Söngleikurinn Matilda verður sýndur í Félagsheimili Bolungarvíkur í lok nóvember. Það er Halldóra Jónasdóttir sem stendur að sýningunni en hún bæði leikstýrir verkinu og hefur þýtt leiktextann og alla söngtextana. Agnes Eva 11 ára og Friðmey Hekla 9 ára deila aðalhlutverkinu en hvor þeirra sýnir tvær sýningar. Auk þeirra leika 25 krakkar frá Vestfjörðum, á aldrinum 8 – 15 ára. Stundum þarf bara lítinn snilling til að gera kraftaverk.

Sýningin er stútfull af gleði, drama, tónlist og sprelli en hún fjallar um lítinn snilling að nafni Matilda, hún er ekki metin að verðleikum heima hjá sér og í skólanum þarf hún að horfa upp á mikið óréttlæti. Matilda reynir að berjast gegn öllu óréttlætinu og segir að stundum sé í lagi að gera það sem er bannað.

Höfundur sögunnar er Roald Dahl en Dennis Kelly samdi söngleikinn með tónlist Tim Minchen.

Miðaverð er 1.000 krónur

Fjórar sýningar verða á söngleiknum en verkið nýtir stóran hluta salarins í félagsheimilinu og því eru sýningarnar fjórar.

• 25. nóvember kl. 13 og kl. 16.
• 26. nóvember kl. 13 og kl. 16.

Aðalfundur Leikfélags Reykjavíkur, rekstraraðila Borgarleikhússins, var haldinn 30. október 2017. Í ársreikningi fyrir leikárið 2016-2017 kemur fram að heildarvelta félagsins jókst úr 1.454 mkr. í 1.659 mkr. eða um 14%.  Á sama tíma varð 7% hækkun á rekstrargjöldum þess.

Fimmtudaginn 26. október var frumsýnt á Litla sviði Borgarleikhússins leikritið Natan sem er unnið í samstarfi við leikhópinn Aldrei óstelandi. Í verkinu er fjallað um morðið á Natani Ketilssyni og Pétri Jónsyni á Illugastöðum í Húnavatnssýslu í mars árið 1828. Málið er eitt þekktasta og umtalaðasta sakamál  Íslandssögunnar og leiddi til síðustu aftökunnar hér á landi.

Þau Agnes Magnúsdóttir vinnukona og Friðrik Sigurðsson bóndasonur voru hálshöggvin á Þrístöpum 12. janúar 1830, en bústýran Sigríður Guðmundsdóttir var send til fangelsisvistar í Kaupmannahöfn fyrir aðild sína að málinu og lést þar. Atburðir þessir tóku snemma á sig goðsagnakenndan blæ og sögusagnir fóru á kreik um ástir og afbrýði þeirra sem hlut áttu að máli og hefur saga þeirra verið endalaus uppspretta skáldsagna, leikrita, kvikmynda og fræðigreina.

Leikhópurinn Aldrei óstelandi leggur hér út í rannsókn á tildrögum morðsins og leitar meðal annars fanga í dómsskjölum og þeim fjölmörgu fræðigreinum, bókum, kvikmyndum og sjónvarpsefni sem komið hafa út um þetta efni. Hvað varð til þess að þessar venjulegu manneskjur frömdu svo hryllilegan glæp? Er nokkurn tíma hægt að komast að sannleikanum í svo gömlu sakamáli?

Marta Nordal leikstýrir verkinu og Salka Guðmundsdóttir aðstoðaði við skrif á handriti. Axel Hallkell Jóhannesson sér um leikmynd, Helga I. Stefánsdóttir sér um búninga, Kippi Kanínus um tónlist og Sigurlaug Sara Gunnarsdóttir er aðstoðarleikstjóri.

Leikarar í verkinu eru þau Birna Rún Eiríksdóttir, Edda Björg Eyjólfsdóttir, Kjartan Darri Kristjánsson og Stefán Hallur Stefánsson.

Stúfur snýr aftur í Samkomuhúsið í desember

Um síðustu jól sýndi Stúfur jólasýningu sína Stúfur við frábærar viðtökur í Samkomuhúsinu  og snýr nú aftur með nýja leiksýningu Stúfur snýr aftur  sem frumsýnd verður þann fyrsta desember. Hann hefur notað tímann vel eftir síðustu jólavertíð og meðal annars æft sig að spila á hljóðfæri, stundað þrotlausa líkamsrækt og smurt raddböndin. „Ég er ljúfur, hrjúfur, spriklandi og sprellfjörugur“  segir Stúfur og bætir við: „Ég elska leikhúsið því það er svona staður sem barasta allt getur gerst!“  Í Stúfur snýr aftur sýnir og sannar jólasveinninn Stúfur enn og aftur að hann er enginn venjulegur jólasveinn. Hann er himinlifandi yfir að hafa verið boðið aftur í Samkomuhúsið og er núna í óða önn að æfa lagið sitt “Jólalagstúfur” og gera tilraunir með að baka hinn fullkomna kanelsnúð, en Stúfur ætlar að gefa öllum sem koma á sýninguna „kanilstúf”.  „Mér þykir gaman að baka og það finnst mér vera róandi þegar maður er jólaórói en það er líka gott að syngja og ég er búin að semja nýtt lag fyrir sýninguna“. Stúfur snýr aftur  er jólaleg jólasýning fyrir rollinga, gamlingja og allt þar á milli, samt mest fyrir snillinga.  Norðurorka er bakhjarl sýningarinnar og gerir Leikfélagi Akureyrar og Stúf kleift að sviðsetja þessa bráðhressandi sýningu. Stúfur snýr aftur er einn af mörgum viðburðum í metnaðarfullri dagskrá Menningarfélags Akureyrar  fyrir ungt fólk og börn.

Stúfur snýr aftur er samstarfsverkefni Stúfs og Leikfélagsins og er 324 verkefni Leikfélags Akureyrar. Leikstjórn, meðhöfundar og sérstakir uppalendur Stúfs: Margrét Sverrisdóttir og Oddur Bjarni Þorkelsson

Um Leikfélag Akureyrar

Leikfélag Akureyrar varð hundrað ára þann 19. apríl síðastliðinn og er því sprellfjörugur öldungur. Saga félagsins er algerlega samofin sögu þess samfélags sem það sprettur úr, fyrst sem áhugaleikhús og svo sem atvinnuleikhús. Leiksýningar félagsins hafa orðið l fyrir áhorfendur heima og handan heiða. Auk þess hefur félagið gert strandhögg með sínar leiksýningar í höfuðborginni við frábæran orðstír.

Algert eftirlit er markmiðið í eftirlitssamfélagi Orwells í skáldsögunni 1984. Winston er starfsmaður Sannleiksráðs en hann sér um að breyta upplýsingum og staðreyndum í blöðum og kennslubókum eftir skipunum Flokksins. Svonefndum hliðstæðum staðreyndum eða öllu heldur skaðreyndum er óspart plantað til að draga úr gagnrýni og sjálfstæðri hugsun almennings. Winston skrifar leynilega dagbók sem einskonar heimild fyrir framtíðina. Skilaboð til komandi kynslóða og uppreisnaráskorun. Eða bara huglæg lýsing á heimi þar sem stríð er friður, þrældómur er frelsi og fáfræði er styrkur.

Í magnaðri leikgerð skáldsögunnar eru áhorfendur dregnir inn í þetta framtíðarsamfélag. Ágengum spurningum er varpað fram: Hvernig vitum við að veröld okkar er raunveruleg? Hvað er sannleikur og hvað sannlíki í yfirþyrmandi eftirlitssamfélagi nútímans þar sem hvert okkar spor er rakið af stórfyrirtækjum á netinu, með símtækjum, öryggismyndavélum og rafrænum skilríkjum?  Hver er staða einstaklingsins í þessum ósköpum og yfirgangi og hvernig getur hann varðveitt sjálfan sig?

George Orwell samdi þessa dystópíu í skugga síðari heimsstyrjaldarinnar. Hún er fyrir löngu orðin hluti af sígildum bókmenntum og án efa ein merkasta saga síðari tíma.

Úr gagnrýni um sýninguna:

Borgarleikhúsið byrjar leikhúsveturinn af miklum samfélagslegum metnaði.
MK. Víðsjá.

Leikhópurinn stendur sig með mikilli prýði og samleikurinn er góður.
SBH. Morgunblaðið ★ ★ ★ ★

Valur Freyr Einarsson gerir sér lítið fyrir og stelur sýningunni .
SJ. Fréttablaðið ★ ★ ★ 

Ísköld nálgun hans (Vals) var hárrétt, æsingarlausar pyntingar, unnar eins og hversdagslegt eldhúsverk, engin gleði, engin ást, aðeins nautnin að viðhalda valdinu.
BL. DV.

Þessi valdsmaður, þessi ofbeldismaður sem að felur alla sína grimmd á bakvið mjög fágað og kurteist yfirbragð og einhvern veginn nær Valur Freyr að skila þessu á snilldarlegan hátt.
HA. Kastljós.

Traustvekjandi gestgjafi leikinn af  Jóhanni Sigurðarsyni leiðir áhorfendur inní sýninguna og gerir martröð Winstons að þátíð.
MK. Víðsjá.

Hannesi Óla Ágústssyni og nýliðanum Haraldi Ara Stefánssyni tekst báðum að skapa heilsteyptar persónur byggðar á örfáum atriðum.
SJ. Fréttablaðið ★ ★ ★ 

Leikmynd Sigríðar Sunnu Reynisdóttur er snjöll í einfaldleika sínum.
SBH. Morgunblaðið ★ ★ ★ ★

Leikmyndin hjá Sigríði Sunnu Reynisdóttur og náttúrlega hljóðmyndin hjá Garðari Borgþórssyni eru svo stórir þættir í þessari leiksýningu og hljóðmyndin er bara eins og hluti af leikmyndinni og hljóðskúlptúr sem hjálpar til við að skapa þessa hryllingstilfinningu.
HA. Kastljós.

Myndbönd Inga Bekk og lýsing Björns Bergsteins Guðmundsson njóta sín í myndinni og verða  áhrifamiklir þættir í leiknum.
MK. Víðsjá.

Uppfærsla Borgarleikhússins á 1984 er áhrifamikið innleg inn í samtímann. Umfjöllunarefnið er drungalegt, en myndirnar sem dregnar eru upp lifa lengi með áhorfendum.
SBH. Morgunblaðið ★ ★ ★ ★

Föstudagskvöldið 20. október var sýningin Guð blessi Ísland frumsýnd á Stóra sviði Borgarleikhússins, en þetta var fyrsta frumsýning leikársins á því sviði. Leikritið er eftir þá Mikael Torfason og Þorleif Örn Arnarsson, en sá síðarnefndi er einnig leikstjóri sýningarinnar. Þeir félagar sameina krafta sína á ný í þessu verki eftir einstaklega vel heppnaða sviðsetningu á Njálu í Borgarleikhúsinu fyrir tveimur árum. Þar var tilurð sjálfsmyndar Íslendinga rannsökuð. Nú mun greining á íslenskri þjóðarsál halda áfram. Eins og í Njálu verður öllu tjaldað til: Tónlist, dans, myndlist, leikur og sprell.

Sýningin þóttist takast einkar vel og voru viðbrögð áhorfenda í salnum mikil, bæði á meðan á sýningu stóð og ekki síst eftir sýninguna þegar leikurum og listrænum stjórnendum var fagnað lengi vel með standandi lófataki.

Leikarar í sýningunni eru Aðalheiður Halldórsdóttir, Arnmundur Ernst Björnsson, Brynhildur Guðjónsdóttir, Halldóra Geirharðsdóttir, Halldór Gylfason, Hilmar Guðjónsson, Hjörtur Jóhann Jónsson, Kristín Þóra Haraldsdóttir, Maríanna Clara Lúthersdóttir og Örn Árnason.

Á Íslandi ríkir borgarastyrjöld. Búsáhaldabyltingin er hafin. Uppreisnarfólk stendur fyrir framan Alþingi og lemur potta og pönnur. Sigurinn er vís – vanhæf ríkisstjórn fellur. Í miðjum átökunum á Austurvelli samþykkir Alþingi að hrinda af stað rannsókn um orsakir hrunsins. Skýrsla kemur út í apríl 2010. Hún er yfirgripsmikil – en um fram allt æsispennandi, líkust reyfara sem varla er hægt að leggja frá sér. Þar er flett ofan af vafasömum viðskiptum ofurhetja íslenska bankakerfisins og ótrúlegum samskiptum æðstu embættismanna þjóðarinnar lýst. Lygileg samtöl lifna við – ólíkindaleg samskipti eiga sér stað. Þetta var partý aldarinnar. Þetta var siðlausasta skeið í sögu þjóðarinnar. Þetta var eitt mesta hneyksli í fjármálasögu Evrópu fyrr og síðar!

Áhorfendum er boðið í partý aldarinnar þar sem öllu verður tjaldað til og engum hlíft í ofsafenginni leit að sannleikanum – eða hvað? Af hverju fór allt til fjandans? Hvernig getur siðferði fólks brostið á þennan hátt? Hvernig er hægt að ræna heila þjóð öllu sem hún á? Og hvar stöndum við nú? Búum við í hinu nýja landi sem vonir stóðu til eftir hrunið? Hefur eitthvað breyst?

Sýningin er ekki ætluð börnum yngri en 16 ára.

Föstudaginn 29. október kl. 15:00 frumsýnir Gára Hengó í samstarfi við Tjarnarbíó nýtt og ævintýralegt verk ætlað börnum á grunnskólaaldri.

Hafrún er ákveðin stelpa með mikið hrokkið hár. Hún elskar að ráða í drauma, lesa á hvolfi og fylgjast með tunglinu en í nótt getur hún ekki sofið. Hún saknar ömmu sinnar sárt sem er nýfarin á fund stjarnanna. Skyndilega flýgur hvítur hrafn inn í herbergið á ógnarhraða. Hafrún nefnir hann Íó. Saman leggja þau af stað í stórfenglegt ævintýri. Þau fljúga útum glugga í átt að tungli, ganga um sofandi sand sem lifnar við, lenda í táraflóði og ferðast neðansjávar í leit að ömmu.

Íó er ljóðræn sýning um sorgarferli. Sýningin er sjónræn sviðsetning á innra ferðalagi barns. Á ferðalaginu takast Hafrún og Íó á við mögnuð öfl sem búa innra með okkur og eru jafn ómissandi og tunglið sem lýsir okkur nóttina. Íó er þroskasaga um hugrekki, vináttu, missi og leit að jafnvægi milli ljóss og myrkurs.

Höfundur og listrænn stjórnandi: Ragnheiður Harpa Leifsdóttir
Leikstjóri: Aude Busson
Leikmynda-, búninga- og brúðuhönnun: Sigríður Sunna Reynisdóttir
Brúðugerð og brúðuleikari: Aldís Davíðsdóttir
Leikkona: Gríma Kristjánsdóttir
Tónlist: Ásta Fanney Sigurðardóttir
Ljósahönnun: Arnar Ingvarsson
Textílhönnun og búningagerð: Tanja Huld Levý Guðmundsdóttir
Framkvæmdastjóri: Anna Rut Bjarnadóttir
Plakat og myndband: Una Lorenzen

Listakona og sambýlismaður hennar þiggja hádegisverðarboð íslensku sendiherrahjónanna í Washington. Útverðir lands og þjóðar bjóða upp á þríréttað úr íslensku hráefni, borið fram af ungri, kínverskri húshjálp. Smám saman kemur í ljós að undir glæsilegu yfirborðinu leynast óþægileg leyndarmál. Í gestahúsi við sendiráðsbústaðinn er sonur hjónanna falinn eins og fjölskylduskömm. Þegar hann gerir sig heimakominn í boðinu fara beinagrindurnar að hrynja úr skápnum ein af annarri.

Risaeðlurnar, lokahluti leikhúsþríleiks Ragnars Bragasonar um afkima íslensks samfélags, er nístandi gamanleikur þar sem fortíð, nútíð og framtíð þjóðar mætast.

Fyrri leiksýningar höfundar, Gullregn og Óskasteinar, slógu í gegn á sínum tíma og hlutu báðar fjölda tilnefninga til Grímunnar og Grímuverðlaun.

Persónur og leikarar:

Frú Ágústa: Edda Björgvinsdóttir

Elliði: Pálmi Gestsson

Sveinn Elliði: Guðjón Davíð Karlsson

Bríet Ísold: Birgitta Birgisdóttir

Albert: Hallgrímur Ólafsson

Li Na: María Thelma Smáradóttir

Lady: Frímann