Leikhus.is framleiðir sjónvarpsþætti
Nú hefur Leikhus.is undirritað samstarfssamning við sjónvarpsstöðina Hringbraut sem felur í sér framleiðslu nýrra þátta um leikhús á Íslandi. Þættirnir verða sýndir á Hringbraut og munu bera nafnið Leikhus.is. Umsjón með þáttunum hefur ritstjóri Leikhus.is, leikhúsfræðingurinn Ástrós Elísdóttir, en hún hefur unnið um árabil í leikhúsi, m.a. við fræðslu.
Í þáttunum verður skyggnst á bakvið tjöldin í leikhúsum landsins og færi gefst á að kynnast störfum og starfskröftum sem sjaldnar njóta sviðsljóssins, en eru þó ómissandi þegar setja á upp góða leiksýningu. Þættirnir hefja göngu sína þann 15. október og verða á dagskrá Hringbrautar á fimmtudagskvöldum. Í framhaldinu má svo skoða þættina á vefnum, bæði á www.leikhus.is og www.hringbraut.is.