|
Á næstunni
21 manns saknað
Dauðasyndirnar
Hart í bak
Dansaðu við mig
Fló á skinni
Skugga-Sveinn
Vestrið eina
H.V.S.F.Í
Músagildran
Steinar í djúpinu
Janis 27
Mr. Skallagrímsson
Utan gátta
Leitin að jólunum
Lápur, Skrápur (Akureyri)
Lápur, Skrápur (Borgarle.)
Brák
Fólkið í blokkinni
Pétur og Einar
Rétta leiðin
Laddi
Skilaboðaskjóðan
|
Aðventa í Iðnó
 Möguleikhúsið setur upp verkið Aðventa og sýnir í Iðnó í desember.
Hér er sagt frá svaðilförum vinnumannsins Benedikts sem fer til fjalla í vetraríki aðventunnar að leita þess fjár sem eftir varð er smalað var um haustið. Það er köllun hans að koma þessum eftirlegukindum til byggða fyrir hátíðirnar. Söguna byggir höfundur á frásögnum af frægum svaðilförum Benedikts Sigurjónssonar, öðru nafni Fjalla-Bensa, á Mývatnsöræfum og einkum þó eftirleitarferð sem hann fór í desember 1925. Þetta er klassísk saga um náungakærleika og fórnfýsi í vetrarhörkum íslenskra öræfa.
Í sýningunni er unnið eftir aðferðum frásagnarleikhússins þar sem einn leikari, Pétur Eggerz, stendur á sviðinu, flytur söguna og bregður sér jafnframt í hlutverk helstu persóna.
Lesa nánar um sýninguna
Jólasveinar Grýlusynir
 Sýnt bæði í Reykjavík og á Ísafirði.
Kómedíuleikhúsið sýnir Jólasveinar Grýlusynir í Þjóðmenningarhúsinu kl. 16.00 þann 7. desember og er frítt inn á þá sýningu.
Á Ísafirði verða fleiri sýningar og sú fyrsta 13. desember og má lesa um nánari tímasetningar hérna.
Hér er á ferðinni sprellfjörugur leikur um gömlu íslensku jólasveinana og ýmsum spurningum reynt að svara um þessa skrítnu kalla.
Hvers vegna er Stúfur minnstur jólasveinanna?
Af hverju er Stekkjastaur svona hár til hnésins?
Var fjórtándi jólasveinninn til?
Eru Askasleikir og Bjúgnakrækir tvíburar?
Allt þetta og miklu fleira fáum við að heyra um í sýningunni um Grýlusynina. Því inní ævintýrið fléttast allt annað ævintýri um nútíma unglingspilt sem hefur verið sendur til fjalla að leita að kúnni Búkollu. Jólasveinar Grýlusynir er bráðfjörugur jólaleikur með mikið af tónlist og almennu jólasveinasprelli að hætti gömlu íslensku jólasveinanna.
Lesa nánar um sýninguna
Dimmalimm
 Kómedíuleikhúsið sýnir einnig ævintýrið Dimmalimm í Þjóðmenningarhúsinu kl. 14.00 þann 7. desember og er frítt inn á þá sýningu.
Leikurinn er byggður á samnefndri sögu eftir Guðmund Thorsteinsson eða Mugg. Hér er sagt frá prinsinum Pétri sem verður fyrir því óláni að vera breytt í svan af norninni Bauju. En þegar Dimmalimm prinsessa kemur til sögunnar tekur sagan á sig ævintýralegar myndir.
Lesa nánar um sýninguna
Lápur, Skrápur og jólaskapið
 Sýnt bæði hjá Leikfélagi Akureyrar og í Borgarleikhúsinu.
Lápur og Skrápur eru einu tröllabörnin í Grýluhelli sem hafa ekki enn komist í jólaskap. Grýla, mamma þeirra, rekur þá því af stað úr hellinum og bannar þeim að koma aftur fyrr en þeir eru búnir að finna jólaskapið. Lápur og Skrápur leita um allt og leitin ber þá inn í svefnherbergi Sunnu litlu. Hún ákveður að hjálpa þeim bræðrum og saman lenda þau í alls konar ævintýrum.
Lápur, Skrápur og jólaskapið er barna- og fjölskylduleikrit í anda jólanna. Verkið var fyrst sett upp um jólin 2007 af Kraðak og sló þá í gegn en snýr nú aftur og er sett upp samhliða í Borgarleikhúsinu og hjá Leikfélagi Akureyrar.
Sýningarplan hjá Leikfélagi Akureyrar
Sýningarplan í Borgarleikhúsinu
Leitin að jólunum
 Leitin að jólunum, aðventuævintýri eftir Þorvald Þorsteinsson, verður nú sýnt í Þjóðleikhúsinu í desember, fjórða árið í röð. Sýningin hefur notið gífurlegra vinsælda og hlaut m.a. Grímuverðlaunin sem barnasýning ársins 2006.
Tveir skrýtnir og skemmtilegir náungar taka á móti litlum leikhúsgestum í anddyri Þjóðleikhússins. Með þeim í för eru tveir hljóðfæraleikarar og saman leiða þeir börnin með leik og söng um leikhúsið. Börnin ferðast inn í ævintýraveröld jólanna og sjá leikþætti um jólin í gamla daga og í nútímanum. Árni Egilsson hefur samið ný lög við Jólasveinavísur Jóhannesar úr Kötlum sem fléttast inn í sýninguna.
Lesa nánar um sýninguna
Pönnukakan hennar Grýlu
 Landnámssetrið í Borgarnesi sýnir Pönnukakan hennar Grýlu eftir Bernd Ogrodnik sem er skemmtileg og falleg jólasaga sem er unnin upp úr evrópskri þjóðsögu sem flestir ættu að kannast við. Bernd nýtur aðstoðar hrífandi leikbrúða sem unnar eru úr tré, lifandi tónlistar og virkrar þátttöku áhorfenda.
Sagan segir frá hugvitsamri pönnuköku sem nær að flýja steikarpönnu Grýlu með það fyrir augum að ferðast alla leið í arma Jesú litla og foreldra hans sem dvelja svöng og köld í fjárhúsi í Betlehem. En á vegi hennar verða margir sem vilja sinn skerf af pönnukökunni.
Lesa nánar um sýninguna
Rétta leiðin - Jólaleikrit
 Jólaleikritið Rétta leiðin, fjallar um Heiðrúnu Birtu mannabarn sem alist hefur upp í Jólalandi. Hún er send aftur til mannheima ásamt Kuggi jólaálfi til að rétta öðrum hjálparhönd og breiða út boðskap ástar og friðar sem er hinn eini sanni jólaboðskapur. Í mannheimum kynnast þau Kyrjunum sem í raun trúa ekki á neitt nema sjálfan sig og engan vegin á jólasveininn. Heiðrúnu Birtu og Kuggi er mikið verk fyrir höndum. Skyldi þeim takast að vekja aftur upp jólaandann? Geta þau sannfært mannfólkið um að með því að rétta öðrum hjálparhönd og láta sig málin varða, eru þau farin að leggja heiminum lið?
Þetta er þriðja árið í röð sem Borgarbörn standa fyrir jólasýningum. Að auki standa þessi duglegu börn fyrir söfnun á jólagjöfum fyrir Mæðrastyrksnefnd og er tekið á móti þeim á sýningunni í Iðnó. Piparkökur og djús eru í boði fyrir áhorfendur eftir sýningu þar sem hitta má svo leikarana sjálfa.
Lesa nánar um sýninguna
Ævintýrið um Augastein
 Núna á aðventunni mun Hafnarfjarðarleikhúsið sýna hina margrómuðu sýningu leikhópsins Á senunni, Ævintýrið um Augastein eftir Felix Bergsson, í samstarfi við Kolbrúnu Halldórsdóttur og Helgu Arnalds.
Ævintýrið um Augastein byggir á hinni sígildu sögu um Grýlu og jólasveinana. Sagan um litinn dreng sem nefndur er Augasteinn sem lendir fyrir tilviljun í höndum hinna hrekkjóttu jólasveina. Sveinarnir skrýtnu eru skíthræddir við lítil börn en þeir læra smám saman að elska litla drenginn og annast hann. Skyndilega kemst Grýla á snoðir um tilveru barnsins og við tekur æsispennandi flétta. Ná jólasveinarnir að bjarga Augasteini úr klóm Grýlu og Jólakattarins áður en jólin ganga í garð?
Lesa nánar um sýninguna
Íslensku jólasveinarnir
 Íslensku jólasveinarnir eru öldungis óskyldir hinum alþjóðlega rauðklædda Santa Claus sem er kominn af dýrlingnum Nikulási biskupi. Þeir eru af kyni trölla og voru upphaflega barnafælur. Á þessari öld hafa þeir mildast mikið og klæða sig stundum í rauð spariföt, en geta samt verið þjófóttir og hrekkjóttir.
Jólasveinarnir heimsækja Þjóðminjasafnið á hverjum degi síðustu þrettán dagana fyrir jól, einn í einu. Þá eru þeir klæddir þjóðlegu fötunum sínum og reyna að krækja sér í það sem þá langar helst í. Þessir hrekkjóttu pörupiltar eiga dálítið erfitt með að átta sig í tæknivæddri nútímaveröld en finnst gott að koma í Þjóðminjasafnið því þar er svo mikið af gömlum munum.
Möguleikhúsið aðstoðar Þjóðminjasafnið við að taka á móti sveinunum.
Jóladagskráin í Þjóðminjasafninu hefst sunnudaginn 7. desember klukkan 14 með opnun jólasýningarinnar Sérkenni sveinanna. Gömlu hjónin, Grýla og Leppalúði, koma í heimsókn og segja frá jólasveinunum.
Jólakötturinn mjálmar (mjáá) en Aðalsteinn Ásberg syngur ljúflega með börnunum.
Jólasveinarnir heimsækja síðan Þjóðminjasafnið klukkan 11 alla morgna 12.-24. desember, - einn í einu.
Aðgangur er ókeypis og öllum heimil meðan húsrúm leyfir. |