Old Bessastaðir er nýtt leikverk eftir Sölku Guðmundsdóttur í uppfærslu Sokkabandsins sem frumsýnt verður í Tjarnarbíói í febrúar 2016.
Gildi eitt: Við tortryggjum ekki gildin.
Gildi tvö: Þær sem ekki virða gildin eru ógn við gildin.
Gildi þrjú: Við þrýstum þumlunum þéttingsfast inn í augntóttirnar á þeim sem ekki virða gildin.
…það er blóð á skónum þínum.
Þrjár konur koma saman til að framkvæma, til að skilgreina sín sameiginlegu grunngildi, til að borða brauð með spægipylsu, til að finna tilganginn, sem fjærst öllum útveggjum. Þær ætla að verða fyrri til. Þær ætla ekki að láta sparka sér niður stigaganginn. Þær eru ekki vont fólk.
Leikstjóri er Marta Nordal.
Leikmyndahönnun: Finnur Arnar Arnarsson.
Búningahönnun: Helga Stefánsdóttir.
Tónlist: Högni Egilsson.
Ljósahönnun: Arnar Ingvarsson.
Leikendur eru Arndís Hrönn Egilsdóttir, Elma Lísa Gunnarsdóttir og María Heba Þorkelsdóttir.
Hin árlega innanfélagsskemmtun Leikfélags Kópavogs, Stjörnuljósakvöld verður haldin laugardaginn 9. janúar. Vanalega hefur skemmtunin verið haldið fyrstu helgi á nýju ári en ástæða þótti til að gefa fólki tækifæri til að jafna sig betur eftir áramótin að þessu sinni. Dagskráin verður fjölbreytt samkvæmt venju, sýndir verða leikþættir og eitthvað verður einnig af tónlistaratriðum. Að lokinni formlegri dagskrá blanda félagsmenn geði og stilla saman strengi fyrir komandi ár. Húsið opnar kl. 19.31 og formleg dagskrá hefst kl. 20.29. Aðgangur er ókeypis en félagsmenn þurfa að panta miða í midasala@kopleik.is. Nánar verður sagt frá dagskránni í næstu viku þegar 2016 er gengið í garð.
Leikfélag Kópavogs þakkar fyrir árið sem er að líða og og óskar félagsmönnum, vinum og velunnurum velfarnaðar á nýju ári og þakkar fyrir gamalt og gott.
DON GIOVANNI eftir Wolfgang Amadeus Mozart – FRUMSÝND 27.febrúar 2016
Mozart samdi óperuna Don Giovanni á u.þ.b. mánuði en hún var frumsýnd í Prag árið 1787 og hlaut afar góðar viðtökur.Tónlistin í óperunni er falleg og ríkuleg og er þessi ópera af mörgum talin bera af í fegurð tónmáls. Söguþráðurinn hverfist um hinn glæsilega flagara Don Giovanni sem leggur land undir fót, heillar og tælir konur um gjörvalla Evrópu en með honum í för er þjónn hans Leporello. Ógæfan dynur yfir þegar Don Giovanni fremur voðaverk og má segja að þá leysist ill öfl úr læðingi og glíman við samviskuna hefjist fyrir alvöru.
Óperan er í tveimur þáttum og tekur 3 klukkustundir í flutningi með hléi.
Hlutverkaskipan:
Don Giovanni – Oddur Arnþór Jónsson
Leporello – Tomislav Lavoie
Donna Anna – Hallveig Rúnarsdóttir
Don Ottavio – Elmar Gilbertsson
Commendatore – Jóhann Smári Sævarsson
Donna Elvira – Hanna Dóra Sturludóttir
Zerlina – Þóra Einarsdóttir
Masetto – Ágúst Ólafsson
Kór og hljómsveit Íslensku óperunnar.
Listrænir stjórnendur:
Benjamin Levy – hljómsveitarstjóri
Kolbrún Halldórsdóttir – leikstjóri
Snorri Freyr Hilmarsson – höfundur leikmyndar
María Ólafsdóttir – höfundur búninga
Björn Bergsteinn Guðmundsson – ljósahönnuður
Sýningardagar:
Laugardagur 27.febrúar
Laugardagur 5.mars
Föstudagur 11.mars
Sunnudagur 13.mars
Töfrar, áhætta, grín og glens!
Íslenski dansflokkurinn frumsýnir nýtt íslenskt barnaverk sem hvorki börn né fullorðnir mega missa af. Óvæntir hlutir gerast þegar ofurhetjur halda afmæli og litríkir gestir mæta til leiks.
Bráðfyndið og skemmtilegt dansverk eftir Hannes Þór Egilsson og grímuverðlaunahafann Þyri Huld Árnadóttur í leikstjórn Péturs Ármannssonar.
Hér halda danshöfundarnir áfram að vinna með þessa bráðskemmtilegu karaktera sem þau kynntu fyrst til leiks á barnaleikhúshátíðinni Assitej 2014 við mikinn fögnuð áhorfenda.
Frumsýning 30. janúar Nýja sviðinu í Borgarleikhúsinu.
Miðaverð 2.500 kr.
Gefðu barninu ævintýralega jólagjöf með fallegu gjafabréfi á þetta skemmtilega barnaverk.
Gjafabréfið fæst í miðasölu Borgarleikhússins eða í gegnum síma 568 8000.
Þú færð tvo miða á Óður og Flexa halda afmæli ef þú velur sýninguna sem hluta af þínu Íd árskorti.
Njála er nýtt íslenskt leikverk sem byggir á Brennu-Njálssögu, einni ástsælustu sögu okkar Íslendinga. Sagan hefur lifað með þjóðinni í sjöhundruð ár, lesin í öllum menntaskólum landsins og sjaldan verið vinsælli en einmitt nú. Leikhópurinn og Íslenski dansflokkurinn, undir stjórn Þorleifs Arnar Arnarssonar, munu tjalda öllu til og nýta ótakmarkaða töfra leikhússins til að takast á við þessa stórbrotnu sögu í sýningu sem verður í senn forvitnileg, ögrandi og litrík leikhúsveisla. Bardagar, ástir, hefndir og völd en umfram allt Njála eins og þú hefur aldrei séð hana áður!
Sýningin er samstarfsverkefni Borgarleikhússins og Íslenska dansflokksins.
Njáluhátíð hefst í forsal Borgarleikhússins fyrir hverja sýningu kl 18:00 með ýmsum uppákomum. Þar verður hægt að fá lánaða búninga, kaupa kjötsúpu, sjá beina útsendingu frá leikurum í hár og förðun og fylgjast með undirbúningi á Stóra sviðinu. Jafnframt verður boðið upp á fyrirlestur um Njálu kl 19:00.
Þorleifur Örn Arnarson hefur getið sér gott orð sem leikstjóri hérlendis og erlendis og hefur unnið m.a. unnið leikgerðirnar að Englum alheimsins og Sjálfstæðu fólki. Einnig hefur hann vakið mikla athygli fyrir umdeildar sýningar sínar erlendis.
Erna Ómarsdóttir ervafalaust einn virtasti dansari og danshöfundur Íslendinga og hafa verk hennar verið sýnd á hinum ýmsu dans- og listahátíðum víða um heim. Erna hefur víða vakið athygli fyrir sinn einstaka stíl og hlotið mikið lof fyrir verk sín, núna síðast fyrir verkið Black Marrow sem hún samdi ásamt Damien Jalet, en það verk var einmitt tilnefnt til Grímuverðlaunanna 2015 sem Sýning ársins.
Aðstandendur Höfundar: Mikael Torfason & Þorleifur Örn Arnarsson| Leikstjóri: Þorleifur Örn Arnarsson | Danshöfundur: Erna Ómarsdóttir |Tónlist: Árni Heiðar Karlsson & Valdimar Jóhannsson | Leikmynd: Ilmur Stefánsdóttir| Búningar: Sunneva Ása Weisshappel | lýsing:Björn Bergsteinn Guðmundsson | Hljóð: Baldvin Magnússon | Leikgervi: Margrét Benediktsdóttir | Hljóðmynd: Valdimar Jóhannsson og Baldvin Magnússon | Leikarar: Aðalheiður Halldórsdóttir, Björn Stefánsson, Brynhildur Guðjónsdóttir, Hilmar Guðjónsson, Hjördís Lilja Örnólfsdóttir, Hjörtur Jóhann Jónsson, Jóhann Sigurðarson, Lovísa Ósk Gunnarsdóttir, Sigrún Edda Björnsdóttir, Unnur Ösp Stefánsdóttir, Vala Kristín Eiríksdóttir, Valgerður Rúnarsdóttir, Valur Freyr Einarsson, Þuríður Blær Jóhannsdóttir
Vegna frábærra viðbragða og mikillar eftirspurnar verða aukatónleikar á Jesus Christ Superstar í Eldbog, Hörpu, sunnudaginn 27. desember.
Eyþór Ingi er í margra huga fæddur til að syngja hlutverk Jesú og Þór Breiðfjörð gjörþekkir hlutverk Júdasar eftir að hafa túlkað hann áður, bæði innan lands og utan. Landsmenn eru vanir að upplifa eitthvað stórkostlegt þegar Ragga Gröndal, Björn Jörundur, Magni, Ólafur Egilsson og Bjarni Thor Kristinsson stíga á svið með meisturum á borð við Friðrik Karlsson og Jón Ólafsson.
Söngvarahópinn skipa:
Eyþór Ingi – Jesús
Þór Breiðfjörð – Júdas
Ragga Gröndal – María Magdalena
Björn Jörundur – Pontíus Pílatus
Bjarni Thor Kristinsson – Kaíafas
Ólafur Egilsson – Heródes og Annas
Magni Ásgeirsson – Pétur postuli og Símon vandlætari
ásamt Kór Lindakirkju undir stjórn Óskars Einarssonar
Hljómsveit:
Friðrik Karlsson – gítar og tónlistarstjórn
Einar Þór Jóhannsson – gítar
Benedikt Brynleifsson – trommur og slagverk
Eiður Arnarsson – bassi
Jón Ólafsson – hljómborð
Karl Olgeirsson – hljómborð
Vignir Þór Stefánsson – hljómborð
Leikstjóri – Selma Björnsdóttir
Lýsing – Magnús Helgi Kristjánsson
Hljóð – Gunnar Sigurbjörnsson
Jólasýning Þjóðleikhússins er Sporvagninn Girnd eftir Tennessee Williams í leikstjórn Stefáns Baldurssonar. Frumsýning er í kvöld á Stóra sviðinu.
Hið seiðmagnaða leikrit Sporvagninn Girnd er eitt þekktasta verk bandarískra leikbókmennta á 20. öld.
Hin viðkvæma og fíngerða Blanche DuBois má muna sinn fífil fegri. Þegar veröld hennar virðist vera að hrynja leitar hún ásjár hjá Stellu, yngri systur sinni, sem býr í verkamannahverfi í New Orleans. Í eilífri leit sinni að fegurð, mildi og umhyggju verður Blanche fyrir áfalli þegar hún kynnist hinum ruddafengna og ósiðaða Stanley, eiginmanni Stellu, og spennan magnast fljótt á milli þeirra. Blanche líður best í hálfrökkri, en óttast það mest að vera afhjúpuð og að napur sannleikurinn blasi við.
Stefán Baldursson er einn fremsti leikstjóri þjóðarinnar en nýjasta uppsetning hans, óperan Ragnheiður, hlaut Grímuna sem besta sýning ársins á liðnu leikári. Nína Dögg Filippusdóttir leikur hina viðkvæmu Blanche DuBois, aðrir leikarar eru Baltasar Breki, Lára Jóhanna, Baldur Trausti, Edda Arnljótsdóttir, Guðjón Davíð, Hallgrímur Ólafsson, Ísak Hinriksson, Lilja Guðrún og Pálmi Gestsson.
Leikhópurinn Á senunni kynnir enn á ný hina margrómuðu og yndislega fallegu jólaleiksýningu Ævintýrið um Augastein eftir Felix Bergsson, í samstarfi við Kolbrúnu Halldórsdóttur og Helgu Arnalds.
Ævintýrið um Augastein er hugljúft jólaævintýri sem frumsýnt var fyrir 10 árum og hefur verið sýnt reglulega á aðventunni bæði hér á landi og í Bretlandi. Verkið byggir á sögunum um sveinstaulana þrettán, syni Grýlu og Leppalúða, sem áttu það til að hrella fólk um jólaleytið, en í ævintýri leikhópsins er það drengurinn Augasteinn sem allt snýst um. Hann lendir fyrir tilviljun í höndum jólasveinanna hrekkjóttu, sem vilja ólmir taka hann að sér, en þegar Grýla kemst á snoðir um tilvist hans æsist leikurinn. Ná jólasveinarnir að bjarga Augasteini úr klóm Grýlu og jólakattarins áður en jólin ganga í garð?
Aðstandendur:
Leikari: Felix Bergsson
Höfundur: Felix Bergsson
Brúður og leikmynd: Helga Arnalds
Lýsing: Jóhann Bjarni Pálmason
Tónlistarstjóri: Hróðmar Ingi Sigurbjörnsson
Upptökustjóri: Sveinn Kjartansson
Leikstjóri: Kolbrún Halldórsdóttir.
„VIÐ ERUM KANNSKI GLÆPAMENN … EN VIÐ ERUM ALLA VEGA EKKI ÓHEIÐARLEGIR“
Kenneth Máni, stærsti smáglæpamaður landsins, er ennþá að stela senunni í Borgarleikhúsinu.
Byggt á samnefndri persónu úr sjónvarps- þáttaröðinni Fangavaktin eftir Jóhann Ævar Grímsson, Jón Gnarr, Jörund Ragnarsson, Pétur Jóhann Sigfússon og Ragnar Bragason.
Kenneth Máni Johnson, um tíma Ketill Máni Áslaugarson, vann fyrir Georg Bjarnfreðarson í Fangavaktinni. Kenneth er eilífðarfangi sem glímir við lesblindu, athyglisbrest, ofvirkni og almennt hömluleysi. En hann er alveg óhræddur við að segja áhorfendum frá þessu öllu saman og svara spurningum þeirra um ,,lívið og tilverunna”.
Ekki fræðandi en mjög fyndið skemmtikvöld þar sem Kenneth Máni lætur dæluna ganga svo engar tvær sýningar eru eins.
Höfundarnir Jóhann Ævar Grímsson og Saga Garðarsdóttir leiða nú saman krafta sína í fyrsta sinn í samvinnu við leikarann Björn Thors til að ljá Kenneth Mána loksins rödd á sviði Borgarleikhússins. Jóhann Ævar skrifaði ásamt fleirum Næturvaktina, Dagvaktina og Fangavaktina á meðan Saga var meðhöfundur síðasta Áramótaskaups, skrifaði pistla í Fréttablaðið og hélt fyrirlestra um mannsheilann.
Úr gagnrýni
„Maður kvöldsins er Björn Thors sem túlkar Kenneth Mána snilldarlega og af hlýju. Björn Thors hefur persónuna frábærlega vel á valdi sínu.“ SGV – Mbl
„Sýningin er bráðskemmtileg. Meistaralega gert.“ JBG – Fbl
„Stundum hélt ég að ég ætlaði að kafna úr hlátri.“ SA – tmm.is
Glænýtt verk eftir þekktasta samtímaleikskáld Svía, bráðfyndið og harkalegt í senn.
Frumsýning er þann 29. desember og verður sýningin sýnd í Kassanum í Þjóðleikhúsinu.
Hvað færðu há laun fyrir vinnu þína? Í þágu hvers ertu að vinna? Í þessu nýja verki kynnumst við fjölskrúðugum hópi fólks þar sem hver og einn glímir við markaðslögmálin með sínum hætti.
Margrét lætur sig dreyma um að sleppa út úr hagkerfinu, Máni vill rústa því. Andrej vill fá vinnu, Freyja vill hefnd. Þau fjárfesta í frímerkjum og furuhnetum, draumórum og ilmvötnum, barnavögnum og hugsjónum.
Hvernig hefur hagkerfið sem við lifum í áhrif á okkur, á það hvernig við horfum á hlutina, hvernig við notum tungumálið, hvernig við beitum líkama okkar?
≈ [um það bil] eftir Jonas Hassen Khemiri er í senn bráðfyndið og ágengt verk þar sem er leitast við að veita áhorfendum sem fjárfest hafa í leikhúsupplifun kvöldsins hæsta mögulega skemmtunarvirði á hvern keyptan miða. Hvað þarf raunverulega til, til þess að leikrit sé miðaverðsins virði?
Verkið var frumsýnt á Dramaten í Stokkhólmi á liðnu hausti og hefur notið gífurlegra vinsælda í Svíþjóð.
Hægt er að kaupa miða hér: https://midi.is/kaupamida?s=%252fImKipYAVizBNYV%252fsPXL6fu9mLkFJ95k%252brtP4lqB2G2Xv8byFiAZoYNhyY%252f63OJfySMq8PM1KUcPRaSZ20IZiYOVfXHUGshV
