúsgestir eiga von á ferðalagi með reyndum sviðslistamönnum og er hver sýning einstök, enda nýtt lag tekið fyrir í hvert sinn.

Verkið gerist á aðventunni og jólasveinarnir eru farnir að tínast til byggða og gefa börnum í skóinn. En eina nóttina hverfur Ljónsi, uppáhalds mjúkdýrið hennar Láru sem, eins og flestir vita, er enginn venjulegur bangsi. Hvað getur hafa orðið af Ljónsa? Getur verið að hvarf hans tengist jólasveinunum á einhvern hátt?

Bækur Birgittu Haukdal um Láru og Ljónsa njóta ómældra vinsælda hjá íslenskum börnum, og nú birtast þessar ástsælu persónur í fyrsta sinn á leiksviði. Leikverkið hentar vel yngstu áhorfendunum og er tilvalin skemmtun í aðdraganda jólanna. Birgitta Haukdal hefur samið ný lög fyrir leiksýninguna.

Fyrstu Láru-bækurnar komu út árið 2015, Lára lærir að hjóla og Lára fer í flugvél, og slógu eftirminnilega í gegn. Síðan þá hafa komið tvær nýjar sögubækur um þau Láru og Ljónsa á hverju ári, auk bendibókanna Lára og Ljónsi sem henta allra minnstu lesendunum. Krakkar eiga að geta samsamað sig við Láru, vini hennar og fjölskyldu. Enginn er fullkominn og Lára getur sannarlega verið óþekk eða gert ýmis mistök. Í Lárubókunum er gjarnan að finna sögur úr raunveruleikanum, eitthvað sem þeim fullorðnu finnst hversdagslegt en börnum finnst vera stórkostlegt ævintýri.

Alþjóðlega brúðulistahátíðin Hvammstangi International Puppetry Festival – HIP Fest – fer fram í annað sinn dagana 8-10. október 2021. Á hátíðina koma á þriðja tug erlendra listamanna frá 8 löndum sem bjóða upp á fjölda sýninga og vinnusmiðja, auk fyrirlestra og kvikmyndasýninga með umræðum við listamennina á eftir, á meðan á hátíðinni stendur.

HIP Fest er einstök viðbót í menningarlíf landsmanna, enda eina brúðulistahátíð landsins. HIP Fest var valinn menningarviðburður ársins á Norðurlandi vestra árið 2020 og skipuleggjandi hátíðarinnar, Handbendi – Brúðuleikhús, er núverandi Eyrarrósarhafi, en Eyrarrósin eru verðlaun sem veitt eru framúrskarandi menningarverkefni á landsbyggðinni.

Þrátt fyrir verulegar samkomutakmarkanir á hátíðinni í fyrra tókst hún einstaklega vel við mikla ánægju þátttakenda og áhorfenda. 

Brúðulistin er fjölbreytt og fornt listform sem stöðugt haslar sér meiri völl í menningarlífi landsins. Á hátíðinni má líta fjölbreyttar sýningar fyrir alla aldurshópa, sem nýta sér öll blæbrigði listformsins.

Miðasala fer fram á tix og dagskrá hátíðarinnar má gaumgæfa á heimasíðu hennar, thehipfest.com.

Leikhópurinn Miðnætti er barnafjölskyldum að góðu kunnur enda hefur hann á síðustu árum sett upp fjölmargar metnaðarfullar og stórskemmtilegar sýningar fyrir börn á öllum aldri. Hér má t.d. nefna Geim-mér-ei, Á eigin fótum og sýningar og sjónvarpsþætti um álfana dásamlegu Þorra og Þuru. Nú er Miðnætti mætt í Borgarleikhúsið með undurfallega sýningu fyrir allra yngstu leikhúsgestina.

Tjaldið er upplifunarleikhús fyrir börn frá þriggja mánaða til þriggja ára – sem og foreldra þeirra og forráðamenn. Hér verður boðið upp á litla veislu fyrir skynfærin þar sem börnin fá að skyggnast undir leikhústjaldið og upplifa tóna, liti og snertingu sem bæði örvar, þroskar og gleður andann. Athugið að ekki er stuðst við móðurmál í sýningunni svo hún er ætluð öllum börnum óháð tungumáli. Eftir sýningu verður í boði að setjast fram í forsal leikhússins og njóta veitinga og notalegrar stundar með börnunum.

Í samstarfi við leikhópinn Miðnætti. Verkefnið er styrkt af mennta- og menningarmálaráðuneyti — Sviðslistaráði.